Pangka
ni Mirah Day A. Ballarta
Amat-amat run nga ginakaun kang kadulum ang kasanag nga ginadara kang adlaw sa kalibutan. Mabatian ang mga nanarisari nga huni kang mga sapat nga nagaistar sa maniki nga kalasangan, nga makita sa sulud kang iskwilahan sa lugar nanday Ontoy.
“Ontoy, naghambal si Lola nga indi kuno kita sagad lagaw sa rudya nga parti kang iskwilahan. Duro ang nagakuon nga mariit ang lugar nga dya,” paandam kang anang klasmit nga si Dodong nga ana ginahagad sa pagpangita kang damang.
“Daw sa manol kaw! Tawas lang bala anay dya, hay dali ta lang man buhay,” nagaugtas nga sabat kang sarawayun nga si Ontoy.
Wara ti nahimo si Dodong kondi imawan si Ontoy. Samtang nagapasulud sanda sa kalasangan, daw sa harasharas si Ontoy sa pagpamuklas kang mga siit sa andang aragyan. Wara man dya ti labut sa mga sapat nga ana malapakan. Burubhay, ana nakita ang klasi kang damang nga ana ginasagap.
Madasig nga ginbuklas ni Ontoy ang siit kon sa diin nahamtang ang balay kang damang. Madakup na run daad dya kon wara ti nagsabad nga pangka, nga naglukso sa ginapwistuhan kang dyang damang, nga nagin rason para makalagyo dya. Tungud sa kaugtas ni Ontoy, gindakup na ang pangka kag gintablug sintro sa bato sa ingud kang kawayan. Narupsak gid ang lawas kang dyang pangka kag nagtaralsik ang anang dugo.
“Dasiga, Ontoy, mauli run kita! Ako ang ginakulbaan sa ginhimo mo,” nagakabalaka nga hambal ni Dodong samtang ginausoy nanda ang dalan pagwa sa maniki nga kalasangan.
Pag-abot kang gabii kang amo to nga adlaw, nagpungko si Ontoy sa andang balkonahi samtang masaku sa pagpaupas kang anang mga damang. Wara na mabatyagan ang madasig nga pagpanaw kang oras. Timprano pa nagturog ang anang mga ginikanan kag tana lamang ang nabilin nga bugtaw. Sa hinali lang may nabatian tana nga nagkulas sa anang ingud ayon. Nagkuyampad tana paadto sa anang kwarto kag ginsarado na ang gawang. Hana run tana magbatang kang hinali lang may naglukso kag nagdukut nga pangka sa anang kahig. Nagtumbotumbo tana para mahukas dya, kag kang ana dya mahukas, madasig tana nga nagbatang kag nagpanimuron kang kapay. Nagparanindug ang bolbol ni Ontoy bangud sa natabo. Naduraan tana kang animo samtang masaku sa paghuni ang mga pangka sa palibot kang andang balay.
Taas run ang sirak kang adlaw kag ang kada grupo kang mga tawo nga nagabulig masaku sa pagbuul kang mga dahondahon para ibanyos kag itambal sa nagasikrutuy nga si Ontoy. Makatiringala nga naghabok kadya ang anang busong nga daw kaangay kang pangka.
Ginhingagaw dara si Ontoy sa ospital piro sa sulud kang ambulansya nagasinggitan dya.
“Maluoy kamo! Indi ninyo ako pagdar-a. Indi ko gusto magtawas!” ang pakitluoy ni Ontoy nga daw may ginaturuk nga mga tinuga sa anang palibot nga indi makita.
Wara dun nakaabot sa ospital ang ginhawa ni Ontoy. Ang hambal kang sangka surhano, ang pangka nga ana napatay sa kalasangan amo ang prinsipi kang mga ingkanto. Tungud sa kasubu kang hari kag reyna, anda ginbulus si Ontoy sa napatay nga prinsipi.
- Katapusan -