Ang Trahidya ni Jonell Estillore
ni Elsed S. Togonon
Kadya nga gabii, napatay si Jonell Estillore.
Kaina, sa sulud pa lang ka traysikul, indi run tana mapahamtang. Sa pag-undag kang sarakyan, nagsamo ang anang kalangkag kag kakulba hay may tabuon tana nga katsat na sa Grindr, nga naistorya na pira run ka simana: si Raul.
Suno sa GPS sa anang silpon nga kaina na pa ginasundan, rapit run tana sa kalyi nga tabuan nanda.
“May oras kaw pa nga mag-atras, Jon,” kontra kang anang painoino. Una na dya nga bisis makigkita sa sangka istranghiro nga nakilala na lang sa sangka dating app tungud naluyahan kag wara ti istoryahun sa anang balay hay sa Iloilo ang anang pamilya. Gin-asoy na ang kitid kag dulum nga iskinita pagnaog sa traysikul. Nagapanimaho ang kalog kag may nagarinapta nga mga upos kang sigarilyo sa dalan. Mabatian na man ang pag-iwik kang mga baboy nga daw ginalugus sa indi marayu nga tangkal.
Liwat na ginteks si Raul nga paagto run tana. Burubhay, sa atubang run tana kang gawang kang balay nga ginhambal kang anang katsat. Hana na nga panuktok, nabatian na ang limug sa anang painoino. “May tsansa kaw pa nga maglagyo.” Garing urihi run, kag gulpi tana nanguyus kang nakita na nga lain ang itsura ni Raul sa profile picture na sa Grindr. Nagdugang ang kulba na.
Dulum ang balay. Pira ka minutos tana nga naurungan kag sa indi na mahangpan nga rason nagsunod tana sa ginhambal ni Raul nga masulud. Dasig ang kuba kang anang dughan kag naghugut ang kaput na sa wiskey nga anang dara.
“Dali lang, may tawgan ako sa gwa,” hambal na kag dayon talikod. Piro gulpi lang tana ginhawidan ni Raul sa may butkun. Nabuy-an na ang botilya kag nabuong dya. Sa anang pagtinguha nga makahawad sa hawid ni Raul, natalupangdan na ang nagabaga nga mata kang laki bisan dulum. Ginguyud tana rapit sa tokador. Pagbuul ni Raul kang kutsilyo, nakapangita tana kang tsansa nga makapalagyo. Piro sa pagdalagan na, nabatyagan na nga may nagdat-ul nga tarum nga bagay sa anang gusok.
Indi lang si Raul ang sa sulud kang balay. Sa pagburon kang anang panuruk, darwa ka nagangisi nga mga dagway ang anang namasnahan.
Kang naumpawan, nakabatyag tana kang paranakit kag hapdi sa anang kalawasan. Linung ang balay kag wara run sanday Raul. Wara run man ang anang kahita kag silpon. Maluya tana nga nagsuksok kang anang bayo kag shorts. Sa sulud kang taxi, ginpunggan na ang anang pagluha hay basi makita tana kang drayber. Luyag na nga maghapit sa istasyon kang pulis piro nakunupan tana kang huya kag basi indi sanda magpati sa natabo kana.
Paglab-ot sa balay, ginlumus na ang anang kaugalingun sa karamig kang tubig kag ginludgudan ang bilog na nga lawas. Buhay tana nakatapos.
Sa atubang kang ispiho ginhimutadan na ang anang hublas nga lawas. Ginkupkupan na dya. Duro nga daad ang nagsalidhay sa anang pinsar. Sa anang pagbatang, ginkapayan na ang kaugalingun kang paghinulsul. Sa anang pag-isaranhun, ginbaton na ang anang kamatayun.
- Katapusan -