Mga Taglaygay ka DK "Kampeon ng Wika 2014"
ni Emmy L. Masola
Bugal kang Dungug Kinaray-a Inc. (DK) nga darwa sa anang mga taglaygay ang ginkilala nga Kampeon ng Wika 2014. Sanday Dr. Alicia P. Magos kag Dr. Leoncio P. Deriada gintugruan kang Komisyon sa Wikang Filipino kang pagpasidungug angut sa paghiwat kang Buwan ng Wika 2014 sa Unibersidad kang Pilipinas sa Bisayas, syudad kang Iloilo kang Agosto 7, 2014.
Si Magos ginpasidunggan bangud sa anang makaharangyus piro makagaranyat nga pagpang-usisa parti sa mga epiko kag mga alamat kang Panay; sa anang mauti nga pagtuon kang pagsinarayo kang mga nagaisot nga linahi kang mga Binukot kag Maaram; kag, sa anang pagtuip liwat kag pagsulat kang mga epiko nga mabatian lamang sa mga silibrasyon pariho kang Alayaw, Balanakom, Sinagnaya, kag Tikun Kadlom. Gindayaw ang anang katandus sa pagtipon kang mga itnograpiya halin sa Antique kag Iloilo kag ang anang pagtugro kang kapawa kag inspirasyon sa iba nga mga Pilipino para magtinguha nga ibayaw ang mga tumanduk kag kilalahun ang pungsudnon nga kultura. Ginbilang si Alicia P. Magos nga huruwadan sa anang mga ginhikot nga naghangkat sa mga pariho nga Pilipino nga padayunon nga balikan ang kultura, kasaysayan kag literatura para maintyindihan ang atun pinalangga nga pungsod.
Ginpasidunggan si Deriada bangud sa anang pagkaiditor kang mga barasahun nga pangliteratura pariho kang mga kontimporaniyo nga panaysayun, Binalaybay kag dula sa Hiligaynon, Aklanon, Kinaray-a, Ingglis kag Filipino nga halin sa Bisayas Nakatundan, imaw ang pagpakilala na sa tanan kang mga bag-uhanun nga mga manunulat nga anad sa dyang mga duna nga pulong. Gindayaw man ang anang pagkamatandus sa pagsulat kang mga makahulugan nga mga panaysayun nga ginhimo na nga instruminto sa anang mga ginapamunuan nga mga organisasyon nga pangliteratura. Nabalhag sa mga bantog nga magasin kag mga dyornal, ang ana ngaran kag mga sinulatan nalikwat sa linggwahi kang nagakalain-lain nga mga pungsod. Indi maisip ang mga pasidungug kag pagpabugal nga ana run nabaton nga angay gid sa sangka inanak kang arte.
Ang pagpakilala kanday Dr. Alicia P. Magos kag Dr. Leoncio P. Deriada, ginbadbad ni Emmy L. Masola sa Kinaray-a halin sa:
http://kwf.gov.ph/kampeon-ng-wika-2014-alicia-p-magos/
http://kwf.gov.ph/kampeon-ng-wika-2014-leoncio-p-deriada/