Bilog ang Bola
ni Megan Camille Lagordo
Makapoy man ang siyam ka bulan nga pagtuon. Gani bagay lang nga maglingaw-lingaw man ang mga estudyante, tyempo nga andang ginatawag nga bakasyon. Amo dya ang tion nga ginahulat-hulat kang mga pamatan-un sa bilog nga banwa ilabi run gid ang mga lalaki kay kada bakasyon lang may ginahiwat nga liga. Parehas kay Mio.
Gwapo, putiun, mabuut, garing putot. Amo ria si Mio Cadillac Morales, sangka ka dose anyos nga pamatan-un. Hilig na gid ang mag-basketball bisan medyo ginakabos tana sa kataasun. Sa kagustuhan nga mapilian bilang isara sa mga representante kang anda nga Midgets team sa 2013 Sangguniang Kabataan Municipal Federation Basketball League, bisan rayu pa ang bakasyon, nagaensayo run si Mio. Makita gid ang dedikasyon kang pamatan-un nga dya sa adlaw-adlaw na nga pag-ensayo.
Sangka semana antis ang pagpamili, nagabira-bira praktis tun si Mio sa half-court nga nahamtang sa likod-balay nanda.
“Toto Mio! Aga kaw pa nag-basketbol dyan haw?” hambal kang Papa ni Mio kana.
“Pa, ma-tryout kami ni Klong-Klong sa sunod semana mong. Mapili run daan sanda para sa mga marepresentar sa Inter-barangay,” pagpanugid ni Mio sa Papa na.
“Te, pamahaw anay to para may pwersa kaw. Maagto man rugya kar-un si Klong-klong?”
“Burubhay kuno, Pa. Tapos na panamog ka mga kasapatan nanda.”
“Mio, dali run. Mahaw anay dya,” panawag kang Mama ni Mio kana.
“Huud, Ma! Pa, dali run, para dururungan ta lamang,” panghagad ni Mio kay Papa na.
Bugtong nga bata si Mio. Busog sa pagpalangga kag mahambal nga makasarang ang anda nga pamilya. Abogado ang papa na, kag inhinyero ang mama na. Pero, mayad ang pagpabahul kana kang ana nga mga ginhikanan. Matinumanun nga bata si Mio.
Nag-abot ang adlaw nga ginahulat-hulat kang mga pamatan-un sa barangay. Amo dya ang pagpili-ay para sa marepresentar kang anda nga barangay sa pang-munisipal nga liga.
Nagpila si Klong-Klong kag Mio. Nakita ni Klong-Klong nga ginalantaw sanda ni Ejay, kilala nga pinakasagad nga basketbolista sa anda nga mga kaedad.
“Part, si Ejay, uh. Manuya pa gid ra. Kita na ta nga daan,” hambal ni Klong-klong kay Mio.
Wara gid nagsala si Klong-klong. Ginparapitan sanda ni Ejay.
“Huwaw! Look who’s here? The Morales cousins! Maano kamo dya? Mapakita kon ano kamo ka lawlaw?” panuya ni Ejay sa magpakaisa.
Wara run magsabat ang magpakaisa kay nanawag run ang coach.
“Okay, boys, line up now! Man-an nyo man siguro nga paparapit run ang Liga ka SK. Kadya nga adlaw magapili run ako kon sino ang marepresentar ka Midgets Team. Gani, kon sin-o ang mapilian, palihog itatak nyo sa kadalum-daluman kang inyo nga pinsar nga angay kamo. Sa mga mapilian, palihog itao gid ninyo ang inyo ikasarang para sa dungug kang atun nga barangay."
Nag-umpisa run ang pagpili. Ginbase kang coach ang pagpili sa ikasarang kang mga bata.
Matapos ang try-out, ginpanglawag run kang coach ang dose ka manogsipal nga magasulod sa kuponan. Syempre, una gid nga ginlawag si Ejay. Ikaonse nga ginlawag si Klong-Klong. Sara lamang ang kulang para makumpleto ang Magic 12 kang barangay.
“Kag ang urihi nga ngaran nga magarepresentar kang atun nga barangay para sa Midgets Category, si Mio Cadillac Morales!” ang lawag kang coach.
“Klong! Klong ako to! Ako to!” masinadyahun nga hambal ni Mio sa ana nga pakaisa. Nabatian dya ni Ejay.
“Te, nalipay kaw? Haha. Mairinit lang bangko kaninyo. Ginbuul lang man kamo para may tagatao kang trapo kag tagabitbit kang tubig. Abi nyo kakaput kamo bola? Indi mag-ilusyon kay mga binsoy lang kamo!” ang pagpangsuya ni Ejay sa magpakaisa.
Ginpabungul-bungulan lang ka darwa ang mga pagpangsuya ni Ejay kananda. Nag-uli sanda sa anda mga panimalay kag ginpaabot ang mayad nga balita sa anda nga mga ginhikanan.
“”Ma! Pa! Nakasulud kami ni Klong-klong sa Midgets team!” balita ni Mio sa mga ginhikanan na.
“Te! Kuon kaw ga mong. Praktis kag sarig sa abilidad mo, maabot mo gid ang ginahandum mo. Kadungganan ta gid ikaw ga!” Kag nagkupkup ang Mama ni Mio kana.
