Yolanda
ni Consolita V. Rubino
Ikaw si Yolanda, bagyo nga halin sa kalangitan
Ang ngaran mo manami pamatian pero malain ang batasan
Anhaw nagpanaog ikaw halin sa langit nagabungsadan?
Nagwaswas ikaw tudo-tudo nga wara ti duga-duga.
Abi mo Yolanda, ang agi mo nagatiyog kag nagahuguros
Hala ikaw kapuros nagdalagan kang pwerti ka dasig kada kilometros
Sa tanan mga bagyo nga nag-agi ikaw gid ang pinakamapagrus
Nangin kagha sa bilog nga kalibutan hay ang tanan nagaantos.
Yolanda, ginpamaan mo sa tanan nga ikaw ang pinakamapurus
Sa Pilipinas pa ikaw haw nag-agi kag nagpanglampus ka hangin nga huros-huros?
Malapad ang Dagat Pasipiko raad rudto mo gin-ula ang imong kaugut nga mapagrus
Wara gid ikaw ti pasunaid, hurais, mapintas kag wara ti kaluoy sa mga kubus.
Ti, ano kar-on? Ginlapa mo gid kahusto ang kabisayaan kag duro nga mga katawhan
Ang bilog nga siyudad kang Tacloban, Leyte kag iba pa nga lugar imo gid ginpakiras-an
Lantawa! Ano karon? Pira ka mga katawhan nadura pati man ang andang kapalaran
Kami tanan nagahibi sa kaluoy, nabiktima, naapiktuhan pati ang bilog nga kalibutan.
Yolanda, ikaw ang pinakaurihi nga bagyo nagwaswas kag nagpasipala sa Pilipinas
Nagasakit gid ang amun buut kanimo hay gindapit mo pa si buhawi kag hala kapuros
Gindara mo pa ang uran nga madamul, salya ka balud nga mataas nagapanglampus
Ginrumpag, gin-ukay mo ang kabisayaan, karon nagakasakit, kasubu ang tanan gaantos.
Sa lugar namun sa Antique, rudto dapit sa norte duro ang kapyerdihan mo, Yolanda
Mga kahoy nagkaratumba, paray hana run magpamukad nagharaplak, maulian pa bala?
Duro ang naduktan kang balatian tungud sa kakulba kag kahadluk ka imong pwersa
Pobre man ang mga pumuluyo, ginhawa lang kahimakas, ginpaantos mo pa, Yolanda.
Mayad gani, Yolanda, may Diyos kami nga buhi ginadangpan kag ginapangamuyuan
Tana rudyan nagasustenir, nagapabakud, nagapanghikot nga ang biktima mabuligan
Tungud sa kalamidad nga natabo, ang bulig nagabaha ginapadara sa nagakinahanglan
Ang katawhan sa bilog nga kalibutan nagaimaw ka pangamuyo sa mga biktima nga maulian.