Pink nga Bag
ni Salvacion S. Maldecir
Nag-ulung-ulung si Tay Karding sa pagsunod kang turuk sa nagaparayu na nga bata. Padayon man tana sa pag-intyindi, piro indi na maman-an kun asta san-o makadangat ang ana pasinsya nga batunon nga ang baratyagun kang bata na ana ka babayi.
"Coring, sa diin ruman to malakwatsa si Joven?” ang hambal ni Tay Karding. “Nasumalang ko sa dalanun, nga nagakiwukiwu gid ang hawak kun magpanaw. Ay, abaw, lihog, ko hambali ang bata mo nga magtadung kay tana ruman ang topiko kang bilog nga baryo."
"Ginhambalan ko man ria, ugaring lang hay, wara man sa bungug na ang mga paglaygay ko," ang sabat ni Nay Coring.
Si Joven pirmi nagaagto sa balay nanday Sheila. Nahulog ang buut na sa daraga, bisan naman-an na nga daw ang swirti na marayu gid sa patad, bangud sa mga kutsokutso kang anda mga kasimaryo. Ang pink nga bag amo ang ana kaimaw sa pagpurupamasyar sa pira ka bulan nga nakalampuwas. Kun magbisita gani ang mga kumare kang anang nanay, ginahingyo na dayon na nga magpalimpyo kang kuko, alima, kag kahig sa naba nga presyo. Sa dalayon, nahulog man ang buut ni Sheila kana. Gani, nagdesisyon sanda nga magplano nga magpakasal para mauntat ang huringhuring kang andang kasimaryo kag pamilya sa ana pagkatawo. Bahul ang pasalamat na sa daraga kag napamatud-an na nga indi sablag ang pinasahi na nga lihuk ukon ang pink nga bag sa pagpabutyag kang anang baratyagun nga ginbaton man kang tampad kang daraga nga wara ti pagduhaduha.
Sangka bis, sa tunga kang kagab-ihun, masaku gid sa pagpanghugas kang andang kinan-an si Nay Coring, samtang si Tay Karding, nawili sa paglantaw kang tv. Wara nanda matalupangdan ang pag-abot ni Joven.
"Tay, Nay, mangasawa run ako!" gulpyada nga anunsyo ni Joven.
Daw nagbagting ang lingganay sa pamantin-an nanday Tay Karding kag Nay Coring sa ginwaragwag kang andang bata. Nagdungan sabat ang mag-asawa nga daw praktisado run sa inugpamangkot.
"Ano? Sin-o pangasaw-un mo, To? Babayi ukon lalaki?" Amo dya ang mga tinaga nga nagguruwa sa anda mga baba.
"Ay, abaw, gid lang, ah! Tay, Nay, indi gid mapatihan haw nga mangasawa run ako. Syimpri, pakaslan ko babayi gid lang ria, i! Kasakit gid batyagun ba nga kamo ang nagbun-ag kanakun, piro may pagduhaduha man gihapon kamo sa pagkatawo ko. Sa masunod nga inadlaw, dar-un ko si Sheila rugya sa balay para makilala nyo kag tana makapamatuud kun ano ako klasi nga tinuga," ang sabat ni Joven sa naurungan nga mag-asawa. Dayon na sulud sa anang kwarto kag magpurupanihol bisan gabii run hay daw indi na mapunggan magkadlaw sa reaksyon kang anang ginikanan.
Nagdusdos padalum sa ginapungkuan na ang anang Tatay kag nagdapyos ang baso sa alima kang anang Nanay. Madasig nga nagbungkaras si Tay Karding sa anang ginlup-ugan kag nagparapit sa ana asawa kang nahimasmasan.
"Ano ang natabo?" ang pamangkutanun ni Tay Karding.
"Amo run to ang sabat sa likum ta nga paramangkutanun. Ang bugtong natun nga bata, lalaki gid man!" ang waragwag ni Nay Coring.
- Katapusan -