Ilibitor
ni Ritchie D. Pagunsan
Aga pa nagapadogpadog run si Carmina paagto sa bilding ka anang opisina. Nagadali dya, daw may ginalagas. Mayad nga aga pa agud maligwa ang pagsakay sa ilibitor, baribad na kaina kay nanay na, nga daan Lunes kadya nga adlaw. Piro likum sa tanan, si Daniel ang ginadalian na.
Bisan kang Byernes na lang urihi naimaw sa ilibitor si Daniel, pamatyag na ang nagligad nga mga inadlaw daw malawig nga tinuig. Ka sarang-Martes lang sanda kadya una nagsumalangay, gani wara tana maghuna-huna sa ilibitor na masapwan ang kalipay nga buhay run ginasagap.
Alas nwebe ang umpisa kang anang obra, piro timprano tana nagsulud kang sarang-Martes tungud may miting sanda. Wara ti tawo hay aga pa. Darwa lang sanda ni Trining, laon nanda nga sekretarya, ang nagsakay sa ilibitor.
Kang hana run magtakup ang ilibitor, may alima nga hinali nagpugung. Nagkusmod si Carmina. Amo dya ang ginaindian na, kapin pa ang nagadalagan kag nagapamirit magsakay bisan gutuk run. Ginakabalaka na nga basi magpalya dya sa kabug-atun. Tamad tana maghagdan.
Nagsulud ang laki. Daw hinali naggutuk ang sulud kang ginasakyan hay may ginauribay dya nga bag. Nagdukdukanay sanda. Nagaugtas dya kon gutuk hay madapugan na ang ingud, kapin pa nga kalabanan sa nagaobra rugya daw kargador ang itsura kag pangginawi.
Piro danay kaw, ang muno na sa anang kaugalingun, daw pinasahi ang sara nga dya. Hamot, bag-ong takas. Sa pamatyag na Ivory ang ginamit kadya nga habon. Kag hipid ang panaptun na. Kon wara lang si Trining, daw maduha-duha tana nga basi sala ang nasudlan na nga bilding hay wara tana maanad sa amo dya nga postura. “Daniel Martinez” ang nasiplatan na nga ngaran nga nagakabit sa bulsa.
Indi na mahangpan ang kainit nga nabatyagan kaina kang nagdut-anay ang andang butkun ni Daniel. Dungan sanda nagtangra, nagtabo ang panuruk, kag nagbayluhanay kang matam-is nga yuhum. Hinali lang naglaktaw ka sangka pitik ang dughan na.
Sarang bala mahulog ang buut kang darwa ka tinuga sa una nga pagsapding kang andang panit?
Naglupad ang paminsarun ni Carmina kag nag-umpisa magdamguhanun nga imaw na si Mr. Ivory, ang tawag na kay Daniel. Nautod lang dya kang nagbagting ang ilibitor. Si Daniel, naggwa sa ikapito nga panalgan. Kon wara lang nagapadalung kana si Trining, daw sundon na dya kag pangilalahun.
Naliwat pa pira ka bisis ang pag-imaway nanda ni Mr. Ivory sa ilibitor. Pirmi gaduko piro kon wara gani nagaturuk si Carmina, nagamulalung kana. Indi man kapangisug ang daraga hay rugyan si Trining nga nagadulot ang mata. Hasta run lang sanda sa dut-anay kang butkun bisan ligwa.
Amo dya ang kabangdanan kon andut ginakarat tana nga magsamput ang Lunes.
Wara pa mag-alas syete, gani naghulat tana bisan pira run ka bisis nagbukas-sira ang ilibitor kag nakalumbos run si Trining. Kang wara magtuhaw ang anang ginahulat pag-abot kang alas otso, nagsaka si Carmina kag nangisug sagapun si Daniel.
“Mam, last day ni Sir kang Byernes,” sabat kang gwardya nga pinamangkutan na. “Maabat to sa miga na sa Canada agud magpakasal.”
- Katapusan -