Pagbayaw:
Sangka Kumperensya Nahanungud sa Sugidanon nga Epiko
Ginaagda ang tanan sa Pagbayaw, sangka kultural nga kumperensya kag pasundayag nahanungud sa Sugidanon, ang epiko kang Panay, nga pagahiwatun sa Nobyembre 14-16, 2013 sa UP Visayas, Iloilo City.
Ang dya nga kumperensya gintukod kang Balay Patawili Inc., kaimaw ang National Commission on Culture and the Arts, UPV Center for West Visayan Studies, kag Siyudad kang Iloilo. Ang kumperensya magatipon kang mga iskolar kag artista sa Iloilo, Manila, kag sagwa kang Pilipinas agud lubadun ang nagkalain-lain nga mga epiko paagi sa pagbasa kang pang-akademya kag mabugnaun nga mga sinulatan kag pagpasundayag.
Naabay sa mga manoghambal si UP Vice President Maragtas S.V. Amante, isara sa mga taglaygay kang Dungug Kinaray-a. Isara man sa mga manogbasa si Ma. Felicia M. Flores nga Bise Presidente kang Dungug Kinaray-a.
Ang pagsulat kang Sugidanon nahimo sa sulud kang sobra 20 anyos nga panalawsaw ni Dr. Alicia P. Magos nahanungud sa adlaw-adlaw nga pagpangabuhi kang Panay Bukidnon sa Calinog, Iloilo kag Tapaz, Capiz. Si Dr. Magos isara man sa mga taglaygay kang Dungug Kinaray-a.
Ang bayad para sa rehistro P100 kada adlaw.