Pantat sa Dalaag
ni Mark Anthony Q. Orquejo
“Tay, maagto ko anay sa pihak balay. Masipal kami ni Istang,” lisinsya ni Berning kay tatay na.
“Sigi! Uli kaw antis magtag-irigma, ha? Wara ti matig-ang,” padumdum ka tatay ni Berning.
“Sigi tay, ah!”
Kag dalidali nga nagpanaw si Berning paagto sa balay nanday Istang.
“Mig, dali! Mapadalaag ta, manalog ta to ka pantat. Kita ko kaina ang nagabantay ka dalaag paagto sa syudad. Dasiga samtang aga pa,” pamirit nga agda ni Berning kay Istang.
“Garing, Migs, basi madakpan ta. Rayu pa to nga daan,” may pangduha-duha nga sabat ni Istang. “Makaraan kaw pa gid ni tatay mo,” paaman na pa.
“’Sigi lang bla mabalik man ta dayon,” pamirit ni Berning.
Sa sigi nga pamirit ni Berning kay Istang, nagpasugot run lang ang sara kag nagdalidali sanda agto sa dalaag. Samtang nagapanaw paagto sa dalaag, naagyan nanda ang taramnan nga duro ang mga sio-sio. Nalingaw sanda ka pamuksi asta nga nagtaas run ang adlaw.
Alas-onsi imidya kag ang tatay ni Berning nagalaaw run sa karsada sa paghulat kay Berning nga magtig-ang. Nag-abot ang alas-dosi kag nagdangat sa ala-una, si Berning wara gihapon nakaabot.
“May ana gid dya kar-on mag-abot ang bata nga dya mong,” kirimudon ka tatay ni Berning.
Sa pihak nga bahin, sanday Berning kag Istang nakaabot gid man sa dalaag. Ang andang plano nga mamantat natuman gid man. Bangud wara sanda ti dara nga lambat ukon pukot, ang andang mga bayo ang gingamit nanda para masiud ang mga pantat.
Matapos ang pira ka oras, bisan nga buta ka lao ang mga itsura nanday Berning kag Istang, nagabanaag man ang andang mga unto sa pagngirit sa kalipay hay duro ang nabuul nanda nga mga pantat. Kag dugang pa, may pinutos pa sanda nga mga sio-sio.
“Dali, Mig, mauli run kita. Midyo dulum run. Basi maabot run ang nagabantay ka dya, indi run dya kar-on mapuslan ang mga pantat,” kuon ni Istang sa amigo.
“Sigi, Mig! Basi ginasagap run ako sa balay,” sabat ni Berning. Wara na gid madumduman nga dapat mauli tana antis mag tag-irigma hay ginsugo tana ni tatay na nga mag tig-ang. Pantat kag sio-sio lang ang sulud ka anang paminsarun.
Sa andang pag panaw pauli, nasug-alaw nanda ang manogbantay ka dalaag.
“Diin kamo halin, mga Toto?” Bugno ka manogbantay.
Sa kakulba ka darwa, daw nangin tuod run lang sanda. Indi kamaan kon ano ang isabat. Piro si Berning, bangud sa kahadluk na nga basi madakpan sanda kag bawiun ang mga pantat nga anda ginsalog, nangisug nga nagsabat.
“Nanalog kami sa sapa, Nong. May sio-sio kami dya, gusto mo?” madasig nga sal-ut ni Berning.
“Aw! Abi ko rugto kamo nanalog sa dalaag. Ti, taw-i ta abi ka sio-sio nyo daw namit ra haw. Diritso run dayon kamo uli hay basi magab-ihan pa kamo. Duro pa man daan man-ug sa taramnanan,” hambal ka manogbantay sa darwa. “Daw sa mga mabuut man kamo nga mga bata. Sa sunod agto kamo liwat rugya. May dalaag ako nga ginabantayan. Libri kamo rugto ka panalog basta may baylo nga sio-sio. Pwidi man ra?” paaman ka manogbantay.
Nagturukay anay si Berning kag Istang antis makasabat sa pang-imbitar ka manogbantay.
“Sigi, Nong, ah. Pwidi gid, ih!” dungan nga sabat ka darwa.
Kang naglumbos ang manogbantay, nakaginhawa kang masulhay ang darwa.
