Pikot
ni Emmy L. Masola
“I love you, Pa. San-o kaw ayhan mapirmi kanamun ni Baby?”
“Dali run lang, Ma. I love you, too.” Dayon na bungkaras paagto sa komidor.
Wara’t pahuway ang pagbayluhanay ka tiks samtang nagayapon tana imaw ang sawa. Ang mata ni Julia, nagadulot kay Danilo. Buta ka ugut kag pagpangimon.
“Kag andut naga ‘I love you’ kanimo? Sin-o nga ‘Baby’ ang ginahambal na nga ra?” pangusisa ni Julia pagbalik kang bana kang naghatud ka pinggan sa banggirahan.
“Julia, ginhilabtan mo ruman ang silpon ko? Ginpaandaman ta bay ikaw nga indi kaw magtandug ka silpon ko!” pangara ni Danilo.
“Natun, indi mo gusto nga mabasa ko ang minsahi ka kirida mo,” sabat ni Julia nga nagakurudug ka ugut.
“Julia, wara kaw ti dibir magtawag kay Estelita nga kirida. Hilabtira! Wara gid galubad pagkaatribida mo. Bisan ana ka iba, atribiran mo.”
Gulpi nadura ang animo ni Julia tungud sa sagunson nga mga tampa ni Danilo.
Wara kabukas kang tyanggi si Julia magdason nga adlaw hay nagagirhum sa anang pungyahun ang agi kang alima ka bana. Nagahapdus pa ang ulo bangud sa pagyudyod kana ni Danilo nga hugut ang kaput sa anang labug nga buhok.
Handum gid kag dumut ni Julia si Danilo bisan halin kang gamay pa tanda piro ang laki, wara gid ti baratyagun para kana.
“Indi ako mag-untat hasta nga maangkun ko ikaw, Dan,” saad ni Julia sa anang kaugalingun.
Nakakita si Julia kang kahigayunan kang sangka gabii .…
“Julia, gusto ko mapatay lagi kadya,” sambit ni Danilo bisan nagauta-uta maghambal sa kalinginun. “Wara run ti pulos ang akun kabuhi! Man-an mo andut? Si Estelita nagpa-Manila, ginbayaan na ako. Wara run ko ti gana mangabuhi.”
“Indi magpahinali, Dan,” laygay ni Julia. “Bukun lang si Esting ang bayi sa kalibutan.”
Nagduplay si Danilo sa kalinginun kag gintabangan ni Julia. Rugto natabo ang tanan. Magdason nga adlaw ginpakasal ka ginikanan ni Julia ang darwa. Wara ti nahimo si Danilo hay hadluk makasuhan ka paghimulos.
“Wara gid ako magdumdum nga mabatas mo nga luiban ako, Julia,” sukma ni Estelita nga nagahiribiun kang nag-abot halin sa Manila. “Man-an mo man nga nagpa-Manila ako para pormal nga maglisinsya sa akun ginaobrahan nga indi run ako magbalik hay gusto ni Dan nga magpakasal kami. Indi bala ikaw pa gani nagtugda nga surprisahun ko si Dan para madobli ang kalipay? Tapos amo ra ginhimo mo?”
Nagtalikod gid lang si Julia. Importanti, naangkun na ang lalaki nga buhay na run ginadamgo. Pira ka gabii ana nga pulaw para panumdumun kon paano mangin ana si Danilo pagkatapos hambalun ni Estelita nga nagluhod si Danilo kag maghingyo nga magpakasal. Para kay Julia, grasya nga gintunghol kang kapalaran ang pagpalingin ni Danilo sa anang tyanggi.
“Palangga ko ikaw bilang amiga, Esting, piro mas labaw ang pagpalangga ko kay Dan,” pinsar ni Julia. “Impyirno ang pangabuhi ko para sa iba, piro para kanakun, himaya ang mangin asawa ni Danilo kag mas piliun ko nga mag-iririmaw kita sa impyirno sangsa makita ko tana imaw ang iba.”
- Katapusan -