Salsalun
ni Maria Milagros C. Geremia-Lachica
Lab-as pa sa paminsarun ni Anita ang andang paghaksanay kato kada mag-abot si Natoy. Sa pagkainit nga kon mahimo pa lang tunawun nanda ang salsalun nga barandilya nga nagapatunga sa mga bag-ong abot kag mga nagaalaw-alaw sa erport.
Piro kadya nga aga, ginasunod ka anang nagalumaw-lumaw nga mga mata ang nagaamat-amat pagamay nga garhum kang Narita erport. Sarum-an, alaw-alawun tana sa NAIA ni Badong, ang tatay ka anang mga bata.
Ginturuk na ang singsing sa anang tudlo. Daw salsalun dya nga sawa, nagakambud. Hugut. Kulang ang kainit kang anang lawas sa pagtunaw ka dya.
- Katapusan -