Hulat
ni Emmy L. Masola
Wara ti pahuway ang tika ni Isko ka anang rilo. Kinsi minutos kag mag alas-syiti. Tabuon na si Minggay, ang klasmit kang high school kag ang pinakauna nga nobya.
Lagting run nga abogado si Isko kag apat run ka babayi ang napuyo na, piro wara gid ti ginpakasalan bisan sara.
"Sir, tawga lang ako kon dyan run," ang kuon ka sirbidora.
"Huud, Laura. Salamat," may pagkaaburido na nga sabat hay nagatugambol run ang anang korason. Pasado run alas-syiti wara gihapon si Minggay. Ano abi hay ikatatlo run dya nga pagtabuay nanda para itugro na ang singsing. Ang nauna nga mga pagkitaay, napaslaw.
Bag-ong gradwar sanda kato sa kolihiyo kag maswirti tana nga nakakita dayon ka obra.
“Handa ko run ikaw pakasalan, Minggay,” ang pinsar na. Dayon na padara ka telegrama sa RCPI para kun-on si Minggay nga makitaay tanda sa Dondon Snackbar alas-dyis ti aga sa Dominggo. Ginsigurado na gid nga ang singsing nga ginpapanubli kana ka anang Lola Engkar rugyan sa anang bulsa. Ugaring, naabutan tana ka tag-irigma, wara ti Minggay nga nag-abot. Urihi na lang naman-an nga wara makalab-ot kay Minggay ang telegrama.
“May nagwani abi ka istorya kay Mama nga ginakuno pamilya nyo,” sugid ni Minggay nga may pagkamayha.
Tuod gid man gali ang nabatian na! "Ay, Dyos mio! Indi gid takun magpasugot nga sa babaw agi ka mga apo ko." Nagayam-id kuno nga komintar ka mama ni Minggay samtang nagapanguyab. Amo to kuno nga nagdalidali tanda pa-Manila nga magpamilya.
Ginbalik lamang ni Isko sa baul ang singsing kag magpa-Manila para mag-iskwila ka abogasya. Nangin ikawalo sa bar topnotchers si Isko kag nagrapta ang balita parti kana amo nga natultol ni Minggay kon diin tana pwidi matawgan. Sa pag-istoryahanay sa telepono, naman-an nanda nga pariho pa gihapon tanda nga hilway.
Sa ikarwa nga kahigayunan, nagplano si Isko. Abatun na si Minggay kag masakay tanda sa barko nga nagalibot sa Manila Bay. Ugaring, hana pa lang tana maabat, naghuni ang anang beeper.
“Indi run lang kita magkitaay pa liwan. - Minggay”
Wara maintyindihan ni Isko ang buut hambalun ni Minggay. Sa Facebook chat na lang naman-an nga nakita gali ni Minggay ang pagharuk kag malawid nga paghakus ka sangka babayi kay Isko kang isorprisahun na raad dya sa anang paborito nga kapihan. Wara run tana nagpakita pa kag wara na maman-i nga amo to ang pormal nga pakigbulag ni Isko sa anang nobya.
Nagbag-o ang tanan kang gin-add tanda nga darwa sa Facebook group ka andang batch sa high school. Soltiro kag daraga pa sanda sa gihapon.
Sa ikatatlo nga kahigayunan, nagsugtanay tanda nga magkitaay.
Manog alas-otso run. Garut ang lingling ni Laura hay kinahanglan handa ang musikiro pagsinyas ni Isko.
Para madura ang pagkaaburido, nagturuk lamang ka tilibisyon si Isko. Amo man pagsalida ka Breaking News. May aksidinti sa EDSA, pito ang patay. Isara si Minggay.
"Ang dimalas, ikatatlo gid manghalit. Sa ikaapat pa kuno nga kahigayunan maaguman ang kalipay. Piro paano ko matirawan ang kalipay, hay wara run ikaw, Minggay?"
- Katapusan -