Gugma
ni Emmy L. Masola
Nalaya run ang mga rosas kag natunaw run ang tsokolati kang Balentayns. Nalaya kag natunaw run man bala ang inyo gintanyag ukon ginpabatyag nga paghigugma? Ginbaribadan, gindis-ayrihan ukon gintalikdan bala ang imo paghigugma kag nag-ugut ikaw? Nagsusuon ka sakit ka buut tungud ka napaslawan nga paghigugma?
Paghinugay. Untatati ang pagpangasubu. Ang gugma nga matuod-tuod wara nagakilala kang kasakit. Wara nagabatyag kang kapait sa tunga ka pagtalikod ukon pagdis-ayri, bisan pa ka pagpasipala. Hay ang matuod-tuod nga gugma kaanggid ka pagpalangga ni Hesukristo sa katawhan: ginpas-an ang krus, ginbatas ang mga pagpasipala pati ang pagtalikod ka anang mga disipulo, gin-agwanta ang masakit nga tuslok ka bangkaw, ang dugi nga korona pati ang mga lansang nga nagbuslot ka anang mga palad kag dapa-dapa bangud sa gusto nga maluwas ang mga tawo sa mga sala. Andut gusto na nga luwasun kag tubuson sa mga sala ang katawhan? Bangud bahul ang Anang pagpalangga sa mga tawo. Indi na mabatas nga ang Ana mga pinalangga magaantos sa sakit kang kalayo sa impyerno para mabaydan ang mga sala.
Ang matuod-tuod nga nagapalangga, wara nagakilala ka mga kasaypanan kag mga diperensya kang pinalangga kag ang makita lamang amo ang kamayad kag ang pagkabilidhun kang tagipusuon. Nagpalansang si Hesukristo sa krus bangud Ana nakita nga ang Ana mga tinuga, bisan nagtalang, perpekto nga mga tinuga ka Ginoo - nahimo nga may mayad nga kabubut-un kag putli nga kasingkasing. Nakasala man ang mga tawo dara kang kagamo sa ana palibot, piro nakita ni Hesukristo nga paagi sa Anang pagpakita ka anang bahul nga pagpalangga masanagan kag mahawanan ang paminsarun kang katawhan kag mariyalisar sa pira ka adlaw ang anda bug-os nga pagkatawo kag makilala ang andang kaugalingun bilang bata ka Dyos, ang Makagagahum kang tanan. Kag sa andang pagkilala kang kaugalingun, anda maumpisahan ang pagpangabuhi kaimaw ka matuod-tuod nga Amay kag mabatyagan ang kahilwayan sa mga sala kag sa pagkapriso sa gahum kang materyal nga bagay kag mabatyagan ka bug-os ang kalipayan sa pagpangabuhi.
Amo dya ang bunga ka putli nga paghigugma, wara nagahandum nga mang-angkun, kondi nagatugro kang kahilwayan para mahangpan ka sangka pinalangga ang kahulugan ka gugma indi man sa paagi nga gusto ka nagapalangga kondi sa paagi nga nasulat kang kapalaran para sa pinalangga.
Ang kwaresma, nagapadumdum kanatun ka madalum nga kahulugan ka paghigugma bangud si Kristo bisan ginabayaan kag ginatalikdan ka mga tawo, wara nagahubas kag nagapuas ang pagpalangga. Malaya man ang tanan nga mga rosas kag matunaw man ang tanan nga tsokolati ka Balentayns, ang pagpalangga ni Hesus kanatun preska kag mahagpok sa gihapon. Gani kon ikaw nasakitan kag nagpatubo ka dumut sa imo tagipusuon bangud sa napaslawan nga paghigugma, bukut ri-a ti gugma. Pagbugtaw kag magbangon hay basi ang matuod nga gugma wara mo pa masumalang.
Kadya nga simana santa, atun iselebrar ang matuod nga kahulugan ka gugma paagi sa pasyon ni Kristo.
- Katapusan -