Kinyintos
ni Geneco R. Mabasa
Darwa ka sanggatos, apat ka singkwinta, apat ka baynti, kag apat ka lima. Amo dya ang sulud kang bulsa ni Lito samtang nagapanaw tana paagto sa anang orobrahan sa kaagahun kang Lunis.
Sa anang aragyan may sangka karindirya. Samtang aga pa man, nagkaun anay tana kang anang pamahaw hay wara tana kahimus kagaina sa andang balay, piro hana na nga pagsulud sa karindirya, may sangka bata nga nagparapit kana nga nagahumlad ang alima nga daw nagapangayo. Wara gintugruan ni Lito piro ana dya ginpatawas sa sulud kag nagpungko sanda sa sangka lamisa. Tatlo ka kan-un, darwa ka nilaga nga itlog, sangka sirbi nga tapa, darwa ka saging, sangka kapi, kag sangka tsokolati. Sanggatos ang ana nagastos para sa andang pamahaw kaimaw ang sangka bata nga bag-o na lang nakilala. Pagkatapos pamahaw, nagpasalamat ang bata kag nagdiritso si Lito sa anang aragtunan.
Sa unahan naagihan na ang sangka mal-am nga nagapamaligya kang prutas kag bulak. Naghapit tana kag nagbakal. Apat ka singkwita ang ana gintao kag dungan hambal nga, “Tagua lang, Nay, ang sobra.” Nagyuhum ang mal-am kag nagpasalamat, kag si Lito nagpadayon sa anang pagpanaw.
Sa anang dalanun naagyan na ang simbahan nga bukas ang gawang. Nagsulud tana kag naghalad kang bulak nga ana ginbakal kagaina sa idalum kang ribulto ni Birhen Maria kag sa anang paggwa, nagkuot tana sa anang bulsa kag ginhulog ang apat ka lima sa kahon kang donasyon nga nahamtang sa gawang ka simbahan kag tana nagpadayon pa gid sa anang paraadtunan.
Samtang nagapanaw tana sa kilid kang mataas nga istruktura, gulpi nga may nagbasya kana kang tubig halin sa ibabaw kag ana dya gintangara kag nakita nga may iriligan gali ka tubig. Sa anang kilid may sangka tanum nga rapit run lang mapatay, gani ana dya ginsaylo sa lugar nga insakto gid nga ginailigan kang tubig para masalo kang tanum, kag nagpadayon pa gid tana sa anang pagpanaw.
Sa iskinita nga pauilud sa anang ginaobrahan nakita na ang magnanay nga nagaluhod, gisi-gisiun ang bayo, wara nahusay ang andang mga buhok kag daw nagutum dun. Nagkuot tana sa anang bulsa, ginbutang ang apat ka baynti sa alima kang bata kag magdiritso sa anang ginaobrahan.
Sa gawang, may nagabantay nga gwardya. Ana dya ginbugno, “Mayad nga aga kanimo, Nong,” dayon tao kang prutas nga ginbakal na kagaina. “Tao mo kar-on sa mga bata mo, Nong, pag-uli mo.” Nagpasalamat ang gwardya, kag si Lito nagdiritso sa anang lamisa nga nagyuhum hay ana ginpaminsar ang tanan nagkaratabo sang aga ka Lunis.
Sa anang pagkapkap kang anang bulsa, ana nadakpan ang sanggatos nga nabilin. Ana dya ginpilo kag ginpainsakto sa buho kang kahon nga nakapatong sa anang lamisa nga may nakasulat, “Para sa birtdi ni Nanay.”
Natapos ang aga kag ang kinyintos naubos, piro si Lito may kasadya sa gihapon sa anang itsura hay para kanana ang kwarta, kwarta lang. Ang pinakabahul nga primyo nga mabaton sa kabuhi kang sangka taho, amo ang yuhum, pasalamat, kag kasadya kang iba nga taho nga ana ginbuligan.
- Katapusan -