<![CDATA[DUNGUG KINARAY-A INC. - Pangabuhian sa Kaumahan]]>Sat, 04 Nov 2023 13:10:13 -0400Weebly<![CDATA[Panangkong]]>Wed, 04 Feb 2015 01:56:08 GMThttp://dungugkinaray-a.com/pangabuhian-sa-kaumahan/panangkong
Picture
Himo ni Jill Stefani Wagner halin sa http://www.jillwagnerart.com/artblog/page/140/


Panangkong
ni Rejie A. Talagtag


Lauhon ang taramnan, sigi lang ang sarub,
Sa tarum ka sanggut, ginakutul kada ugbos.

Ay! Pisti nga linta nagdukut pa sa batiis,
Dalia kag ibul-a, libaga, ipatya!

Antusa lang katul ka tubig, ang sako nagagabang,
Ikaw ang malaun kag ako ang maapan-apan.

Kon magbakal si Tiyay, isukta ka otso,
Balik ta liwat rudya, sa rum-an sa hapon, mga alas-kwatro.

Naman-an ko, Toto, ang imo ginapinsar,
Indi ikaw manghakruy, pigado kita bay.

Kon magbata ang baboy nga ginpatakalan
Ibaligya ta ang idik, ibayad sa imo iskwilahan.

Wara man ako, Nay, nagariklamo,
Naluoy lang ako kay Tatay kag kanimo.

Kon daad si Manong wara dayon nangasawa,
Nakabulig tana sa akun pag-iskwila.

Ang magurang mo indi run pagbasula,
Wara kita it may mahimo, amo to ang gusto na.

Maghimakas lang kaw kag magtuon
Para sa urihi manami ang imo paraabuton.

Sigi, Nay, ah, promisa ko kaninyo,
Kon ako makatapos, sa kapigaduhon akun kamo butwasun.
]]><![CDATA[Pangaray]]>Sat, 10 Jan 2015 07:00:25 GMThttp://dungugkinaray-a.com/pangabuhian-sa-kaumahan/pangaray
Picture
Himo ni http://images.1233.tw/watercolor-landscape/


Pangaray
ni Rejie A. Talagtag

 
Dalia run, Manding, maagto kita sa gahit
Kuon ni Iyay duro rigto laya,
Madiritso ta dayon sa Libuton
May mga natumba rigto nga nipa, atun itapsun.

Ay! May nasiplatan ako nga bilin ka sinasahan
Atun ria tipunon, ang sako ibuksan,
Pamuruton kag dayon ibutang sa surudlan
Kon wara pa mapuno, kinanglan dugangan.

Indi paglipati magdara paklang ka nipa
Himuon ta pipis kag mamawod sa ingud ka sapa,
Nahambalan mo run gali ang imo nga banahun
Magtapas ka kawayan para sa parawdan, dapat na tapuson.

Wara lang buhay ba, mainit dun ang sirak ka adlaw
Maamat-amat ta uli dalia sa pagpanaw,
Kon ikaw ginagutum, sa tyanggi maghapit
Mangutang ka lamayo kag mantika nga sangkidit.
]]><![CDATA[Pangahoy]]>Wed, 19 Nov 2014 18:14:09 GMThttp://dungugkinaray-a.com/pangabuhian-sa-kaumahan/pangahoy
Picture
Himo ni John Pirnack halin sa http://fineartamerica.com/featured/trail-through-the-woods-john-pirnak.html


Pangahoy
ni Rejie A. Talagtag


Nonoy, pagbugtaw dun, nagasirak dun ang adlaw
Magbahaw ka duro kag maghigup ka sabaw,
Ang imo nga binangon ibugkus sa hawak
Kay-ada nga indi batiis mo ang mapihak.

Pagdara ka kalat, atun kar-on ibugkus
Balon ikaw ka tubig, basi uhawon ta sa ubus,
Kag indi paglipati, ang mani nga bandi
Amo lang daan ria, sa gutum natun makapyirdi.

Gamaun ko ang kawayan kag itulod panaog
Lagisi kag utda, himuon ta ria nga salug,
Itapsa ang natumba nga puno kag indi ang imo butkun
Hinali gani masulayan kumpol nga alima imo abuton.

Darwa ka bugkus nga biris-akun kag panggatong sa sinun-ad
Pas-ana lang ang madara mo basi ikaw magliad
Guyuda dayon ang laya nga karay
Ipaamak ta sa tinig-ang pag-abot sa balay.

Magbahul ikaw, Nonoy, indi ako pagsunda
Pangahoy ang pangabuhian kag wara gid it ibida,
Ang armas mo nga lapis matarum pa sa binangon
Duro ang imo malab-ot basta ikaw magtuon.
]]>