Sa tunga kang pagpamalaybay kag kasubu
ni Stephen Louie R. Checa
Kapira ko run sulatun
ang tinaga nga ‘kalipay’
kag duro run nga mga paraangidan
ang ginbalay ko may angut sa "kasadya,"
ugaring ang akun alima nagakudug
sa pagkaput kang diyang bolpen.
Ang akun luha nagapaindis-indis
sa tinta sa pagtupa sa akun papel.
Pirit ko nga ginakapkap
ang mga metapora kang yuhum
sa pihak kang paghanok-hanok kang akun dughan-
daw lobo nga nasobrahan
sa huyup kang kasubu: daw malupok, daw mabuswang
daw tagipusoon ni Kristo - ginbangkaw bangud sa gugma.
Gusto ko sulatun ang pag-untat
kang uran, kilat kag daguub
sa sulud kang akun hulut kag kang akun paino-ino.
Gusto ko paraun sa akun bokabularyo
ang kahulugan kang paghibi, kapyerdihan kag pagbiya.
Gusto ko magpasad kang sangka binalaybay
nga ginahakwat ako kang mga anghel paagto kanimo.
Ugaring nasubuan gid ako:
pamatyag ko indi sanda ka dara kanakun.