Ang Pag-uli
ni Gil S. Montinola
“Finally! I’m going home! – feeling awesome, happy and excited.” Nag-post anay tana kang status sa anang Facebook antis nanaog sa taksi.
Masobra run sa pulo ka tuig nga wara tana kauli pay wara man tana nabudlayan sa pagpangita kang bag-o nga terminal. Amo man sa gihapon ang ginauyungan kang mga bus paadto sa anda banwa halin sa dakbanwa kang Iloilo. Pagalpalun man sa gihapon ang mga bus, ginaamat-amat run lamon kang tuktuk ang lawas ka dya, indi bagay sa ana itsura ang ana pagasakyan. Tana nga seksi run ka tama, nga kitaun sa kurbada kang anang lawas sa pikit nga panaptun, sa bulto kang buli sa anang gutuk nga pantalon, kag sa anang kataasun nga gindugangan pa gid kang anang mataas nga takong.
Tanan nagaturuk kana sa pagsaka na sa bus. Nakayuhum tana kang nakita na sa nauluhan nga bahin kang drayber ang linya nga “Basta driver, sweet lover.” Nagbungguanay ang mga mata nanda kang drayber sa ispiho, kag nakita na nga ginpangirayan tana kang drayber. Nagbalus tana kang malum-uk nga yuhum.
“Nong, lihog lang ang mata ta sa dalan, ah,” lahug nga saway kang sara ka mga pasahiro sa tupad.
Nagngisi lang ang drayber. Kang nag-umpisa run ang pagpanaw kang bus, nag-upisa man ang pagtugro kang konduktor ka tiket.
“Sa diin ta, Ga?” nagayuhumyuhum nga pamangkot kang konduktor.
Dayon na man sabat. Nagsaka ang kiray kang konduktor nga daw sa nahangyus gid sa anang nabatian, kag maabtik dya nga nagsaylo sa pihak nga pasahiro.
Ginapalidpalid kang hangin ang ana nagabaludbalud nga buhok, kag nagaundag-undag man ang anang busog nga dughan sa kada agi kang bus sa batsihun nga dalan. Ginapamalhas ang tupad na nga soltiro bisan mabaskug ang dapya kang lab-as nga hangin.
Kadasig magbaylo ang ralantawun sa bintana kang bus. Nakapaminsar tana nga daw kadasig man kang tanan nga mga nagkaratabo sa anang kabuhi. Nalipay tana nga tulad makauli run gid man tana.
Kang masobra darwa ka oras ang nagligad, marapit dulang ang anda banwa. Ginbuul na sa anang bag ang kikay kit kag ginkay-ad ang anang uyahun. Nagbutang kang pulbos kag lipstick, kag ginhusay na ang buhok. Handa run tana. Rayu pa lang, kita na run ang anda balay nga nagalabaw sa tanan nga mga balay sa anda lugar. Tungud dya sa ana nga pagpangabudlay nga mapatindugan kang mayad nga iristaran ang anang mga ginikanan. Ginturuk na lang ang konduktor, dayon man kadya timbri sa drayber nga may manaog sa bangga.
Tanan nga mga pasahiro nagaturuk kang tana run ang nanaog. Ginbuligan tana kang konduktor sa ana mga dara nga daw nagadali gid. Nagburhot lang dayon ang bus kag ginbilinan tana kang yab-ok. Dalidali na nga ginbuul sa anang bag ang pula nga panyo kag nanabon. Pagtahaw kang yab-ok, nagturuk tana sa wala kag nagturuk sa tuo, kag dayon nanga ginbitbit ang bag agud magdiritso sa anda balay.
“Mario? Mario! Mario, hulat!” May nagsinggitan sa likod na.
Wara tana nagbalikid ukon nagsabat, hay tulad kilala run tana bilang si Maya.
- Katapusan -