Luy-a
ni Linda C. Arnaez-Lee
Mabug-at ang ana mga mata. Gusto na magmukra piro daw ginahigup tana sa katuyo. Mabatian na ang pagpitik kang relo sa dingding. Nagalagas dya sa madalum kag madasig na nga pagginhawa. Indi tana mahimo magsala, may ginhimo nga halit si Dianne kana. Gusto tana patyun ni Dianne!
Madumduman na kisra nga nagsakit ang busong na. Ginbanyusan tana ni Dianne ka luy-a pagkatapos na dya tayhupan. Daw pinahidan nga nadura ang sakit kang ana busong. May gahum nga makaayad kag makahalit si Dianne. Kinahanglan na magmukra kag mahambal kay Viola ang tanan antis tana mapatay.
“Kamusta run ang pamatyag mo?” pamangkot ni Viola kana kang makita ang pagmukra na. Nagapungko dya sa kilid kang ana katri.
“Indi run ako maglawig …” haruson na nga hambal.
“Indi kaw maghambal kara. Kuon ka doctor, bahul ang tsansa nga mag-ayad ikaw. Rugya kita sa Amerika, eksperto ang mga doktor kag high tech ang tanan ...” pasarig ni Viola kana.
“Ginhimuritan ako ni Dianne!” utod-utod na nga hambal.
Indi mahangpan ni Viola ang ginapangasal ni Ruman. Sa Amerika sanda harus nagpangabuhi. Tatlo pa lang ka tuig nga nag-istar sanda sa Antique, piro nagapati dya sa disperatis. Kon matuod gid man, sa ano nga rason nga himuon dya ni Dianne? Bahul ang kabaraslan ni Dianne kananda nga mag-asawa. Sanda ang nagsagup kana sa bahul nga kahuruy-anan.
Kaingud-balay nanda si Dianne, sangka balo nga maistra sa publiko nga eskwelahan. May tatlo dya ka mga magagmay pa nga mga kabataan. Naluoy sanda nga mag-asawa gani gintanyagan nanda nga mag-obra dya kon Sabado sa anda balay bilang sangka sekretarya sa anda negosyo. Wara matuigi nagbusong si Dianne, kag ang hambal, si Ruben ang tatay, ang nobyo na kauna kang daraga pa tana. Wara nalikum kananda nga mag-asawa ang pirmi nga pagpamasyar ni Ruben. Ugaring wara sanda magpinsar nga maluyag pa si Dianne kana bangud bulag man dya sa asawa kag may kabataan man.
Para maluwas si Dianne sa pat-ud nga kahuy-anan, ginpabakasyon nanda si Dianne sa anda resthouse sa Tagaytay kag rugto nagbata. Nagpasugot man si Dianne nga aduptarun ka mag-asawa ang ana bata. Baw-as ang mag-asawa, gani nasiguro man ni Dianne nga mangin mayad ang paarabuton kang ana bata kananda.
Nagpadayon ang pag-obra ni Dianne kananda kag nangin pabor dya kana bangud maatipanan na pa si Baby Ruanne. Kang nagligad nga bulan, nagpamat-ud ang mag-asawa nga mabalik sa amerika dara si Ruanne. Indi magpasugot si Dianne, indi na masarangan nga mahamulag ang bata kana. Nagbaisay sanda ni Ruman kag naabutan run lang ni Viola nga nagauy-uy si Ruman kag ginakaptan ang dughan sa tuman nga kasakit. Lagilagi gindara ni Viola si Ruman sa Amerika pagkatapos maghambal ang doctor nga nagbanug ang ugat sa dughan ni Ruman kag kinahanglan nga operahan.
Naghari ang kalinung sa sulud kang kwarto antis maghambal liwat si Ruman.
“Si Ruanne, bata ko. Ako ang tatay ni Ruanne .…” Kag nagdunglay ang ulo ni Ruman dungan kang malawid nga paghuni kang apparatus nga naangut sa ana lawas.
- Katapusan -