“Hala! Nagdrama pa kamo rugyan. Klong, tawga to si nanay kag tatay mo. Hambala rugya kamo tanan mayapon sa balay. Maselebrar kita!” sugo kang Papa ni Mio kay Klong-klong.
“Yeheeey!” dungan nga singgit ni Mio kag Klong-klong.
Nagbukas ang liga. Nag-umpisa ang mga sipal. Kumpleto ang pamilya ni Mio para magsuporta kananda ni Klong-Klong. Pero, natapos lang ang sipal, wara gid kakaput ka bola si Mio. Hasta sa nakaabot ang anda nga kuponan sa championship kon sa diin kontrahun nanda ang kampyonato kang nagligad nga tuig. Pero bisan wara ginapasulud si Mio sa sipal, todo suporta sa gihapon tana sa mga imaw na.
Grabe ang tensyon sa bilog nga gym kang nag-umpisa ang sipal para sa kampyonato. Sa ka init kang sipalanay, wara pa mag sangka minuto ang sipal, nagdamhag run ang sangka imaw ni Mio kag wara run nakabalik pa sa sipal.
“ Coach, gapanakit sanda. Patago lang garing amo ra indi kakita ang referee,” sugid kang nabalda nanda nga imaw.
Sa pagtapos kang third quarter, lima run sa mga imaw nanday Mio ang nasamadan. Kon wara man, na-fouled out. Kapoy run man ang mga nabilin sa mahigku nga panipal kang anda nga kontra, sanda lamang ni Klong-klong ang nabilin nga reserba.
Hasta sa may nasamadan pa gid sa lima nga nagasipal. Ginpasulud si Klong-Klong.
Sa urihi nga darwa ka minuto kang fourth quarter, wara ginaekspektar nga pati ang Star Player nga si Ejay makatiraw man kang indi manami nga panakit kang mga manogsipal sa piyak nga team. Wara run ti iba pa nga mapilian magsipal sa court kondi si Mio run lang.
Kabado si Mio kay una na nga pagsipal sa kadya nga liga. Pero ginbutang na sa paminsarun na nga amo run dya ang anang ginahulat-hulat nga tsansa kag dapat kid-anun na magsipal para sa ikadungug kang anda nga barangay.
Nabatyagan ni Mio nga sakit gid man ang mga body contact kang mga kontra, pero gin-agwanta na dya. Ginpaggwa na ang mga ginapraktis na adlaw-adlaw.
Sa anda nga pagbinuliganay, haros naabutan run nanda ang score kang anda nga kontra. Last 5 seconds kag sara lamang ang abanse kananda. Si Mio ang gakapot ka bola. Medyo nagdapun nga kulba kag kompyansa ang ginabatyag ni Mio. Darwa pa ang nagabantay kana kag kinahanglan na nga maka-shoot. Indi maman-an ni Mio kon ano ang ana nga himuon pero gulpi daw naghipus ang bilog nga gym kay may nabatian si Mio nga limug halin sa taho nga wara na ginaekspektar.
“Go, Mio! I-shoot! Sarangan mo ra!” ang pagsuporta ni Ejay kay Mio.
Gin-itsa ni Mio ang bola. Nagpalibot-libot sa ring kag nagsulud. Two points! Kag nagpito ang referee patimaan nga tapos run ang sipal. Nagdaug sanday Mio.
Nagsinadya ang bilog nga team kag ang mga kabarangay ni Mio. Sikat si Mio kay tana nakagoal nga amo nangin rason kung handut nagdaug ang anda nga team.
Samtang ginakungkung ka ana mga imaw, nagparapit ang gakiangkiang pa nga si Ejay.
“Ayos kaw, pre. Pasensya gid sa mga panuya ko kaninyo ni Klong-klong kato. Nagbahul lang gid siguro ang ulo ko sa mga pagdayaw kanakun. Daad iindi kaw magpatas kanakun,” pagpangayo kang dispensa ni Ejay kay Mio.
“Wara run tana to, pre. Apid ta bay. Kag sara pa, kon indi nami ang pagdara mo sa grupo ta, wara ta ka abot sa kampyonato. Idol ta kaw bilang kapitan kang grupo ta,” pagpatawad gihapon kag pagpaubus ang nangibabaw kay Mio.
“Oy, mga parts. Rugya lang man gali kamo? Tawag run ta ni coach. Maselebrar kuno kita sa balay kanday Mio. May ice cream kuno!” pagpanghagad ni Klong-klong kang nakita na nga gaistoryahanay ang darwa.
Kag iririmaw nagpanaw ang mga bata.
Kon kaisa, iindi malikawan sa atun pagpangabuhi nga kita husgaran kag suyaan. Taho lang kita, indi perpekto kag iba-iba ang atun ginapatihan, pero indi rason para mag-untat kita sa pagdamgo nga sa mga masunod nga inadlaw, ang mga taho nga nagasuya kanatun nga may mga abilidad, sanda pa ang matangra kanatun. Amo ria ang ginahambal kang mga mal-am nga bilog ang bola. Wara dapat nagauntat ang taho sa paghandum para sa ikamayad kang anda nga bwas-damlag.
- Katapusan -