Bordon
ni Linda C. Arnaez-Lee
Alas singko run sa hapon sigi pa tana budubudu ni Diding kang anang mga luwa. Para dya kar-on sa gabii, mangayaw tana ka pamilasyon rugto sa pihak suba. Tagbururing kuno kar-on kag bati na duro ang mangayaw nga mga manogbilasyon halin pa sa Pangpang kag Rombang. Sangka dupa gawa ang listahan kang anang mga luwa. Pinanubli na pa dya sa anang anhing Uway Sinta ngato nga ginakilala nga reyna sa mga bilasyon kauna sa andang baryo.
“'Panaw mga siki sunod dara-dapa. Maagto sa hardin, mamupo kang bunga ….’ Ay, ano run to gani?” Nagduyu si Diding kag magpatirik kang kalimutaw na.
“Ano ginabudubudu mo dyan, Ding?” pamangkot ni Manding Lusing kang nakita nga nagatirik ang mga mata ni Diding samtang sigi ang kibotkibot kang anang baba.
“Ah, nagasaulo ako kang mga luwa, Nay. Mamilasyon kami ni Maymay kar-on rugto sa pihak-suba. Tagbururing kadya, gani pat-ud gid nga duro ang mamilasyon,” sabat ni Diding nga nagtadlung run ang panuruk.
“Bilasyon gid ayhan ang agto mo? Basi si Dodoy tana nga tagadurog ang tuyo mo rugto,” sunlog ni Manding Lusing sa anang laonlaonon nga daraga.
“Si Nanay bala haw. Ti, ano gid haw kon si Dodoy? Bisan maitum tana ra hay mahining man,” sabat na nga nagayuhum kag nagahiwud-iwud ang lawas.
“Ding! Diding, dali run, mapanaw run kita!” Limug ni Maymay nga nagapanawag sa sagwa.
“Abu! Mamilasyon lang mailis gid. Nagapangamyun pa dapug nyo. Siguraduhon mo lang si Dodoy, Ding, ha!” ang pabati-bati nga sunlog ni Manding Lusing kang maglisinsya ang darwa nga mapanaw run.
Pagsamput nanda sa bilasyunan, nagapurungko run ang manogbilasyon sa balkonahi kang balay. Pabilog ang anda pagpungko kag nagatarabid ang anda mga alima kag sa tunga kang bilog amo ang tatlo ka mga bantay ukon takawan sa bordon. Rugyan si Dodoy sa tunga! Tana ang isara sa mga bantay. Nagpanigal-ut sanday Diding kag Maymay para makapungko sa bilog. Umpisahan run ang bordon.
Gintao run sa Reyna ang singsing nga bato. Samtang nagakanta kang bordon, malibot ang bato kag maagi dya sa mga alima kang nagapungko sa bilog. Kon madakpan kang bantay ang sinsing sa alima, pagapinahan ang nadakpan paagi sa pagluwa ukon pagkanta. Kon makalibot kag makabalik sa reyna ang singsing, ang tatlo ka bantay ang pagapinahan.
Ginakulbaan run si Diding. Garut ang pasiplat ni Dodoy kana. Daw tana gid ang ginadumtan nga dakpun. Nagpulok si Maymay sa tupad na kag nabatyagan ni Diding ang sagapra kang bato sa anang palad. Rugyan kana ang singsing kag si Dodoy sa anang atubang. Daw ginatambor ang dughan ni Diding sa kakulba kang gindakup ni Dodoy ang ana alima. Piro ginpisil lang ni Dodoy dya, wara ginbuul ang bato nga ana ginakumkum. Daw naudum si Diding kang mga turuk kag yuhum ni Dodoy.
Gulpi lang nagdulum. Brawn-awt! Naggirinual ang mga tao.
“Sagapa ang kingki!”
“Sa diin ang posporo?”
Mansig kapkapanay. Nabatyagan ni Diding ang pagbutung ni Dodoy kana panaog sa balkon.
Pagkasiga kang sulo, indi run makita ang singsing. Amo man sanday Dodoy kag Diding.
- Katapusan -