Ang Sikrito
ni Von Cleo A. Tabotabo
“Toy, ano rian ginasagi mo ka pindot sa silpon mo kag dayon uruk-uk man?” ang hambal ni Akay sa ana bana. “Gabii run pro, indi ako rugya katurog. Abi, paturuka man bi ako ka rian.”
“Ah, wara, Ma, ah! Nagasipal ako dya ka geyms. Sigi, turog lang dyan timo bala,” ang hambal ni Toy nga naggwa sa sagwa samtang nagapadayon ka pindot kang ana silpon.
Sa tuod lang wara gasipal si Toy sa ana nga silpon, kondi nagateks sa ana nga ginapangalyagan nga si Istet. Si Istet bulag sa ana ikatlo nga bana kag may tatlo man ka magagmay pa nga mga kabataan.
Wara naglawid ang anda nga pagteksanay kag sanda run ang nagatakaw-takaw kitaay sa tago nga pamaagi. Kon bukut gani si Toy ang nagaagto sa balay ni Istet, si Istet ang nagaagto sa baybay, mga alas onsi sa gabii kag maghulat kay Toy para magpahurumhurum sa tubig.
“Toy, wara run gid ako ti mahimo. Nahulog run gid ang akun baratyagun kanimo. Daad pirmi kita imaway,” ang hambal ni Istet.
“Ahay, Istet. Ano abi hay may pamilya run ako mong. Indi ko man mabayaan ang akun mga bata. Kon nakilala ko daad ikaw kato palang nga daan, daad ikaw gid ang akun nga ginpakaslan,” ang tikal ni Toy.
Wara gid ang darwa kamaan nga rugyan nagapanago si Akay sa likod ka niyog. Nagsunod gali tana kaina kang naglisinsya si Toy nga maagto tana sa balay ni kumpari na Wili nga rapit sa baybay nayon. Wara nagpati si Akay bangud duro ang mga kilala na nga nagapanugid kana parti sa ginaobra ka ana nga bana kon wara dya sa anda nga balay.
Nag-uli tana kag nagpaturogturog. Sa ana nga paminsarun ginhuman ang mga plano kon paano na pauntatun ang darwa sa anda nga ginahimo.
Kang mahamuuk run nga nagadamguhanun si Toy, ginbuul ni Akay ang silpon ka anang bana kag ginsaulo ang numiro ni Istet. Nag-agto si Akay sa internet cafe kag ginpanagtag sa ana nga mga kilala ang numiro paagi sa Facebook. Ginpadara na man ang numiro ni Toy sa ana nga tiyo nga kapitan ka baryo kag nag-uli nga wara ti may nakamaan bisan sin-o.
Pagkaaga ....
“Toy, daw nagapangasubu gid ikaw dyan haw? Ano problima?” ang pamangkot ni Akay sa anang nagasiburo nga bana.
“Wara, Ma, ah. Sakit lang akun ulo hay nag-inum kami kabii. Nahang-ober ko siguro,” ang baribad ni Toy.
“Ti, gusto mo masahi pa?” sabat ni Akay
“Hindi lang ah, mapahuway lang ko kady,” ang hambal ni Toy.
“Hang-ober gali sa bayi, hay pan-us run kamo kadya,” ang pinsar ni Akay samtang nagakadlaw sa ana nga kaugalingun.
Burubhay, may nagteks sa silpon ni Toy.
“Mayad nga aga, pre. Kon di kaw mag-untat kay Istet. Sa irigasyon tupa mo! Indi kaw maglango-lango ha! -<3<3<3 Mwah. Mwah. Tsup, tsup.”
Umpisa kato, wara run sanday Toy kag Istet nagkitaay liwat. Nagpadayon nga malinung kag masadya ang pamilya ni Akay. Wara kamaan si Toy kang ginhimo ni Akay asta kadya.
- Katapusan -