Deriada Ginpasidunggan ka 2015 Gawad CCP
ni Emmy L. Masola
Ginatamyaw ka Dungug Kinaray-a (DK) si Dr. Leoncio P. Deriada para sa anang 2015 Gawad CCP para sa Sining nga gintugro kang Cultural Center of the Philippines kang Siptyimbri 17, 2015, bilang pagkilala sa anang bilidhun nga nahimuan kag naamot sa patag ka arti kag kultura ka Pilipino. Kaimaw ni Deriada nga nakabaton ka pagkilala sanday Nora Aunor, Armida Siguion-Reyna, kag Tony Mabesa.
Ginpamatud-an ang kalidad kang amot ni Deriada paagi sa maduro kag dungganun nga mga padya kag pagkilala ka anang abilidad sa pagsulat sa Ingglis, Pilipino, kag Hiligaynon. Imaw run man ka dya ang anang indi matupungan nga bugay sa pagparabong ka litiratura sa Bisayas Nakatungdan, kon sa diin wara ti kakapoy na nga gindihon kag gintuytuyan ang mga urihing-tubo nga manunulat sa Kinaray-a, Hiligaynon, kag Aklanon.
Sa tulad, ang dyang mga manunulat, nakabaton run man ka mga padya kag pagkilala ka andang mga sinulatan. Isara ka dya si Ritchie D. Pagunsan, prisidinti ka DK, nga nakabaton ka padya halin sa Carlos Palanca Memorial Awards for Literature.
Si Deriada isara sa mga taglaygay ka DK kag ang anang paghimud-us para matugruan kang kapagsik kag pagkilala ang Kinaray-a nga litiratura, nangin inspirasyon sa ginakabig kadya nga mga harigi kag kunsadan kang panulatan sa Kinaray-a.
Pagpanginbulahan kanimo, Sir Leo. Duro gid nga salamat sa imo padayon nga pagsuporta sa DK kag sa Kinaray-a. Bugal kaw namun nga mga Karay-a!
Pagpanginbulahan kanimo, Sir Leo. Duro gid nga salamat sa imo padayon nga pagsuporta sa DK kag sa Kinaray-a. Bugal kaw namun nga mga Karay-a!