Mga Istorya ni Tamawina
Ginsulat ni: Emmy L. Masola
Kadamulun ka libro: 176 ka panid
Dibuho sa tabon ka libro: Samantha Secular Tamesis
Ginbalhag sa: New York, USA
Ang "Mga Istorya ni Tamawina" ang pinakauna nga libro ni Emmy L. Masola, nga isara sa mga katapo ka Hubon ka mga Tagdumara (Board of Trustees) ka Dungug Kinaray-a Inc. Koliksyon dya ka mga sugidanun sa panurukan ka tamawo nga karakter nga ginpangaranan ni Masola nga Tamawina.
Halin sa pamuno ka libro:
Si Tamawina ang lagawan nga prinsisa ka mga tamawo nga wara ti pahuway nga nagalibot sa kalibutan para manipon ka mga istorya nga ana nasaksihan mangin sa kasiringan ka mga kapariho na nga tamawo kag pati sa ana mga pinanilagan nga pagsinarayo ka mga tawo. Amo nga ang mga sugidanun nga ginbalay, nagaumpisa sa ana ginharian kag nagatapos sa ana ka mga tawo, hay sa adlaw-adlaw nga tanan, mahambal natun nga bisan idalmunun si Tamawina, kaimaw natun tana sa atun palibot. Dyan lang si Tamawina, nagapanilag sa mga tawo para makahimo ka mga sugidanun nga makabulig magpaintyindi kon ano gid bala ang pinakaimportanti sa atun pagpangabuhi.
Mga panugdaun parti sa libro ni Masola:
Ang “Mga Istorya ni Tamawina” ni Masola nagahagad liwan kanatun sa pagbalik kag pagdumdum katong panahon kang atun pagkabata, kang kita may kakunyag nga nagahulat pagkatapos ka iyapon sa pagpamati sa sugidanun kang atun mga kaapuyan. Bukun ti kinaandan ang kalibutan nga ginapakita ni Masola. Ang manogbasa ginahangkat na sa pag-imaw tukad sa putok-putokan nga sarang malab-ot ka imahinasyon kag sa pagdulhog, may minsahi gid nga pabalon. Tamawo man ukon tawo ang ginasugid, ang dyang tinipon nga mga istorya ni Masola, nagapabutyag nga buhi ang tradisyon ka sugidanun.
Maria Milagros C. Geremia-Lachica
Manunulat kag mamalaybay
Isara sa mga harigi kang litiratura Kinaray-a
Kon maid-id nga basahun kag tun-an ang mga sinulatan ni Masola, matuipan nga pinasahi ang tima kag pagbalay na ka ana mga sugidanun. Madalum, kag kon kis-a marikot, ang pagturuk na sa mga butang kag hitabo nga nagakinahanglan kang maukud kag tul-id nga pagpangusisa. Sa ana pinakauna nga libro nga “Mga Istorya ni Tamawina,” matirawan natun mangabuhi sa kalibutan ka ana paminsarun, kalibutan nga buta kang kasubu, kalisud, kag kahadluk. Piro sa likod ka dya, mabatyagan man natun ang kapag-un ka anang pagtuo kag paglaum nga ang tanan mangin madinarag-un sa katapusan. Paagi sa maduagun na nga pagsaysay, sarang na mabihag ang atun paminsarun kag baratyagun. Ang dya nga libro pamatuod nga si Masola isara sa mga mabinungahun kag nagapanguna nga manunulat sa Kinaray-a.
Ritchie D. Pagunsan
Manunulat kag mamalaybay
Presidente, Dungug Kinaray-a Inc.
Diin pwidi makabakal:
Ang “Mga Istorya ni Tamawina” sarang run mabakal sa Amazon.com kag mabakal man sa CAP Building, San Jose, Antique sa Disyimbri 21, 2015 imaw sa paglunsad ka iba pa nga mga libro ka DK. Prisyo sa paglunsad: P500.