​Kang nagligad nga Domingo, ginsaolog ka Kristohanun nga katiringban ang Pista ka Epipaniya, ang pagpakita ka Ginoo bilang tawo, nga ginpabotyag kag ginsimba ka Tatlo ka mga Maaram (Magi) okon Hari. Ang dyang kapistahan nabantogan nga Pista ka Tatlo ka Hari. Kang gamay pa ako, ginakakunyagan gid namun nga magborogto ang dyang pista tungud amo dya ang adlaw nga maboksan run namun ang amun rigalo nga kono halin kay Santa Claus.
 
Sa kaagahun, sa adlaw ka Paskwa okon Pagkatawo, ang amun mga rigalo nagatohaw sa idalum ka Christmas Tree. Ang amun Christmas Tree kato wara ginbakal kondi gintapas ni Tatay halin sa bahul nga sanga ka kon ano nga kahoy sa palibot ka balay. Ang pagpriparar ka Christmas Tree ginaompisahan kato pag-abot ka bolan nga Disyimbri, kag bukut sa bolan nga nagatapos sa “ber” pariho kar-on nga mga panyimpo. Ang sanga ginapatindug namun sa bahul nga lata ka gatas okon mantika, kag ginadaskan ka bato palibot agud magpag-un kag indi malingkang. Ang lata ginapotos sa nagasiling nga mga papil okon mga porotos ka rigalo sa Christmas. Nagagonting kami ka mga papil nga nanarisari ang kolor kag ginahimo namun nga kadina kag ginasokbit palibot sa mga sanga. Nagapanipon man kami ka mga hapin ka nanarisari nga mga dolsi agud ipotos sa magagmay nga mga bato nga amun man ginabitay imaw ka mga Christmas card kag mga ribon.
 
May pakaisa kami nga nagtodlo kon ano ang paghimo ka snow nga ibutang sa sanga, angay sa mga litrato sa Christmas card nga amun nabaton. Sangka hapon ang amun gin-osik kag tunga sa barita nga Perla, ang poti nga habon panglaba, ang amun ginkisyap ka manipis kag ginbati sa gamay nga tobig agud mahuman ang snow. Wiskan kono ka asin agud maghabok kag indi maglopyak ang snow, laygay pa gid ka amun pakaisa. Masadya ang amun pagbutang ka dyang nagapakono-kono nga snow sa mga sanga. Pagsonod nga hapon, tungud sa sobra nga kapaang ka tyimpo, natonaw ang snow sa sanga, nabasa kag nagrulubad ang amun kadina nga papil.
 
Wara pa maoso ang tinaga nga recycling, si Nanay maukud nga nagapatigayon run ka dya sa balay. Ginaandaman gid namun ang pagbokas ka mga rigalo tungud nga sarang pa gamitun liwan ang papil, kapin pa kon manami dya kag may aman pa nga mga ribon. Ang mga Christmas card kag iban pa nga mga card, kapin pa ang halin sa iban nga mga pongsod, wara ginatablug. Tanan ria ginahapnig gid kag ginatago sa sangka pola nga bag. Gani kon ano man ang mga kinahanglanun sa pagponi ka Christmas Tree, sa pagpotos ka rigalo, okon sa mga proyikto sa Art, ang pola nga bag amo ang amun darangpan.
 
Sa kaagahun kang Pagkatawo, sa pagkasadya lang turukun ang dalum ka Christmas Tree nga napalibotan ka mga rigalo. Man-an namun nga kada isara kanamun may rigalo. Ogaring ang pagbasa ka nagabarakang nga ngaran sa pinotos daw sangka tampuyung ka kalipay. Tampuyung tungud baskug kag dasig ang pagkabatyag kag may dara nga nagabitibiti nga kaugtas tungud nga sa Pista ka Tatlo ka Hari pa maboksan ang dyang pinotos. Amo dya ang pagsorondan ni Nanay. Wara kami ti mahimo sa adlaw ka Pagkatawo kondi ang pagkaput, pagkumukumu, pagsimhot kon may masimhotan kag ang pag-uyug ka pinotos kon bala may mabatian kami nga kalaykalay. Nahimo gid lang nga sangka malawid nga sipal ang pagpakut ka sulud ka rigalo. Indi mabasol nga sa pira ka adlaw, nasapwan run lang namun nga may gamay nga pinang-itan ang sangka pamosod ka rigalo ka akun libayun. Nagsogid tana nga man-an na run kon ano ana rigalo.
 
Ayhan nasadyahan lang si Nanay magturuk sa Christmas Tree nga napalibotan ka mga rigalo kag malyag tana nga palawidun dya hasta sa matapos ang pagsaolog ka Paskwa. Tinoig nga ginasonod dya namun sa balay. Nagaiskwila run kami sa kolihiyo ka akun magorang kang nagriklamo kami kay Tatay ka dyang pagsorondan kon Paskwa. Nadumduman ko pa nga nagmiting kami sa balay kag nagboto nga boksan ang mga rigalo sa adlaw ka Paskwa. Magahud kag masadya ang amun pagboto nga gin-ogyonan ni Tatay. Si Nanay, bisan napyirdi, nagkadlaw lang.
 
Sa kadya nga Pista ka Epipaniya, nagsanag sa akun pinsar ang dogang nga paghangup sa istorya ka pagkatawo ni Hesukristo kag ang tatlo ka hari. Ang lapsag nga si Hesukristo wara ti rigalo nga ginbaton sa adlaw ka anang pagkatawo. Masulud sa darwa ka simana pa antis mag-abot ang tatlo ka hari nga may dara nga rigalo nga bolawan, insinso, kag mira. Napolo kag darwa ka adlaw run nga ginbata si Hesus kang nag-abot ang anang rigalo. Tungud sa amo dya nga paminsarun, akun man nahangpan ang pagsorondan ni Nanay kato kang gamay pa kami. Andut abi nga mabokas kami ka amun rigalo nga wara gani ti rigalo ang lapsag nga may ginasaolog nga kaadlawan?
 
Liksyon sa pagpasinsya kag disiplina sa kaogalingun ang paghulat kag pagpaiway. Mabudlay gid ang pagdisiplina kang kaogalingun kag ang pagpaiway ka mga bagay nga nagatogro kanatun ka mahapus kag madasig nga kaborosgan okon katomanan.
​

* Litrato: Himo ni Salvador Dali halin sa http://blog.onlineclock.net/clocks-that-melt-by-salvador-dali/.