Ang Asawa ni Minho
Ginsulat ni: Linda C. Arnaez-Lee
Kadamulun ka libro: 150 ka panid
Dibuho sa tabon ka libro: Mary Rose Adelle Pacificar
Ginbalhag sa: Quezon City, Philippines
"Ang Asawa ni Minho" ang pinakauna nga libro ni Linda C. Arnaez-Lee, isara sa mga katapo ka Hubon ka mga Tagdumara (Board of Trustees) ka Dungug Kinaray-a Inc., kag nagaimaw ka mga binalaybay, panaysayun kag mamugu nga mga sugidanun. Dya nga mga sinulatanan ni Arnaez-Lee una nga ginbalhag sa DK wibsayt sa ispasyo ka anang painoino nga Kimchiland, kag kalabananan nagapakita ka anang mga inagyan sa pagpanglugayawun sa iba nga lugar kag ang anang pagpamana kag pagtukod ka pamilya sa Korea.
Bahul nga amot sa pagpaugwad ka literatura Kinaray-a ang una nga libro ni Linda C. Arnaez-Lee. Sa anang mga binalaybay, panaysayun kag sugidanun mabatian ang katigda kag kahagpok ka linggwahi nga puraw, tam-is kag tuduk sa tagipusuon. Mabatyagan ang kapagrus ka anang limug bilang sangka babayi kag Karay-a nga wara nagalipud-lipud, wara nagaisti-isti kag wara pag-ukru sa tunga kang kahidlaw, kasubu ukon kalipay. Malinung kon basahun ang anang mga tinaga piro, angay kang tarum ka binangon, nagakihad, nagapilas kag nagapukaw ka baratyagun. Kadarag-an dya ka mga Karay-a!
Ritchie D. Pagunsan, Manunulat
Presidente, Dungug Kinaray-a Inc.
Importante nga libro dya sa panulatan nga Kinaray-a tungud si Linda Arnaez Lee indi lang sangka babaye, kundi labi sa tanan sangka Antikenya. Ang mga sanaysay nagatugro kang panan-awan kang sangka Antikenya nga nahamulag sa anang lupa, maisug nga nagapanguyaput sa anang naandan nga pagsinarayo samtang ginabaton ang liwan kag bag-o nga kultura kang anang bana. Rugya natun makita ang kapag-un kang duna nga pamatasan kang Antikenyo sa global nga kahimtangan. Magapalapnag diya indi lamang kang panan-awan kundi kang limug nga Karay-a.
Alex C Delos Santos
Awtor kang Ugsad kang Kinaray-a