Mugyok Tang
(sauna)
ni Linda C. Arnaez-Lee
Ginsulud ko ikaw nga hublas
bitbit ang sangka kabo
kang habon, syampo, kag roludgod
kang paglaum nga kar-on sa akun pagparigos
magakakas ang dyang mga buring kang kahapon.
Ginbatas ko ang kainit
kag ang gaaso-aso nga mga panuruk
kang mga tumanduk nga maputi it panit
kag pirot it mata
nga may pagmulay sa akun
maitum kag kuribod nga laragway.
Sige, ludgod pa hasta magpurula
ang panit mo nga kaki basi pa lang magputi
madura ang agi kang mga kasakit
kag mabuslan kang daw mala-porselana
nga paglaum, nga sa akun pagbanlaw
masal-an run ako nga Koreana.
* Litrato: Himo ni Beverly Brown halin sa http://fineartamerica.com/featured/reclining-woman-magenta-green-and-orange-watercolor-painting-beverly-brown-prints.html.