“Baw! Ikian lang gid, Mig, ba. Mayad lang gid nakalusot ta. Daw nakunsinsya man ko ba. Kon naglisinsya ta guro, basi ginpasugtan na man kita manalog sa dalaag nga ginabantayan na. Naumid pa tana ang wara’t labut nga sapa. Mayad lang gid may sio-sio kita,” midyo nakunsinsya nga kuon ni Berning.
“Sa sunod, Mig, sa tamburong run lang ta manalog ka pantat, ah. Gatubo nirbyos ko kon sa dalaag ta ka iba manalog,” sabat ni Istang.
Nagpadayon ang darwa sa pagpanaw pauli. Samtang nagarapit run sanda sa andang mga balay, ginhururay nanda ang pantat kag sio-sio.
“Sigi, Mig, sa sunod pa gid, ah. Kitaay lang ta sa rum-an. Malagaw lang ko to sa balay nyo,” bilin ni Berning sa amigo.
Pag-abot ni Berning sa andang balay, nakita na si tatay na sa gawang nga may bitbit nga paklang ka niyog. Sa pagkakita ka dya ni Berning, gulpi na nadumduman ang bilin ni tatay na kaina nga matig-ang para sa igma. Gulpi nakabatyag kang kulba si Berning nga sobra pa sa ana nabatyagan kang magsug-alaway sanda kaina ka manogbantay ka dalaag.
Mahinay nga nagdiritso si Berning paagto kay tatay na para magbisa. Sa anang pagbisa nabatyagan ka tatay na nga nagakudug ang alima ni Berning.
“Diin kaw halin, To? Man-an mo kon ano oras run dya? Rayu-rayu gid gali ang balay nanday Istang? Tingala ko man nga kitaun rugya kanatun. Andut buta kaw ka lao haw?” pang-usisa ka tatay ni Berning.
Sa kahadluk ni Berning sa paklang ka niyog, nagsugid tana ka tuod samtang nagaduko kag nagapisngu-pisngu.
“Nag-agto kami sa dalaag ni Istang, Tay. Nahapunan kami,” dayon na dawo ka sinalugan nga pantat.
“Bah! Dragkul ba!” hambal ka tatay ni Berning. “Sakto gid dya may dapli ta sa yapon.”
Nahangyus si Berning sa anang nabatian. Abi na mabakulan tana ka paklang ka niyog.
“Sigi, parigos run to kag magtig-ang. Ako run lang maraha ka pantat nga dya,” sugo ka tatay ni Berning.
Tuman nga kalipay ang nabatyagan ni Berning hay naluwas tana sa piligro ka paklang ka niyog tungud sa pantat nga ginsalog nanda sa dalaag ka iba.
“Sigi, Tay, marigos lang ko kag magtig-ang,” kalmado nga sabat ni Berning sa tatay na.
Magdason nga adlaw, nag-agto liwat si Berning sa balay ni Istang.
“Ti, Mig, ginbakol kaw ni Tatay mo?” lagi-lagi nga pamangkot ni Istang.
“Baw, swirti gid, Mig! Wara,” nagangisi nga sabat ni Berning. “Ginluwas ako ka pantat! Man-an ko run kon ano dapat ta himuon kon magab-ihan ta uli. Sa sunod, Mig, tilapya ruman salugon ta.”
“Tsk, tsk, tsk. Daw sa wara lang madudla,” pang-ulung-ulung nga sabat ni Istang.
Nagligad ang pira ka adlaw, samtang nagapanaw pauli si Berning halin sa balay nanday Istang, nakita na sa andang balay nga may bisita si tatay na. Nagapungko sanda sa dalum ka haron ka langka kag nagaistoryahanay. Likod lang ka bisita ang makita ni Berning gani nagparapit tana para magbisa. Kang namulalngan na ang itsura ka bisita, gulpi lang nagparamahul ang anang mga mata kag nagparangramig sa kulba. Ang manogbantay ka dalaag!
Wara ka limug si Berning pagkatapos na bisa. Nagtindug lang tana nga daw tuod sa atubang ni tatay na kag ka bisita.
“Ah! Ikaw to ang nagtugro kanakun ka sio-sio, no? Diin tana run ang imaw mo?” bugno ka bisita.
“Ahm … ahmm … rugto sa pihak balay, Nong. Rugto gani ako halin kananda,” utod-utod nga sabat ni Berning tungud sa kakulba.
