Sa Ambahanun Gid Lang
ni Elsed S. Togonon
Natung-an kang kahipus sanday Eddie kag Mike. Bisan ang mga pader kag aragyan kang dormitoryo nagaparapanilag sa kada igut kag lagtik nga andang mabatian sa mga kwarto. Disyembre run, ugaring may kaudluy ang paghuyup kang hangin. Bakasyon run amo nga gamay gid lang ang mga tawo sa dormitoryo.
Sa anang kwarto, indi run sarang maisip ni Mike ang anang pagpamaypay, kag nayukut run ang folder nga anang ginakuyab. Kapira run tana nagabarabaliswa. Bisan pa nagadupuydupuy ang amihan, nagabantiling mangud tana ang balhas ni Mike. Alas dose run. Ginapamangkot na ang anang kaugalingun kon ano ayhan ang ginaobra kang sara sa Room 303. Darwahanun lang nga daan sanda sa ikaapat nga panalgan. May OJT pa tana sa bangko hasta rum-an, bisperas kang Paskwa. Kadya pa lang ginakarat run tana nga mag-uli sa Guimaras agud makita ang anang pamilya. Sara pa, nahadluk tana nga mag-isarahanun sa dormitory, hay kuon kang mga imaw na sa kwarto, may nagapakita kuno nga white lady sa ikaapat nga panalgan kon tungang-gabii labi run gid kon isot lang ang mga tawo.
Ginapirit ni Mike nga pirungun ang anang mga mata. Ginaagaw kang nagasarasalidhay nga mga handurawan ang anang katurugon, si Eddie. Nagbungkaras si Mike. Mahinay na nga ginlili halin sa gawang ang kwarto ni Eddie. Bukas ang sulo sa Room 303. Ginturuk ni Mike ang orasan. Kinsi minutos antis mag-ala una. Dayon tana naggwa sa anang kwarto agud magparapahangin tungud nga ginbayaan run tana kang katuyuhon.
Nabatian kang mga pader ang tikang kang sinelas ni Mike paagto sa purungkuan nga nahamtang sa punta kang aragyan. Sa pag-agi na sa Room 303, daw ginahapulas tana kang dapya nga amat-amat nga nagparanupsup sa anang kalawasan. Indi na mahangpan kon andut gulpi nagdasig ang kubakuba kang anang dughan. Daw nahadluk tana nga may simpon nga pagkalangkag. Daw patas kang baratyagun nga basi sa anang pagpanaw matuhaw ang white lady.
Nagpungko si Mike kag nagsandig sa pader. Wara na ginpasiga ang sulo kag ginpabay-an na ang anang kaugalingun nga lamunon tana kang kadulum sa anang pagpirung. Mabatian na ang anang pagginhawa. Sa tunga kang kalinung, amat-amat nga nagtukar ang sangka masubu nga ambahanun halin sa sulud kang kwarto. Pirmi na man dya mabatian kon maglubas tana sa kwarto. Sa pira na ka bulan nga pagtinir sa dormitoryo, gintinguhaan na nga kilalahun ang nagapatukar kang masubu nga ambahanun, nga sa pira na ka bisis nga nabatian, naluyagan na run. Ugaring indi na matyimpuhan, kag sara pa, namayha tana sa hambalun kang anang mga dormeyt. Amo ra nga husto gid lang tana mamati kang ambahanun kon maglubas tana sa Room 303.
Ginpasugtan ni Mike nga duyanun tana kang ambahanun. Dayon, nagbukas ang gawang. Naglusot ang iwag halin sa kwarto dungan kang pag-igut kang gawang. Nagliso si Mike. Bukut run haron ang anang makita. Si Eddie. Mahinay dya nga nagaparapit kag nagpungko ingud kana. Naggihit si Mike. Wara it mga tinaga nga nagbuhi sa andang mga baba. Ang kahipus gid lang sa tunga kang ambahanun.
- Katapusan -