Ginabangungot nga Bugtaw
ni Linda C. Arnaez-Lee
Pira run dya ka adlaw nga puro hospital ang akun ginaduaw. Pira man ka beses ako nagbalik-balik sa hospital kon sa diin si Dadang nga akun magurang na-admit.
Kadya nga adlaw, nagduaw man ako sa akun estudyante sa Busan University Hospital. Kay Judy. Tana isara sa mga maaram kag dedikado ko nga estudyante sa Dongsa Muso. Mga sais syenta anyos, mataas, manami ang lawas kag mahilig mag-exercise. Charming dance ang tawag kang anang exercise. Kombinasyon dya kang yoga kag ballet nga saot. Sangka adlaw, samtang naga-exercise, nakadanlug tana kag nabari ang gintukod nga butkun, amo nga sa hospital tana kadya.
Nagapanagitlun ako kag nagaparamalhas kang mayami sa tagsa mabatian ko ang tinaga nga hospital ukon ano pa nga may labut sa operasyon. Nagpanumbalik sa akun paminsarun ang katre nga may riring kag ginatulod samtang nagakaya-kaya ako.
Nagasuksok ako kang bayo pang-pasyente kang ginsulud sa OR (operating room). Kang una, makita ko lang dya sa mga sine ang parti sa OR kag ang pag-opera. Pero kadya, rugya tulad ako nagasakay sa katre nga ginatulod. Pagsulod namun sa OR, ginturuk ko ang palibot. Pareho gid kang nakita ko sa sine. Duro mga apparatus sa sulud. May nagakabit pa sa kisame. Amo dya guro ang iangut kanakun, ang pinsar ko. Daw sa mga makaharadluk dya nga sapat nga nagahulat lang magtukub kanimo. Nagkuba-kuba ang akun dughan.
“Aahh, indyeksyunan man nanda kara ako gihapon kang pampaturog. Pagkabugtaw ko kara tapos run,” ang ulo-ulo ko sa akun kaugalingun.
Ginsaylo nanda ako sa sangka katre, sa pinakatunga kang kwarto. Nakabayo sanda tanan ka biyerde kag naka-mask gani indi ko makita ang anda hitsura. Makilala ko lamang sanda sa limug. Ang nag-indyeksyun kanakun amo ang sangka nars nga medyo may edad run. Isara sa mga naka-gown kang biyerde amo ang limug kang akun doktor, ang direktor mismo sa hospital. Bisan mahal gawa tana ang bayad, naniguro gid si Bruce nga sampatun ang maga-opera kanakun. Ginpabarikutot nanda ako kag gintublukan kang dagum ang akun spinal cord.
Daw ginkutot ako kang bilyunes ka bilog nga tigasaw. Pwerti ka sakit! Naghiwud ako sa kasakit! Pagkatpos kang tubluk kang bahul nga dagum, ginpatadlung nanda ako ka batang. Mabatyagan ko ang pagbinhud kang akun lawas halin sa hawak paidalum. Regional Anesthesia ang gintubluk kanakun. Ginhulat-hulat ko nga maturugan pero gamurarat gihapon ang akun mga mata.
Naglaum ako nga indyeksyunan nanda ako kang pampaturog pero wara. Nagparapit ang tatlo ka mga laki nga naka-mask kag naka-gown kang biyerde. Umpisahan run ang operasyon.
Nakita ko ang pag-alsa nanda kang akun batiis kag pagbanyos ka betadayn. Daw paa ka baboy nga bag-ong kiskis ka dahon kapayas ang panurukan ko sa akun batiis. Ginbutangan nanda ka tabon para indi ko makita. Pero urihi run. Nakita ko run kag nagapaminsar run ako kang mga kung ano-ano nga pwedi nanda himuon. Indi ko mairo magpaminsar pa gid gani gintawag ko ang nars.
“Gusto ko magturog” ang hambal ko kana.
“Turog kon gusto mo magturog,” ang sabat na. Dayon na butang kang headset sa akun talinga. Yamuhat! Gangnam style ang music. Paano ako magturog hay daw masaot ako sa tukar nga dya? Gintinguhaan ko run lang nga lingawun ang akun kaugalingun samtang nagapagusto sanda ka tuhil kang akun batiis.
Huud gali, i-operahan ako sa tuo ko nga tuhod. Nagisi ang akun meniscus. Ang daw goma bala ngara sa tunga kang atun tul-an sa tuhod. Hambal kang akun doktor in-born ko kuno nga nipis ang meniscus. Siguro man sa sobra ko nga aba kay Nene, amo nga wara masarangan kang akun tuhod ang bug-at namun nga darwa. Pagkatapos kang sangka oras, natapos gid man ang pag-opera.
“Titser, rugya run kita sa atubang ka kwarto ni Judy,” ang hambal ni Cherry nga akun imaw, isara man sa akun mga estudyante sa Dongsa Muso.
Daw masulud ako nga daw indi. Bangungot para kanakun ang lugar nga hospital. Daw malagyo ako. Nagbukas ang gawang. Nakita ko si Judy nga nagabatang sa katre nga may bendahe ang butkun. Nagapamaypay kag nagayuhum kanakun.
Rugya natapos ang akun paino-ino. Nagtikang ako pasulud sa kwarto.