<![CDATA[DUNGUG KINARAY-A INC. - Kay J]]>Sat, 04 Nov 2023 13:09:17 -0400Weebly<![CDATA[Kay J, nga Gamayan Ko lang Ginpalangga I]]>Wed, 25 Feb 2015 23:53:20 GMThttp://dungugkinaray-a.com/kay-j/kay-j-nga-gamayan-ko-lang-ginpalangga-i
Picture
Himo ni Mary Ellen Golden halin sa http://www.thegoldengallery.com/collections/mother-s-day-gift-ideas/products/cardinals


Kay J, nga Gamayan Ko lang Ginpalangga I
ni Elsed S. Togonon


J, darwa run ka simana ang nagligad
Sa banta ko, kinanglan nanda maman-an
Ang imong istorya. Ang atun istorya.

May katanhagaan ang tag-irinit
Kang gulpi mo ako ginpamangkot
“Taga-diin ikaw?”
May kaisug ang kapaang
Dungan sa pagbayluhanay
Ka atun mga tinaga.
Abril kato, kang imong gin-
Dihon ang sangka sugidanun
Nga akun gin-abi-abi
Patas kang imong pagpadayaw
Ka koliksiyon mo ka mga libro
Ni Haruki Murakami.
]]><![CDATA[Alyssum]]>Sun, 25 Jan 2015 00:33:06 GMThttp://dungugkinaray-a.com/kay-j/alyssum
Picture
HImo ni marisss-shonen-ai halin sa http://marisss-shonen-ai.deviantart.com/art/girl-face-practicing-watercolor-317633561


Alyssum
ni Elsed S. Togonon


Darayawun kaw nga gintunaan bulak nga maamyun
Sa pagbuskag ka imo bokol, nagkunup ang iwag sa kalibutan.
Duag rosal, kanaryo ang imo sipad nga daw mga ipot-ipot
Sa lunhaw nga kagurangan ilahas sa mariit nga kabukidan.
Ang imong dahon daw alima ka diwata ka taliambong
Handa magbulong sa tagipusuon ka layaw nga naudum.

Malum-uk nga karaptan ang maniwang mo nga paklang
Daw yuhum ka sangka lin-ay sa soltiro nga naluyagan.
Mabilin lang dya bala nga sangka gintunaan
Ang imong kaambung nga sa handurawan ko
Gid lang mahimo higugmaun?
]]><![CDATA[Sa Daraga nga Nagtiklod Kanakun]]>Tue, 25 Nov 2014 18:22:15 GMThttp://dungugkinaray-a.com/kay-j/sa-daraga-nga-nagtiklod-kanakun
Picture
Himo ni Connie Chadwell halin sa http://www.dailypainters.com/paintings/240611/Tango-Memory-original-oil-pastel-figurative-painting/Connie-Chadwell


Sa Daraga nga Nagtiklod Kanakun
ni Elsed S. Togonon


Nagapangayo ako kanimo pasaylo
kang ginpasugtan ko ang akun kaugalingun
nga itiklod mo. Bisan mahinay lang to
nga salapay sa abaga, baskug ang papa
nga nagpadaghub ka akun dughan.

Nagkunyag ang akun kalawasan,
nabusalan ang akun baba.
Kadya, ginakalangkagan ko gid daad
nga liwat ko mabatyagan ang pagduut
ka imong palad sa akun abaga.

Basta indi kaw dayon magpalagyo
patas kang pagpalagyo mo kato.
Hay daan kang gintiklod mo ako,
gintiklod mo man ang akun tagipusuon
nga maghigugma kanimo.
]]>