Kag ang nagdaug sa Paindis-indis 2013 amo si...
Ginakalipay kang Dungug Kinaray-a nga ianunsyo ang mga nagdaug sa Padya Dungug Kinaray-a 7 (2013) Paindis-indis sa Sugidanun Pambata. Sa 18 ka pasakup, ang mga masunod amo ang napilian nga tugruan kang padya.
Una nga Padya: Alibangbang nga Wara ti Pakpak ni Edison Mallorca Otañes
Ikarwa nga Padya: Si Ulong-ulong kag si Sige-sige ni Rufema Gordon Vegafria
Ikatlo nga Padya: Sa Paghawan kang Bakhawan ni Gil Salanio Montinola
Ang Pundok kang Manoghusgar ginasakpan kang mga masunod:
Maria Milagros C. Geremia-Lachica (Puno nga Manoghusgar)
Alex C. Delos Santos (Katapo)
Emmy L. Masola (Katapo)
Ang mga pasakup ginhukuman paagi sa mga masunod nga surundan: maathag nga pagpabutyag kang panghunahuna (35%), orihinal kag kinaugalingun nga ginsulat nga may angut sa tema (35%), kag kabilugan nga istilo kang pagsulat (30%). Ang tema kang piyesa kinahanglan nagakaangay sa mga bata nga nagaedad pito hasta dose (7-12) anyos.
Ang tanan nga nagpasakup makadawat kang Sertipiko sa Pagpasakup kag espesyal nga premyo. Ang tatlo ka piyesa nga nakabaton kang pinakataas nga puntos magabaton kang mga masunod nga padya: P10,000 kag medalya (una nga padya), P7,000 kag medalya (ikarwa nga padya), P5,000 kag medalya (ikatlo nga padya).
Ang pagpanagtag kang mga padya pagahiwatun sa paraabuton nga Disyembre. Ang detalye kang selebrasyon ianunsyo man sa masunod nga mga inadlaw.
Mabasa rugya ang iban nga mga pasakup. I-klik rugya para sa kumpleto nga lista kang mga pasakup kag tagsulat.
Pagdayaw sa atun mga tagdaug kag tanan nga nagpasakup sa paindis-indis kadya nga tuig. Duro man nga salamat sa tanan nga nagsuporta sa pagtib-ong kang atun pinalangga nga Kinaray-a, ilabi run gid halin sa mga katapo kag tagdumara kang Dungug Kinaray-a. Hanggud nga pasalamat sa pinasahi nga pagpanikasug kag pagtabang nanday Stephen Louie R. Checa kag Vicente B. Petinglay, Jr.
Atun gid dya! Hasta sa sunod nga paindis-indis. Mabuhi ang Kinaray-a!
Si Edison Mallorca Otanes nagatudlo kang Values Education sa Antique National School. Tana ang pinakagurang sa apat nga bata ni Eduardo Otañes kag Sonia Otañes. Magluwas sa pagsulat kang mga sugidanun sa Kinaray-a, mahilig man tana magsulat kang mga kanta, magkanta sa nasari-sari nga okasyon, magsaot, magdesinyo, kag magdibuho. Nagapati tana nga moral nga responsibilidad ang pagsulat. Si Edison tumanduk kang Villar, Sibalom, Antique.
Si Rufema Gordon Vegafria sangka lisensyado nga maestra nga nagaobra tulad sa Kalahi-CIDSS (Kapit-Bisig Laban sa Kahirapan-Comprehensive and Integrated Delivery of Social Services) sa idalum kang Department of Social Welfare and Development. Mahilig si Rufema sa pagbasa kag pagsulat. Nakatapos tana kang Bachelor of Science in Education sa St. Anthony’s College. Si Rufema tumanduk kang Brgy. Bugo, San Remigio, Antique.
Si Gil Salanio Montinola nakatapos kang Bachelor of Science in Elementary Education sa West Visayas State University. Nagasulat tana kang binalaybay kag sugidanun sa Kinaray-a kag Hiligaynon. Tungud wara ti pormal nga tinun-an sa mabugnaun nga pagsulat, nangin giya na ang mga libro kag pagpanday sa pagsulat sa pagtubo na bilang isara ka manunulat. Nagatudlo tana tulad sa Dala-Singay Elementary School. Si Gil tumanduk kang Brgy. Singay, Mina, Iloilo.