Paindis-indis 2013 nakadawat 18 ka pasakup
Ginapanginbulahan kang Dungug Kinaray-a ang tanan nga nagpadara kang andang sugidanun bilang pasakup sa Padya Dungug Kinaray-a 7 (2013) Paindis-indis sa Sugidanun Pambata. Nagtakup ang pagbaton kang mga pasakup kang tungang-gabii kang Septyembre 30, 2013.
Makita rugya sa idalum ang lista (alpabetikal nga pasunod) kang mga pasakup nga nabaton. Igabalhag dya sara-sara kag sa nagkalain-lain nga adlaw rugya sa website kang Dungug Kinaray-a agud mabasahan kang kadam-an.
Titulo
1. Adik sa Kompyuter
2. Alibangbang nga Wara ti Pakpak
3. Ang Buktot sa Kamalig
4. Ang Istorya ni Pula
5. Ang Kama-kama sa Kantulan
6. Ang Pagdayaw ni Mali kag Pipo Sa Bulan
7. Ang Pagkadura kang Oko kag Mangilaw
8. Ang Premyo kang Pagpangabudlay
9. Bilog ang Bola
10. Damgo ang Nagpukaw
11. Hardin kang Eden
12. Kataw
13. Paseo
14. Sa Paghawan kang Bakhawan
15. Si Anna kag ang mga Alibangbang
16. Si Barsikok kag ang anang Anghel dela Gwardiya
17. Si Ben Sungi
18. Si Ulong-ulong kag si Sige-sige
Ang piyesa pagahukuman paagi sa mga masunod nga surundan: maathag nga pagpabutyag kang panghunahuna (35%), orihinal kag kinaugalingun nga ginsulat nga may angut sa tema (35%), kabilugan nga istilo kang pagsulat (30%). Ang tema kang piyesa kinahanglan nagakaangay sa mga bata nga nagaedad pito hasta dose (7-12) anyos.
Ang tanan nga nagpasakup makadawat kang Sertipiko sa Pagpasakup kag espesyal nga premyo. Ang tatlo ka piyesa nga makabaton kang pinakataas nga puntos magabaton kang mga masunod nga padya: P10,000 kag medalya (una nga padya), P7,000 kag medalya (ikarwa nga padya), P5,000 kag medalya (ikatlo nga padya).
Ang ngaran kang mga tagsulat, nagdaug, kag miyembro ka Pundok kang Manoghusgar pagabantala sa Oktubre 15, 2013 rugya sa website kang Dungug Kinaray-a. Ang pagpasidungug sa mga nagdaug kag pagtugro kang mga padya, pagahiwatun sa Disyembre 2013. Bantayi ang detalye kang dya nga selebrasyon sa paraabuton nga anunsyo.
Ginaagda ang tanan nga magsuporta sa atun mga manunulat paagi sa pagbasa kag pag-Like kang andang mga sugidanun rugya sa website kag sa Facebook Page kang Dungug Kinaray-a. Ang may pinakaduro nga Like hasta sa tungang-gabii kang Oktubre 31, 2013, magabaton kang surprisa nga padya.
Basaha rugya ang mga pasakup.