May Nasumalang nga Anghil
ni Amy Fe E. Pagunsan
Timprano pa nagbugtaw si Myla agud maghanda kang anang kaugalingun sa sangka importanti nga byahi sa sagwa kang probinsiya. Nigosyanti si Myla. Hapitun tana kang anang darwa ka amiga. Gintawgan tana ni Chona sa silpon nga nagapaagto run ang van nga ginasakyan nanda ni Gina. Wara magbuhay darwa ka madasig nga nagasundanay nga van ang naglubas. Natingala tana tungud bag-o gid lang naghambal si Chona nga marapit run sanda.
“Hello, Myla! Diin kaw run?” pamangkot ni Chona sa tilipono.
“Dya sagwa kang karsada nagahulat. Diin kamo run?” sabat ni Myla.
“Dya sa waiting shed tubang ka plasa sa banwa.”
“Nalubsan nyo run ako kon amo.”
“Sakay kaw sa traysikul pahatud rugya hay mahulat kami.”
Wara ti tricycle sa amo to nga oras. May naglubas nga dyip, piro wara nagpundo.
“Palihog hambala ang drayber balikan ninyo ako rugya.”
“Indi pwidi, rayu kaw run.”
“Ano bay dya? Amo ra hay nawili tinyo ka istorya.”
“Kitaay run lang ta sa erport. Pasinsiya gid.”
Marayu pa ang erport, sobra darwa ka oras ang byahi kag alas otso run sa aga. Alas onsi sa aga ang lupad na. Naghibi sa kaugut si Myla piro kinahanglan na makapaminsar kon paano makaabot sa anang aragtunan. Nagsakay tana sa una nga naglubas nga sarakyan. Samtang nagapanaw ang bus ginpamangkot na ang drayber.
“Manong, pira ka oras atun byahi kadya?”
“Dipindi. Mga darwa siguro, Mam.”
“Ano gid oras, Manong?”
“Mga alas dyes.”
“Alas onsi akun flight, makaabot ayhan ako ka ria?”
“Basi maurihi kaw, Mam.”
“Ti, pwidi makasaylo sa van?”
“Ti, manaog kaw dya?”
“Aguy, indi lang. Kaalang-alangan nga lugar. Bug-at akun malita. May darwa pa ka bag.”
Biribitbit pa ni Myla ang darwa ka botilya kang tubig nga ginpabakal kana ni Chona. Masaku ang bus sa paghapit kang pasahiro nga nagabantay sa karsada. Ginakarat si Myla.
“May shortcut nga aragyan pa-erport, Manong?”
“May dyan, Mam.”
Nagginhawa lang kang madalum si Myla. Kang sa binukid run ang bus, may nauna nga van kananda kag bukas ang likod ka dya. Duro ang nawigit nga mga karga. Nagpondo ang drayber kang bus. Dalidali nga ginpamurot kang konduktor ang mga nawigit nga bag. Nagaugtas manilag si Myla. Maurihi run gid tana.
“Manong, madiritso tatun, andut ikaw gid timo nagaproblima ka bukut imo problima man?”
Rugto sa unahan nagpundo ang van. Naggwa ang drayber agud siraduhon ang likod kang anang sarakyan. Nakakita kang tyimpo si Myla.
“Manong, pamangkuta ang drayber kang van kon may bakanti pa.”
“Sigi, saylo kaw, Mam. May bakanti. Sara.”
Dalidali nga nagpanaog sa bus si Myla agud magsaylo sa van. Bahul ang anang pasalamat tungud bisan sa anang pagsinuplada, may paglalang ang Dyos. May gintigana pa nga purungkuan para sayluhan na.
Sin-o ang makahunahuna nga may anghil sa likod kang dya nga hitabo? Nagapamangkot tana sa anang kaugalingun nga kon wara ang amo to nga insidinti, makaabot gid man bala tana sa erport bisan singko minutos run lang antis kang boarding? Para kay Myla gamhanan gid matuod ang Dyos.
- Katapusan -