Bais Palad
ni Elsed S. Togonon
Sa tunga kang pag-ingkib kang hamburger kag pagsuyup kang softdrinks sa cafeteria sangka mauranun nga aga, nagabaisay sanday Elan kag Meg. Ginlugay ni Elan kang straw ang styro nga tunga run ang sulud samtang nagaturuk kay Meg. Ang anang mata nga nagaugut daw ana kang binukot nga nagasulay kang linibo nga hangaway sa sulud kang kurundalan.
Naumpawan si Elan sa mabug-at nga tapik sa anang abaga. “Inagi, di bala?”
“Sin-o agi?” pamangkot ni Elan dayon lingilingi.
“Ang laki nga nagbiya sa bestfriend ko,” sabat ni Meg. “Ang naghambal kana nga kapalaran lang kuno ang makadisisyon kon sanda gid man ang madayunay. Sin-o man abi nga tadung nga laki ang makahambal ka ria?”
“Ti, ano gid?”
Nagdalung ang mga mata ni Meg. “Ang mga laki nga may amo ra nga disposisyon, wara it itlog nga mag-atubang sa riyalidad. Ang gugma indi dapat magsarig sa kapalaran. Wara kaw nagapamati sa istorya ko?”
“Gapamati man, ih. Sa tuod lang, indi inagi ang pagpati sa kapalaran. Kag sakto lang gid ang ginhimo kang laki nga nagbiya sa imong abyan,” sabat ni Elan.
Gulpi lang ginpalid ang styro kag nahulog sa salug. “Piro ginpalangga na dya. Nagrisgo tana.”
“Suno sa istorya mo, Mam, manogsalo lang ang laki. Wara pa gin-ariglo kang imong bestfriend ang problima sa anang ex kag nahadluk tana nga indi pagbatunon kang anang ginikanan ang laki. Nang-indi tana nga maggwa imaw ka laki hay hadluk nga makita sanda kang iba nga mga tawo nga indi pa sarado ang natabo sa nagligad."
Nagkusamud si Meg. Nagluntad ang linung kananda nga darwa.
“Daw sakto kaw, sir. Hambal kang bestfriend ko, may mga hitabo nga ginpamatud-an kang laki nga gentleman tana. Kag nagpromisa dya nga padayon sanda nga mangin mag-abyan.”
Nagkayugpus ang baga ni Elan. “Daad mabulagay man kamo kang imong boyfriend,” hambal ni Elan sa anang kaugalingun. Naghipus liwat ang darwa. Ginturuk ni Meg ang anang rilo. Alas dosi run.
“Dasig dalagan kang oras, no? Piro, sakto ikaw. Sangka risgo ang gugma. Kag kon ako sa laki, patas man kato ang himuon ko. Indi anay mag-istorya sa bayi, kag tugruan tana kang ispasyo. Kon handa run ang bayi, ti, amo run ra ang sakto nga tion ...." hambal ni Elan.
Nagyuhum si Meg. Nagtindug sanda ni Elan. Saku run ang cafeteria. Nag-uplok man sanda nga darwa sa tunga kang pagdinagusu. Nagbaskug ang uran. Pagdangat sa gawang, nagpundo si Elan agud kuoton ang payong sa bag.
Nagkadlaw si Meg kag gin-abrihan ang anang payong. “Pirmi mo lang lipatan ang payong mo, Sir, kon mag-uran. Kon wara gauran, ginadara mo dya. Ay, ano man?” Nagkadlaw sanda nga darwa.
Ginkaptan ni Elan ang payong kag ginkupkupan ni Meg ang anang bag. Nagdut-anay ang andang mga lawas. Nadapgan ni Elan ang pahamot ni Meg sa anang liug kag buhok. “Daad rayu lang ang Rada Hall halin sa cafeteria,” pinsar ni Elan. Kang nakadangat run sanda sa Rada Hall, naghani si Meg kay Elan antis sanda nagsulud sa Faculty Room.
"Single ako."
- Katapusan -