Kunyag
ni Arlene D. Nietes-Satapornvanit
Una nga sakay ni Disa sa eroplano. Medyo nakunyag nga daw nakulbaan. Duro ang nagasulud sa pinsar na nga mga kaharadlukan nga nagakaratabo sa eroplano. Pareho kang mga nakita na sa sine kag telebisyon. Daw ginakurdam tana maminsar kang matabo kon nagalupad run ang eroplano.
“Daad gin-imawan run lang ako ni Manang ba,” pinsar ni Disa kang ginhatud tana ni manang na sa airport kag ginbuligan magtsek-in. Ginbilinan tana ni manang na nga dapat alisto lang kag magbasa-basa kang mga notisya kag magpamati sa mga anunsyo.
“Kon bukun lang ti tungud sa libri nga matrikula sa kolehiyo, indi gid takun kadya magpaadbinturar sa Manila. Kabay pa makita ko dayon si Perla ba pag-abot ko sa airport sa Manila,” pangamuyo ni Disa samtang nagapila pasulud sa eroplano. Pakaisa na si Perla nga sangka iskolar man sa kolehiyo nga pagaeskwelahan na.
Nakita na ang kasilyas ka eroplano. Ginmulalngan na ang gawang. “Ay, daw lisud tana abrihan ra haw? Paano ra bi kar on kon sa sulud takun tapos indi magbukas ang gawang kag hindi takun ka gwa?” Nagdugang kulba na.
Ginbanga na run lang ang anang pinsar sa kon sin-o ang makaingud na sa eroplano. “Kabay pa bayi lang ba kag kon laki, raad gwapo ba.” Nagyuhum-yuhum tana samtang nagapanaw paagto sa anang purungkuan.
Napili na nga purungkuan ang rapit sa aragyan. Piro wara pa ang ana ingud nga sa bintana ang pwesto. Nagpungko si Disa piro wara ginsirado ang seatbelt. Hulat-hulatun na lang nga makasulud ang ingud para hapus ang magpungko-tindug. Gin-ukay na ang bag para sagapun ang balon na nga libro. Piro kang hana na buklatun, may tawo nga nag-igham sa kilid na.
“Uhmm, Miss, eksyus me. Pwede ka agi?”
Gulpi nagkuba-kuba ang dughan na. Kilala na ang limug. Wara lagilagi nakatangra si Disa hay indi kamaan kon ano ang obrahun na.
“Aguy! Limug gid bala to ni Nick,” pinsar ni Disa, “ukon basi nasobrahan lang ako ka paminsar kana?”
Klasmit ni Disa si Nick kag crush na dya halin pa kang una nga adlaw kang klasi da sa hayskul. Husto lang tanda sa marapuyot nga turukay pirmi piro wara ti tsansa nga makaimaway kag mag-istoryahanay hay daw turil nga nagakurong kay Nick ang barkada na nga si Liwayway.
Hinayhinay nga nagtindug si Disa kag nag-atubang sa tawo nga maagi.
“Disa?!” ang may kahangyus piro buta ka kalipay nga pamangkot ka laki.
“Nick!” Daw nagpundo ang oras. Wara pa ka lupad ang eroplano piro daw sa panganod run tana si Disa. Indi makapati sa anang swerti.
“Ay, miss, pasudla run ra migo mo para makahulag man kami,” kuon kang sangka pasahiro nga daw nagapangara. Nagdali-dali si Disa gwa sa ana nga purungkuan agud pasudlun si Nick.
Kang manogpungko run, nakita na nga nagadulot gihapon ang mata ni Nick kana kag wara ti untat nga nagayuhum. Gintago ni Disa ang balon nga libro kag gin-atubang si Nick.
Manoglupad run ang eroplano. Si Disa, medyo nakunyag nga daw nakulbaan, piro lain run ang rason.
- Katapusan -