Tabogi
Koliksyon ka mga Mamugu nga Sogidanun
Ginsolat ni: Danny S. Tabuyan
Kadamulun ka libro: 204 ka panid
Diboho sa tabon ka libro: Tatiana Popova/Shutterstock.com
Ginbalhag sa: New York, USA
Ang "Tabogi" ang ona nga libro ni Danny S. Tabuyan, nga isara sa mga katapo ka Dungug Kinaray-a Inc.
Halin sa pamono ka libro:
Ang dya nga libro, koliksyon kang orihinal nga mga sogidanun nga Kinaray-a kag gintig-olohan nga TABOGI. Ang handum kag toyo na ka dya amo ang pagtipig kang linggwahi nga Kinaray-a, kag amo man kang koltora kang mga Karay-a, agud ang mga orihing tobo magpakamahal kag magpabogal kang linggwahi nga namat-an - ang dungganun nga linggwahi kang atun kamal-aman. Ginapon-an dya kang mga sogidanun nga bonga lang matood kang panghunahuna, ogaring ginpasad sa matood nga nagakaratabo sa adlaw-adlaw nga pagkabohi, sa mga pagpati kag pagsorondan kag pagsinarayo nga namat-an kang mga Karay-a.
Mga panugdaun parti sa libro:
Ang pagbaloskay ka dyang tinipon nga mga sinolatan ni Danny S. Tabuyan sarang ko ipaanggid sa baratyagun ka sangka tomanduk nga nagpanaw sa marayu kag bag-o lang nakaoli pagkatapos ka malawid nga panahon. Masadya nga nagapang-abiabi ang mga istorya, ang mga tinaga nagapangagda sa pagsalum liwan sa linaw ka kinaradto nga Kinaray-a. Ang mga istorya ni Tabuyan nagapadumdum kanatun liwan ka mga pagsinarayo nga ayhan atun run nalipatan. Gani dali, basahun ta kag mag-oli liwan sa atun banwa nga namat-an!
Maria Milagros C. Geremia-Lachica
Tagsolat, Ang Pagsulat Bayi
Isara sa mga ginakilala nga harigi ka litiratora Kinaray-a
Bohi ang mga sogidanun ni Danny S. Tabuyan gani kita nga mga manogbasa maganyat na nga magpasakup sa pagpangalipay, pagpangasubu, kag paghandum ka ana mga tinawo. Makita natun ang atun mga kaugalingun nga kabahin kang kalibotan nga ana ginpasad hay bisan makatiringala ang mga hitabo, mapapati na kita nga tanan dya sarang matabo sa atun kabohi. Nagapakita lamang dya kang pagkatimgas ni Tabuyan bilang manonolat sa Kinaray-a, nga sarang natun tanan mapabogal nga mga Karay-a.
Ritchie D. Pagunsan
Tagsolat, Yanggaw
Tagdaug, Carlos Palanca Memorial Awards for Literature kag
Writer’s Prize kang National Commission for Culture and the Arts
Diin pwidi makabakal:
Ang “Tabogi” sarang run mabakal sa Amazon.com kag mabakal man sa CAP Building, San Jose, Antique sa Disyembre 21, 2016 imaw sa paglunsad ka iba pa nga mga libro ka DK. Prisyo sa paglunsad: P500.
Ang “Tabogi” sarang run mabakal sa Amazon.com kag mabakal man sa CAP Building, San Jose, Antique sa Disyembre 21, 2016 imaw sa paglunsad ka iba pa nga mga libro ka DK. Prisyo sa paglunsad: P500.