<![CDATA[DUNGUG KINARAY-A INC. - Kita Mangunguma]]>Sat, 04 Nov 2023 13:09:24 -0400Weebly<![CDATA[Dalan]]>Thu, 26 Feb 2015 23:59:55 GMThttp://dungugkinaray-a.com/kita-mangunguma/dalan
Picture
Himo ni Jim Oberst halin sa http://jimoberst.blogspot.com/2012/08/the-road-to-tywyn-original-watercolor_2.html


Dalan
ni Gil S. Montinola


Kon dalan ang kabuhi
Indi ako magpakuri-kuri
Hay gusto ko magtalang sa mga lugar
Nga rugto ako makabinag-binag paminsar.

Agud mahangpan ko ang kabudlay
Sa akun nga pagpahuway-huway
Kag ang tarakladun masarangan
Kag ang pag-antos maagwantahan.

Sa mga indi ko maandan nga dalan
Ang makabunggo indi mapunggan
Magtanum ka yuhum sa inagyan
Tul-id mamunga kang kalipayan.

Basi pa lang makakita ako
Ka akun surugatun rugto
Kag tipunon ko ang tanan ko nga naman-an
Hagadun ko maobra banas agud mahuman.
]]><![CDATA[Hay man Ako Nagapalangga]]>Mon, 26 Jan 2015 21:13:19 GMThttp://dungugkinaray-a.com/kita-mangunguma/hay-man-ako-nagapalangga
Picture
Himo ka Mazzy Blue Studios halin sa http://www.whenigrowupcoach.com/2012/06/06/start-up-dont-break-up/


Hay man Ako Nagapalangga
ni Gil S. Montinola


Buta ang imong bag,
ako takun nagadara ka bug-at
ka baratyagun.
Bayaan mo run ako.
Tanan gindara mo
sa imo nga pagpanaw.

Samtang nagahulat
kita ka iroplano
nga madara kanimo
parayu kanakun,
madasig pa sa mga kahig
nga nagadinali-dali
ang kubakuba
ka akun dughan.

Mapanaw run ako,
hambal mo.

Haruk ang akun ginsabat
kag ikaw dayon ang nagpanaw.

Wara run ako nagbalikid.
Ginbitbit mo ang tanan
kag dar-un ko pag-uli
ang kasubu.
Ginatamad ang akun kahig
sa pagpanaw.
Wara ko run nabatian kag nakit-an
ang pagrayu ka iroplano
hay ginburon ka luha
ang akun panurukan.
Hulatun ko ikaw,
palangga.
]]><![CDATA[Kon Akun Balikan]]>Mon, 22 Dec 2014 05:39:31 GMThttp://dungugkinaray-a.com/kita-mangunguma/kon-akun-balikan
Picture
Himo ni Skip Allen halin sa http://www.wolfbanestudio.com/blog/?p=53


Kon Akun Balikan
ni Gil S. Montinola


Kang mga bata pa kami
ka akun mga pakaisahan,
nagatipon kami sa taramnan
kon masanag ang bulan.
Nagasipal kami. Sa kagahud namun,
indi run batiun ang mga sirumsirum
hay nalunod ang anda kanta
sa amun kadlaw kag harakhak.
Ginasul-an kami ka bulan
kag mga bituon.
Amo dya ka una.
Tulad, wara run sanda.
Tulad nga sanag ang bulan,
rugto sanda sa iba nga pungsod
nagapalunod sa kasanag ka syudad.
Indi ko run sanda malab-ot
para sanda duman ang magbantay.
Indi ko run mabatian
ang anda mga kadlaw kag harakhak.
Pariho ayhan ang sanag
ka bulan kag igpat ka bituon
rugto sa kon diin man sanda tulad?
Tulad nga sanag ang bulan
dumduman ko ang tanan
asta ang mga bangag sa taramnan.
]]>