Dalidali nga ginsugo si Berning ni tatay na nga mabakal kang kapi kag bwiskit para ipamahawun ka andang bisita. Pagkadawo ni Berning kang kwarta dayon na paspas dalagan diritso sa balay ni Istang.
“Mig! Mig! Tapos gid ta. Rugto sa balay ang manogbantay ka dalaag nga ginsalugan ta. Basi bla ginsugid na ta kay Tatay haw?” saysay ni Berning nga ginahapo.
“Ay, ti, tapos ta gid, ih. Kun-an kaw gid nga sa tamburong run lang ta manalog mong. Basi ipapriso na kita kato,” ginakulbaan nga sabat ni Istang. “Ti, ano himuon ta kadya bay? Sikag run lang to ang bilin sa pantat nga ginsalog ta. Ibalik ta pa to?”
“Bahala run dya, Mig. Patay kon patay, ah. Dali imawi ko anay mabakal ka pamahaw para sa gintakawan ta ka pantat,” panghagad ni Berning sa amigo.
Nag-imaw si Istang bakal ka pamahaw kag dayon man nagtawas paagto sa balay nanday Berning. Rugto ginhanda nanda ang pamahaw kag nanilag sa istoryahanay ka tatay ni Berning kag ka bisita. Sa sigi-sigi nga istorya, daw nagkalma ang darwa ka bata hay wara sanda nakabati ka parti sa pantat. Bisan paano wara pa sanda nabutang sa piligro ka paklang ka niyog kon madakpan gid man sanda.
Matapos ang pira ka oras nga istoryahanay nadura ang kakulba nga ginabatyag ka darwa ka bata. Rapit run lang maubos ang kapi kag biskwit, amo nga sikrito nga nagakasadya ang darwa hay rapit run lang maghalin ang bisita. Makalusot liwat sanda sa pangarwa nga bisis.
Manogtapos run daad ang istoryahanay ka tatay ni Berning kag ka bisita kang gulpi nag-abot ang tatay ni Istang nga may bitbit nga pantat. Pagkakita lagi nanday Berning kag Istang kang ginabitbit nga pantat, pinamalhas sanda ka ramig. Nagtalang-talang sanda kon ano ang himuon. Imbis nga mauli run daad ang bisita, nagpungko liwat dya kag mag-istorya sa mga tatay ka darwa ka bata.
“Baw! Daw gasuog man tana tatay mo, Mig. Nagdara pa ka ibidinsya,” pamasol ni Berning kay Istang.
Nag-umpisa run ka istoryahanay ang tatlo kag sakto nga natuon gid sa pantat nga dara ka tatay ni Istang. Nagparamuti gid ang mga itsura nanday Berning kag Istang.
“Diin mo ra, Pre, ginbakal ang pantat mo?” pamangkot ka tatay ni Berning sa tatay ni Istang.
“Ginlibud lang dya, Pre. Gapanapsap ko ka kahon kang nag-agi ang manoglibud ka pantat. Midyo barato, amo gani ginbakal ko run lang para may darapliun kami kar-on sa yapon,” sabat ka tatay ni Istang.
“Ay, daad wara run lang kamo nagbakal kara,” sal-ut ka andang bisita. “May dalaag ako nga ginabantayan rugto sa taramnan, kon gusto nyo magbuul libri lang. Banta ko tultulan man dya ka mga kabataan nyo. Nakita ko sanda kang nagligad nga nga adlaw rapit sa dalaag nga ginabantayan ko. Pwidi sanda rugto ka agto para manalog ka pantat.”
Nalipay ang darwa ka tatay sa nabatian nanda nga mayad nga balita kag wara run nangduha-duha nga mangindi.
“Salamat gid, Pre. Sigi, ipatawsun run lang namun ang mga bata kon mag-uli kaw kar-on para makapanalog ka pantat,” dugang ka tatay ni Berning.
Wara ti tinimuk-timuk sanday Berning kag Istang. Blangko man sa gihapon ang andang paminsarun sa sobra nga kakulba. Kapira pa sanda ka bisis tawgun antis makabati kag ginhambalan nga matawas sa bisita pauli para makabuul sanda ka pantat. Nagtango-tango lang ang darwa nga daw mga lipung.
