Paskwa
ni Arlene D. Nietes-Satapornvanit
Disyembre run. Man-an natun kon ano sayudon dya sa kalabanan kanatun. Sa Pilipinas, Septyembre pa lang, nag-umpisa run kita paminsar parti kadya. Ang pagselebrar kang Paskwa, ukon Krismas. Kuon gani nanda nga sa Pilipinas kuno ang pinakalawig nga selebrasyon kang Paskwa. Tuod gid man dya tungud pag-abot kang bulan nga may “ber,” daw medyo ramig run gawa kag mabatian run natun ang mga kanta nga pangpaskwa sa radyo. Kag nagaumpisa run kita ka pamutang kang mga dekorasyon sa sulud balay, sa mga dingding, gawang, kag bintana. Sa sagwa, ang mga opisina kag baraligyaan, pati run karsada, may mga dekorasyon man.
Ano ang imo napinsaran sa amo dya nga mga binulan? Sa ordinaryo lang nga panyimpo, daw kaduro lang ang aton mapinsaran parti sa Paskwa. Ang mga kabataan nagakakunyag tungud duro ang anda mabaton nga mga regalo kag wara ti klase. Sa iban, ilabi run gid ang mga ginikanan, nagapaminsar man kang garastuhon. Ugaring kon may mga hitabo abi parehas kang nagligad nga bulan nga may bagyo, ukon may iban pa nga mga kalamidad, makapaminsar kita nga daw masubu ang atun Paskwa sa amo nga tuig. Sakto bala dya nga paminsarun?
Nagakuon sanda nga ang Paskwa tyempo kang pagsinadya. Ugaring may nagabatyag man kang kasubu bisan Paskwa. Pwede ayhan mabatyagan nga dungan ang kasadya kag kasubu?
Matuod nga ang Paskwa tyempo kang pagkasinadya. Sa mga may pagtuo nga Kristohanun, nagasinadya kita tungud ginaselebrar natun ang pag-abot ni Hesu Kristo sa kalibutan bilang atun Manluluwas sa atun mga sala. Gani nga tana ang rason kon andut nagaselebrar kita kang Paskwa. Ang kasadya nga atun nabatyagan pwede natun mapautwas sa duro nga paagi - sa pagkanta, pagbasa kang pulong sa Bibliya, sa pagtiriripon kaimaw sa atun pamilya kag mga abyan, sa pagtugro kang mga pagkaun ukon regalo sa mga pigado, kag duro pa nga mga paagi.
Sa pihak nga bahin, mabatyagan man natun kon kaisa ang kasubu sa tunga kang pagsinadya. Ilabi run gid kon indi kumpleto ang pamilya. Ang mga ginikanan nga gusto makita ang tanan nanda nga mga kabataan, pati mga kaapuhan, makabatyag kang kasubu kon bukut kumpleto ang tanan. Parehas man kon sa marayu nga lugar ang mga pinalangga, halimbawa ang bana ukon asawa ukon mga bata, kag indi sanda makauli. Ukon indi gani, nagtaliwan run ang anda pinalangga kag ginadumdum ang mga nagligad nga pagselebrar kang Paskwa. May pagkahidlaw. May nagahibi.
Sa mga marayu sa anda pamilya, sa mga nagaisarahanun, parehas abi kanakun, mabatyagan man natun ang kasubu tungud nagaisarahanun lang kita. Ayhan sa lugar kita nga wara gid nagaselebrar kang Paskwa. Samtang nagakasubu, mabatyagan man natun ang kasadya kon makita natun ang mga pamilya sa atun palibot nga nagasinadya. Atun madumduman ang atun mga pinalangga sa Pilipinas nga nagatiriripon. Ang pagpamati kang mga kanta parti sa Paskwa makapukaw kang mga baratyagun nga kon kaisa makapahibi man kanatun.
Hindi natun paglipatan kon ano ang rason kang pagselebrar kang Paskwa. Bisan diin kita, nagaisarahanun man ukon kaimaw kang atun pamilya kag mga abyan, bisan nagakasubu kita ukon nagasinadya, bisan ano ang atun sitwasyon. Pinsarun natun nga ang Paskwa tion kang pagselebrar kang atun pagpasalamat tungud palangga kita kang Ginuo, kag ginhilway na kita sa atun nga mga sala. Ang kamatuoran nga dya ang makapakanta sa atun taguipusuon nga may pasalamat, kag makabatyag kita kang kahilwayan, paglaum, kag kalipay.
*Litrato: Halin sa http://sdes.dodge.k12.ga.us/blogs/pwiles/post/2010/07/Filipino-Parol