Pasaka-panaog
ni Maria Milagros C. Geremia-Lachica
Nagagutuk sa panghunahuna ni Minang ang nakita ka anang mga mata samtang nagasaka ang iskalitor sa masunod nga panalgan. Sa pagkahanggud nga ralagawan ang dyang mall. Indi na tabi masarangan ka libot dya sa sangka adlaw lang. Nagadulum man ang mga tawo.
“Dang, sa pagkaduro siguro nga aircon ang naguba bay. Rugya tanan nagpaamulya,” pakadlaw na nga muno kay Dadang, nga hinablus na sa pakaisa.
Wara tana ti plano nga maglagaw kadya nga adlaw ugaring sa pagkainit sa apartment nanda.
“Ay, Tita, wara nagakapuas ang tawo rugya. Wara tana dya rugto sa uma sa Pennsylvania, ay,” sabat ni Dadang nga nagabangirit.
Bag-o lang nag-uli si Minang pagkatapos kang masobra baynti anyos nga pagpangabuhi sa kaumhan kang Lancaster. May luha nga nagakabit sa anang miruk kang mapinsaran na si Bill, ang bag-o lang nagtaliwan na nga bana. Magpenpal sanda sa patigayon kang magurang na, si Sayong, nga nakapamana man kang Kano sa pihak nga banwa. Indi pa raad si Minang hay sobra napulo ka tuig ang kinagurang ni Bill. Dugang pa, indi tana kauyon kang ngaran kang banwa. Intercourse. Daw may lamod-sekswal pero lugar dya ka mga reliyoso kag matandus nga mga Amish. Wara na maabutan kang magshooting si Harrison Ford kang “Witness” sa kaingud nga uma nanda. Mabuut nga bana si Bill, ano pa nahulog man ang buut ni Minang. May gamay sanda nga negosyo, Bed and Breakfast, nga ginsubli ni Bill sa anang mga ginikanan kag ana run kar-on.
Ang mga iskalitor nga nagapasaka kag nagapanaog nagatupaday lang. Nautod ang paghanduraw ni Minang kang ginsiko tana ni Dadang.
“Tita, may gaturuk kanimo. Kilala mo?”
Nasiplatan na sa mga nagapanaog nga may nagamulalung kana. Bisan naglampasanay run sanda, nagabalikid sa pagtangra kana nga nagapasaka.
“Sin-o kabay tana ria. Aning, daw puksiun na uyahun ko ba,” kumod ni Minang.
“Daw nakadakup ka alas ra. Balo run, American citizen pa,” uruk-uk ni Dadang nga nagbalikid man.
May nagkinagamo sa idalum. Burubhay, nabatian ni Minang ang anang ngaran nga daw ginapasa-pasa halin sa idalum hasta nga may nagkuhit sa likod na.
“Mam, ikaw gid man si Minang? Si Ernan kuno to gapanawag,” dara balikid kag tudlo sa tawo nga nagatumbo-tumbo kag nagapamaypay sa idalum.
“Ay, hala, Tita, kilala mo gid man?”
Nangyus si Minang. Si Ernan? Ang bang-aw nga gaturuk kana, si Hernando gali to? Ano nga swerte nga sa pagkabahul kang kalibutan kag sa pagkalawid kang panahon, masumalangay sanda ni Ernan, sa iskalitor pa. Klasmitanay sanda kauna sa hayskul kag pirmi imaw sa grupo kon mamyesta ukon mangulabo. Huruyaun dya katam-an si Ernan ano pa wara gid kahambal kang anang ginatuyo kay Minang kauna. Kon naghambal lang kato si Ernan, basi ayhan nagdayunay sanda. Nabalitaan lang ni Minang nga nagsaylo ang bilog nga pamilya nanday Ernan sa Manila.
Angay ka iskalitor sa mall, nagdasig ang pagsaka-panaog kang ginhawa ni Minang kang makita na si Ernan nga nagsaka liwan sa nagahulag nga hagdan, nagapanukduk sa mga tawo, nagapanglak-ang ka mga halintang sa paglagas kana.
- Katapusan -