<![CDATA[DUNGUG KINARAY-A INC. - Mga Handumanan sa Sityo nanday Lola kag Lolo]]>Sat, 04 Nov 2023 13:09:48 -0400Weebly<![CDATA[Pangalaba]]>Fri, 30 Jan 2015 02:27:34 GMThttp://dungugkinaray-a.com/mga-handumanan-sa-sityo-nanday-lola-kag-lolo/pangalaba
Picture
Halin sa http://www.wallcoo.net/paint/dream/html/wallpaper47.html


Pangalaba
ni Norman T. Darap


Sa mabuhay nga tion
ako nagapangampo
ka dyang distansya
ka imo pagparayu
pautay-utay nga ginapanas
ang tanan nga laragway
ka gugma sa akun
dughan kag hunahuna.
Sa urihi
indi ko gusto masapwan
imaw ka dyang kapaslawan.
Kon daad
antis mo ako ginbayaan
gintudluan mo ako
ka paghigugma
nga wara ginasagap ang imo
mga hakus kag haruk.
Gugma nga wara nagakahidlaw
sa imo maambung
nga nawong kag yuhum.
Kag labaw sa tanan,
daad gintudluan mo ako
ka paghigugma
nga indi ako pag-uhawun
sa imong pag-alaw-alaw kanakun
padulong sa kahimayaan
ka utog sa kagab-ihun.
]]><![CDATA[Pamangut]]>Sat, 27 Dec 2014 06:12:11 GMThttp://dungugkinaray-a.com/mga-handumanan-sa-sityo-nanday-lola-kag-lolo/pamangut
Picture
Himo ni Chris Carter halin sa https://chriscarterart.wordpress.com/2012/04/16/


Pamangut
ni Norman T. Darap


Ramig pa ang dapya ka hangin sa aga
Pay ginpirit ko run magbangon
Imnan lang ka mainit nga kapi
Ang akun nagaraguok nga busong
Hay ikaw gahulat run,
Mas nairaban sangsa kanakun,
Nahidlaw sa paghapuhap ko sa imo likod
Kag sa imo matunog nga inga
Nga pirmi kanakun gaalaw-alaw.

Buy-an ta kaw sa pagkalawig
Kag imaw ta mapanaw sa aragyan
Nga amat-amat pa lang
Ginaladladan kang kasanag.

Kaptan ko ti mayad
Ang pisi nga gatabid kanatun
Para ikaw indi makabuhi.

Pag-abot sa wayang
Paharabun ta kaw asta mabusog
Kag antis kita mag-uli maagi sa turugban
Kag pagustuhan ta kaw magtusmog
Sa mabugnaw nga lauhan
Para maghagan-hagan
Ang imo kapaang nga nabatyagan.

Daad amo man dya kahapus
Ang paghigugma sa akun babaan,
Buraan, parayamo nga asawa
Ang wara kabudlay nga
Pagpamangut kada aga
Kon sa diin ang kahagugma
Tawhay nga magaugyon kanimo,

Sa pag-imaw sa matag-adlaw
Nga wara ti riklamo
Wara ti raku nga ginapangyo
Kondi ang imo sarang matugro.
]]>