Kainit kang Lawas
ni Early Sol A. Gadong
Daw malitik ang ulo ni Uging. Indi na mahangpan kon andut rugto tana sa sulud kang sangka bahul nga kawa.
Nagakataktak ang ana balhas. Bisan sa pagmukra, indi na masarangan. Nagginhawa tana kang madalum, kag pirit ginapanumdum ang nagkaratabo kang nagligad nga gabii. Nagbalik sa ana painoino ang bagrong ka sound system sa baylihan ugaring wara ti imaw nga laragway ang tunog. Gintirawan na magbangon piro tama ka bug-at ang ana pamatyag. Ginpirit na panumdum kon andut rugto tana sa sulud kang sangka mainit nga kawa.
Sa baylihan. Nadumduman ni Uging nga may nakita tana nga babayi sa baylihan. Nahagadan lang tana kang klasmeyt na sa WIT nga mamista sa anda sa San Enrique. Tungud wara man tana ti gana mag-uli sa anda balay sa Hamtic, nagtawas tana sa ana klasmeyt.
Sirum run kang mag-abot sanda sa baranggay nga ginapalibutan kang katubuhan. Simpli ang handa nga anda gindangtan. May apritada, adobo, kag bihon. May kaldirita nga baboy nga nagaparigos sa mantika. Brubhay, nagsugod run sanda sa pag-inum kang beer. Nadumduman ni Uging ang sumsuman nanda nga talaba, kag ang kaaslum-kahang kang sinamak nga nagsirbi sawsawan. Kang bastanti run sanda sa inum, naghagaday sanda nga maagto sa baylihan sa plasa. Rugto na nakita ang babayi.
Shara.
Daw igrab kang posporo nga nagduut sa bilo kang kandila nga nagtuhaw sa hunahuna ni Uging ang ngaran kang babayi nga ayhan katubo na. Imaw kang mga handurawan ang padayon nga pag-init kang kawa, piro daw aso dya nga indi mahawidan ni Uging. Nadumduman na nga ginhagad tana ni Shara nga maggwa sa baylihan. Luyag man ni Uging nga masolo si Shara, gani nagsunod tana tubtub nakalab-ot sanda sa tubuhan marapit sa plasa. May gindaho si Shara kana nga baso kang irimnun. Nagparang-init kang ana kasudlan, katupung kang pagparang-init kang ana lawas dukar-on.
Nakita na ang paglain kang pungyahun ni Shara. Nangin mas pamilyar kay Uging ang bag-o nga pungyahun kang babayi sa ana hunahuna. Itsura dya ni Budang nga ana pakaisa. Daw hinali nagtiyog ang kalibutan ni Uging sa pagbalik kang mga handurawan kang napulo kag apat lang tana ka tuig rugto sa anda balay sa Hamtic, katong mga tion nga nagaistar sa anda balay para magbakasyon ang pakaisa nga anum lang ka tuig. Gindara na si Budang sa tubuhan. Gin-ubahan na ka shorts kag panti ang inosente nga bata, nga wara mahimo kondi ang magtangis. Tuman tana ka balong sa ginadumilian nga droga nga nagdugang sa kainit kang ana nagapanghinupang nga lawas.
“Dahaun ta kaw sa kawa kon indi kaw maghipus!” pamahug na kay Budang, tubtub nalumus sa huni kang mga sirum-sirum ang paghibi ka bata. Wara gid ti may nakamaan kang pagsilot ni Uging sa ana pakaisa. Wara run man magbalik sa anda nga panimalay si Budang.
Nagatarangso ang sip-on ni Uging nga naglakut sa ana balhas. Tuman run gid ka init kang kawa. Sa tunga kang dagundong kang sound system, wara ti makabati sa panangis ni Uging kondi ang mga sirum-sirum.
- Katapusan -