Kag kang natapos ang istoryahanay, nag-uli ang bisita imaw ang darwa ka bata. Sa andang pagpanaw, wara gihapon nagatimuk-timuk ang darwa. Hipus lang sanda nga nagasunod sa manogbantay ka dalaag.
“Sa diin kamo namuksi ka sio-sio, mga Toto?” pamangkot ka manogbantay. “Pwidi ta kahapit para mamuksi liwat?”
Laimnan ang pangginhawa ni Istang kag makita gid nga ginakulbaan, gani si Berning run lang ang nagsabat kag nagtugro ka diriksyon kon sa diin ang burul-an ka mga sio-sio.
“Baw! Duro-duro gali dya ra?” Malipayun nga hambal ka manogbantay. “Pwidi ako dya kara makabalik liwat para mamuksi?”
Gusto ni Berning nga si Istang ang masabat gani ana dya ginkudot sa kilid. Gulpi natapungawan si Istang kag dayon na sabat: “Ahhhm … sigi, Nong. Piro bukut dya garing amun ang sio-sio.”
Nagyuhum lang ang manogbantay kag nagkuon, “Sigi, ah, malisinsya lang ko sa tag-iya kon magkitaay kami. Ti, dali run kamo, madiritso kita sa dalaag.”
Pag-abot sa dalaag, ginbuligan sanda ka manogbantay ka panalog ka pantat. Duro ang andang nabuul kag ginbutang dya sa darwa ka surudlan.
Samtang ginabutang ka manogbantay ang isda sa surudlan, nagparapit si Istang kay Berning kag naghani-hani. “Mig, mayad pa guro isugid ta run lang ang tuod kon diin ta gid man ginbuul ang pantat nga to bay para indi run ta pagkunsinsyahun. Hay basi magbisita pa gid dya sa balay nyo, di gani sa balay pa gid namun. Amo man atun nga batyag ka kulba kato. Ti, ano, Mig?”
“Sigi, Mig. Mayad pa gid man isugid ta run lang. Ti, ikaw masugid?” pamangkot ni Berning sa amigo.
“Andut ako haw? Ikaw man bay nanghagad kato. Ikaw sugid, ih. Imo man to plano,” rason ni Istang.
Wara ti nahimo si Berning kondi pangunahan ang pagsugid ka tuod sa manogbantay.
“Nong! Nong, may hambalun daad kami kanimo.”
“Nga rugya nyo ginbuul ang pantat kag bukut sa sapa?” madasig nga sal-ut ka manogbantay kag dayon yuhum. “Man-an ko man nga rugya nyo to ginbuul hay wara rugya ti sapa. Indi kamo magkabalaka, ah. Indi ko kamo pagsugid sa mga tatay nyo. Sio-sio run lang to ang baylo ka pantat nga ginbuul nyo rugya. Patas run ta. Sa dason, kon gusto nyo manalog rugya, lisinsya lang kamo. Pwidi gid kamo ka agto rugya basta dara lang kamo ka sio-sio.”
Sa nabatian nga sabat ka manogbantay ka dalaag, nagsanag ang mga itsura ka darwa ka bata nga daw nakahaklu ka lab-as nga hangin. Nangako ang darwa nga indi run nanda pagliwatun ang indi sakto nga ginhimo. Rugto, nag-amiguhay sanda nga tatlo ka manogbantay ka dalaag.
Nag-uli sanday Berning kag Istang nga mag-an ang pamatyag bisan mabug-at ang ginabitbit nga surudlan ka pantat. Masadya nga nagpanaw pauli ang darwa ka bata. Sa pihak ka andang tuman nga kakulba nga basi madakpan, nga ginlaktan kang kaalwan ka manogbantay ka dalaag, nakabaton sanda ka bahul nga kahuya sa kapaltahan nga anda nahimo. Natun-an nanda nga dapat maglisinsya sa tag-iya kon ano man ang mga butang nga gusto nanda bul-un ukon huramun. Ang pagpamuul nga wara nagalisinsya, sangka sahi ka pagpanakaw nga pwidi makatugro ka piligro.
Pagkagabii, nag-agto sanday Berning kag tatay na sa balay nanday Istang kag rugto nagyapon. Inasal kag ginat-an nga pantat ang andang dapli. Nanamitan gid sanday Berning kag Istang sa dapli. Mas manamit pa sa pantat nga tinakawan. Mas namit ang sabor ka tinugro sangsa tinakaw.
- Katapusan -