<![CDATA[DUNGUG KINARAY-A INC. - Ang Pagrara kang Kinabuhi]]>Sat, 04 Nov 2023 13:09:01 -0400Weebly<![CDATA[Padayaw]]>Sun, 22 Feb 2015 01:32:42 GMThttp://dungugkinaray-a.com/ang-pagrara-kang-kinabuhi/padayaw
Picture
Himo ni Karen Winters halin sa http://www.karenwinters.com/pages/pasadena.html


Padayaw
ni Jessie M. Valenzuela


Bulawan sa bola gasiling
Nahulog bilog nga bangkiling
Sintimos ginpakiling-kiling
Katam-is ang yuhum ni Manding.

Ginkuti nga handum sa baras
Kapigaduhon ikaw mapintas
Tuba sa banga gaawas
kahambugan unay sa lawas.

Balay nakapusok sa koron
Ibos sa dahon ibaruron
Linti nagtalang sa talon
May anting-anting ako nga balon.

Bag-ang nga simintado
Laway tagtatlo piso
Isug hapus gid ibaylo
Libri kadya ang patyo.
]]><![CDATA[Pagpuspos]]>Wed, 14 Jan 2015 22:49:17 GMThttp://dungugkinaray-a.com/ang-pagrara-kang-kinabuhi/pagpuspos
Picture
Halin sa http://www.wallcoo.net/paint/dream/html/wallpaper39.html


Pagpuspos
ni Jessie M. Valenzuela


Ihabul ang balsa sa pagpanakayun
Mauli dun ang bahoy sa talon
Ang hilo sa lawas itabon
Paghinulsol amo lang ang balon.

Kalipay indi mabugkus
Oras sa kalibutan timprano nahimus
Kabuhi wara’t baligya nga pinutos
Ang sindi ka sulo amat-amat naubos.

Paglaum ginbayaan magabot
Ang kuron nga bulawan nabuslot
Natubuan ka madamul nga uhot
Binurambud ang siit sa palibot.

Daw wara’t katapusan ang gabii
Lawas nga ginpusta napyirdi
Nag-abot ang katapusan ka byahi
Sa langit wara run ti tyanggi.
]]><![CDATA[Pangabay]]>Thu, 20 Nov 2014 18:16:47 GMThttp://dungugkinaray-a.com/ang-pagrara-kang-kinabuhi/pangabay
Picture
Himo ni Elizabeth Que-Bato halin sa http://filipinowomenforart.blogspot.com/2012/04/asean-exhibit-part-i.html


Pangabay
ni Jessie M. Valenzuela


Ang balay ko kulang run ang bintana
Karton lamang kadya ang atup sa tunga
Kada papangayo mo bay akun ginbaligya
Amo ko ikaw karia ka palangga.

Hambal mo kanakun ikaw may damgo
Gusto mo mag-iskwila sa John B. Molo
Bisan nasaid dun sinuptan ko sa bangko
Ginprinda ko ang kanipaan para lang kanimo.

Ang mga tinuig dasig nga naglupad
Napud-is man ka panglaba ang akun mga palad
Gali kato wara takun run kamaradmad
Ang handum mo gali amat-amat man nga naglubad.

Bisan ako imo run nalipatan
Pagpalangga ko kanimo wara’t katapusan.
Kon ang tanan puro lang kabutigan
Ikaw akun gihapon pagaunungan.

Daw malumpat gid ako sa sobra ka kalipay
Kang nabatian ko nga maobra ikaw run sa baybay
Abi ko sa barko ikaw magasakay
Tagalimpiyo kaw man lang gali ka mga salabay.

Sa pira ka tinuig nga ako ginpapati
Hambal mo mga makina ang inyo ginakuti
Gali ang manggad ko nga imo ginkali
Ginpangpanagtag mo lang kada gabii.

Gani sa atun liwat kadya nga pagkitaay
Lihog man ako pamatii anay
Bwasdamlag mo diparaha run ay
Gabuk dun bay ang lawas ka imo Nanay.
]]>