Mga Itip kag Kinagot ka Pista: Sangka Rebyu
ni Stephen Louie R. Checa
Ikatlo nga Bahin
Wara pa ko ka tunga kang nag-abot ang “Tinanuk nga Mais” halin kay Emmy Masola. Nagbaralikid ang tanan sa kahamot. Dali-dali ko nga gintulun ang ginausang ko bisan bilog pa sa paghingamo nga makaabot kag makabuul kang tinanuk nga mais. Indi ko man dayon pagkan-un piro ginpanigurado ko gid nga may pamahawun ako pagsamput kang kahapunanun kapin pa nga nagauran-uran. Samtang sigi akun basa ka sugidanun ni Masola daw nadura mga kinaun ko hay daw nagbinaisay man tana ang akun kasudlan. Rugya ko man nariyalisar ang importansya kang tanan nga tinuga kang Diyos – nga tanan may bahul nga katungdanan agud magmayad ang tuyub kang kalibutan, bisan daw buli kag iriputan pa panuruk ka iban kanimo.
Samtang sigi ang amun pagkirinaun, naglabay sa tubang ka lamisa si Pagunsan nga may ginabitbit nga “Regalo.” Mansig turukay ang mga imaw ko nga nagakirinaun nga daw nagapuropalantu sa andang paminsarun kon ano ang sulud ka regalo kag kon sa diin naghalin. Ginbuksan dya ni Pagunsan kag nagtambad sa amun atubang ang sangka bahul nga pinutos kang imported nga mga dulsi kag tsokolate halin sa New York. Abaw namit gid nga pangyam-is. Daw bata ako nga hangul-hangul kag hadluk agawan. Gulpi ko ginbutang ang pinggan ko kag maghakup. Nabuta gid ang akun bulsa. Daw tagiposuon ko nga nabuta man kang kasubu kang natapos ko ang anang sugidanun – sugidanun nga nagapakita kang mga sakrispisyo nga ginahimo kang mga nagahigugma sa diin, kon nagahigugma kita, sarangan ta ipaiway ang mga kalibutanun nga bagay nga nagapalipay kanatun agud lamang malipay ang atun palangga. Pati kaw man?
Samtang saku ako ka usang kang pirti ka namit nga mga handa ka DK, gulpi lang takun nanagitlun kang nasiplatan ko sa pihak balay ang nagapurong nga lansones nga tanum man ni Pagunsan nga sa sulud kang anang sugidanun “Kudal nga Kawayan.” Nagdugang gutum ko kag nagralaway gid ako pagkita ko. Samtang ginamulalngan ko ang anang istorya nga sigi panagitlun, nariyalisar ko nga wara’t mayad gid nga matugro ang urihi nga pagpatawad kag paghinulsul, nga bisan magbaha pa ang atun mga luha indi ta mabalik ang mga nagligad kag ang kabuhi buta kang sorprisa – kis-a matam-is nga daw lansones nga luto, kis-a aplud. Piro bisan ano pa katam-is ang lansones kon may kudal kag kon patay run ang nagpanamkun, wara’t pulos. Ti sigiha nyo pa pangudal. Hulata nyo pa nga mga ulod kag kulapnit lang ang makapulos.
Samtang nagakirinaun kami, gindarhan kami ni Arnaez- Lee kang nagaaso-aso nga kapi. Amo pa lang to ang pagpangapi ko nga sigi igma. Ano abi hay daw budlay gid indian ang kahamot kang anang kapi nga nasulud sa anang sugidanun nga “Disisyon.” Ti, gindisiyunan ko gid nga higpun dayon. Abaw, sa sobra ko ka kakunyag daw napaso ang akun tangun. Budlay gid man kon ginaapahan kaw sa kabuhi nga kon ano gani pamatyag ta nga daw namit, dayon ta higup, dayon ta hamal kag indi kita makamadmad kon ndi kita madunlan. Kaangay ka sugidanun ni Arnaez-Lee, kis-a kinahanglan ta man madunlan kag mapaso sa atun kadalukon ukon sobra nga paghingamo kang kalibutanun nga mga bagay kag pagsulay agud makamadmad kita. Hmmm, kis-a nagapaminsar ako nga nami guro antis kita maghimo kang mga bagay sa kabuhi ta, unahun ta ang paghinulsul, no?
Ambay sa ano nga kadimalasun nga daw gulpi lang takun ginkuga pagkabasa ko kang sugidanun ni Masola nga “Singsing ni Nanay.” Pamatyag ko ginkuga man ako ni Leonora sa sobra ko ka dinalok parihas kang pagkuga na kay Virginia nga sakun kag dalok-dalok. Mayad lang buta pa ka tubig ang pitsil. Dayon ko tayon ka tubig sa baso kag maglab-ok. Abaw kinulbaan man takun ba.
Piro ang tong kakulba nabayluhan kang paghidait kang gintirawan ko ang ginhimus ni Geremia-Lachica nga “Kinaadman.” Pagkatapos ko tulun kang anang sugidanun nga dya daw nagkanay man ang pagdaguok kang akun busong. Tuod gid man gali nga ang paghidait makaralaton bisan sa pagsugidanun lamang. Nalatnan gid takun. Gusto ko man mangin dalan kang paghidait parihas ni San Francisco de Assisi sa istorya ni Geremia-Lachica. Kag tuod gid ang hambal kang mga kaulangan ta nga ang kinaadman kag kaaram, manggad nga indi matakaw ukon marumpag bisan ni sin-o man. Bisan sin-o pa nga presidente ukon senador. Ahay nadumduman ko ruman si Janet Lim-Napoles kag sanday “pogi,” “seksi” kag “tanda” hay.
Piro lain man akun, samtang nagakaun, ginpaandar ni Masola, sara sa mga tagbalay ka DK, ang TV hay suno kana nakaskidyul nga pagwaun sa amo nga oras ang teleserye nga tana ang tagsulat kag ginatig-uluhan “Pikot.” Ay, abaw, nawili gid kami ka lantaw. Mas nami pa sa istorya kang “The Legal Wife’ kang ABS-CBN ang ana pagsaysay. Samtang ginasundan namun ang istorya ni Masola, duro sa mga bisita ang nagaparanghulog ang pungyahun. Gali timo, amo man ang nagakaratabo kananda. Abi ko gani kauna, dapli lang kag bayi ang ginaagawan, laki man gali. Kauna gusto ko man nga agawan ka mga bayi patas kay Danilo. Piro bangud sa sugidanun ni Masola nagbag-o pinsar ko. Salamat Emmy.
- Sundi ang kasugpon -