<![CDATA[DUNGUG KINARAY-A INC. - Handurawun]]>Sat, 04 Nov 2023 13:09:08 -0400Weebly<![CDATA[Laylay kang Kahapunanun]]>Tue, 24 Feb 2015 23:47:41 GMThttp://dungugkinaray-a.com/handurawun/laylay-kang-kahapunanun
Picture
Himo ni Raoul Monory halin sa http://www.secondshoutout.com/product/french-countryside-watercolor-c-1930


Laylay kang Kahapunanun
ni Ma. Aurora Salvacion J. Autajay


Laylay kang kahapunanun
Ang nanalagadsad sa kalinung,
Kag sa kahukaw ka panurugon
Ako ang ginbalik sa duag ka nagligad.

Bisan anhun ko man ayhan ka latas
Ang binayaan mo nga agi sa banas,
Indi ko gihapon maabot ka lagas
Kaangay ka pitik kang madasig nga oras.

Akun lamang ikumkumun
Sa matawhay nga paminsarun
Ang paglagsanay ka hangin kag mga dahon
Sa bukid, sa lupa, sa sulud ka tagipusuon.

Kon kauna ikaw ayhan ang nagtanum
Sa wara ko matalupangdi nga panahon,
Akun kar-on latasun ang madamul nga talon,
Anyun, pinasi ka alimodyas pinanggas mo kanakun.

Kag sa malagday nga pitik kang kasisidmun,
Gin-aha mo rosarito nga alimodyas, akun tahiun,
Mabalik ko gid lamang ikaw sa palad ka nagligad
Nga imong duyan, kag nabilin ko nga handong.
]]><![CDATA[Dupuy-Dupuy ka Nagligad]]>Tue, 20 Jan 2015 22:47:41 GMThttp://dungugkinaray-a.com/handurawun/dupuy-dupuy-ka-nagligad
Picture
Himo ni David Tripp halin sa https://davidtripp.wordpress.com/tag/prismacolor-watercolor-pencils/


Dupuy-Dupuy ka Nagligad
ni Ma. Aurora Salvacion J. Autajay


Daw kalas ka laya nga mga dahon
Sa mainanay nga dupuy-dupuy ka nagligad
Nga padayon nagalinagsanay sa akun painoino
Sa adlawun, sa paglabay ko sa bag-o nga kapitolyo.

Daw pira run ka adlaw ang nagligad
Nga nagapanumbalik ang lamharun ko nga idad
Daw sa marayu gid nagaparangdangat
Laktudun pa pira ka bukid kag dagat.

Mamingaw ang pagligad ka mga tinuig
Nga wara ikaw rugya sa akun kilid,
Tulalay kang kahapunanun lang ang nagapaumpaw
Nga daw busay ang hangin nga mabugnaw.

Di maisip mga baras kag yab-ok nagakarapalid
Sa hayskul bilding nga kadya, ana run ka kolihiyo,
Andut bisan sangkisra, wara gid kita magkitaay
Pagkatapos katong kasisidmun nga kita nagbulagay?

Nangin mahipus ang mga maya sa sanga ka langka
Nga ginakumkum ang pagkapung-aw kag akun kakagha,
San-o pa liwan ikaw akun maguraptan,
Sa mainit nga palad ka akun dughan?

Sa diin ta lamang tulad ikaw sagapun
Sa pinaw-pinawun nga uyahun ka kahapunanun,
Marayu pa ang tinaudan ka langit kag dagat,
Nakapagkit gid man bala ikaw sa badlit ka akun palad?
]]><![CDATA[Handurawun]]>Sun, 21 Dec 2014 05:14:53 GMThttp://dungugkinaray-a.com/handurawun/handurawun
Picture
Himo ni Vineesh Lal halin sa https://www.flickr.com/photos/vinulalart/5399887830/


Handurawun
ni Ma. Aurora Salvacion J. Autajay


Nagadapya ang mahipus nga mga limug ka daramguhanun,
Dupuy-dupuy gid lamang ayhan, piro gatublag ka baratyagun,
Bisan ang dughan gapakalinung run sa pirit nga pagkamingaw,
Sa mga mata, gausbong ang tun-og, sablig ka pagkapung-aw.

Naman-an ko nga wara kaw madura kag rugyan kaw gihapon,
Ukon naghalin kaangay ka mga pispis sa kahapunanun;
Hay ang kada tibok-tibok ka ginutlu ka mga sinigundo,
Nangin mabug-at kag makatiringil nga kalinung.

Nagasinggiyaw pati ang mga yab-ok nga nagkaaraplaag
Samtang ginasipad-sipad ko ang kada idlak nga gabanaag,
Sa alibutod ka udto-adlaw, daw tun-ugon mga bituon
Samtang gakabugtaw, gapanamgo ka handum nga hapuhapun.

Piro kataranhaga, daw usbong man gid nga indi maguraptan,
Nagadaplos lang, daw hangin kag ambon angay ka handurawan;
San-o pa liwan ikaw makita, bisan sa bituon gid lamang,
Agud ang nagkarapadpad, manumbalik sa dughan ka handumanan?
]]>