Gugma ang Kabangdanan
ni Mark Anthony Q. Orquejo
Isara sa mga pinakanami nga bahin kang atun kabuhi sa dyang kalibutan amo ang mahulog sa ginatawag nga gugma. Indi makatiringala sa sangka tawo nga nagahigugma ang pagbugtaw sa aga nga una pa sa adlaw kag pagpulaw sa gabii nga nagaparumba sa bulan.
Ang maimaw ang tawo nga ginapitik kang atun dughan makabig nga isara sa mga nagatugro kolor sa atun kabuhi kag inspirasyon sa adlaw-adlaw natun nga mga buruhatun. Indi matapos ang adlaw nga indi mag-uran kang sampatun nga mga tinaga ang sara kag sara. Ang matam-is nga mga yuhum kang mga nobyo kag nobya daw angay lang kang tubig nga nagailig halin sa wara paghubas nga tubudan. Ang pagdapitay kang alima samtang nagapanaw kag pag-imaway samtang nagalantaw sa pagsalup kang adlaw sa kahapunanun, makabig nga timaan kang gugma. Ang liwat-liwat nga pagkabuhi adlaw-adlaw bukut rason para matak-an sanda sa paglantaw sa itsura kang isara kag isara.
Sa pihak nga bahin, indi gid malikawan ang mga pagbais kag pagsungon. Pero rugya nagagwa ang matuod nga intensyon kang atun tagipusuon. Ang pag-angga sa nagasungon nga ginapalangga isara sa dapat ipadayon natun hay amo dya ang nagasirbe nga manog-ituk kang nagakusmod nga baratyagun.
Sa pagbaisay, ang pagpaumud amo ang nagatugro kasanagan nga kita may ginaamligan kag ginapakamarahalun nga mas labaw pa sa atun bugal. Makamaan kita magpakanaba sa ngaran kang gugma nga atun ginapanindugan.
Ang bulan kang mga tagipusuon bulan man kang paghunahuna nga kita may bahul nga katungdanan sa pagpalangga parehas sa pagpalangga kanatun. May bahul kita nga kapasidad sa pagpakita kang gugma hay kita naghalin sa hari mismo nga tubudan kang matuod kag puraw nga gugma.
* Litrato: Halin sa http://en.paperblog.com/valentines-day-relationship-readings-special-offer-784450/.