​Kataraka nagay pamati
Sa mga linyada ka mga politiko
Nagapatimaan nga rapit run ang iliksyon
Ginakombinsi gid ang tanan
Sa anda politikal nga plataporma
Nga daw plakado nga plaka
Nga nayab-okan man
Sa lomoton nga baol ni Lola
Kon bukun kaw lang ti mitikoloso
Maintoan ka gid ti piho.

Katong nabatian ko,
Nga liwat mapadalagan ang kandidato
Ginsambit na gid sa kadam-an -
Wara kamo nagaisahanun.
Nagkadlaw lang ako
Sa makaroyobit na nga linyada
Hay ako mismo sara ka ibidinsya
Nga oripon ka gutum kag pagkaisahanun.

Ginaako ko,
Nga katong nagriligad nga iliksyon
Tana gid akun binoto
Ogaring ako naintoan
Gani biskan kapira na man ran
Liwatliwatun nga daw oromanun
Indi run gid ako magpainto
Hay katong nangita ako ka obra
Tana akun ginparapitan
Para pangayoan ka bolig
Ogaring ang tanan na gali nga ginhambal
Sara lang ka kabotigan
Kag ang masakit pa sa tanan
Tinuruk na lang ako kag ginlabayan.

​Nagapanaw ako paoli sa balay
Kang ikaw akun nalubsan
Imaw kamo ka ginakabig mo nga gropo
May ginatim-ud nga pola nga likido.

Makita sa inyo mga itsora
Nga nagakaigo run kamo ka dalit
Nagaompisa run ang paggirinoal ka birtod
Nga nagadoso sa inyo pagtigbaylo.

Pagkabrobhay,

Ikaw nagmaoy indi run mapunggan,
Ikaw gintapongol ka imo mga imaw
Nagsambil ang imo bibig,
Nagdogo ang imo dahi kag kiray,
Ginburublag kamo ka mga tawo,
Ikaw ginsakay sa habalhabal
Paadto sa ospital para ikaw bolngon.

Wara ako ti iban nga nabohat,
Kondi ang magtindug sa pono ka mangga
Naorongan sa akun nakita
Nag-ulung-ulung para ako maompawan
Ginpadayon ko ang pagpanaw paadto sa balay.

Sa dason nga mga inadlaw,
Nabatian ko nga nahosay run ang gamo
Nagaamat-amat run ka ayad ang mga pilas mo,
Amo man ang imo pagboya ka promisa
Nga indi kaw run magtim-ud.
Gosto mo run ibuy-an kag pintokan
Ang birtod sa pagtigbaylo.

​Ginaistoryahan mo ako
Parti sa imo tradisyon
Kon magtibongaw ang bag-ong toig.
 
Koon mo, mahilig ikaw magsabwag
Ka pito ka tasa nga bugas
Sa tagsa ka sook ka inyo balay,
Sa pagpati nga nagadara ran ka swirti.
 
Ikaw akun ginpamangkot
Kon ano ang dason mo ginabohat
Sa bugas nga ginpangsabwag mo,
Kag dasig ang imo pagsabat
Nga daw wara ti sikag ang imo dila –
Wara, ginasilhig ko pagwa sa balay
Sigoro ginakaun lang ran ka mga lasga.
 
Kag naglisinsya ako nga maoli.
 
Sa pagpanaw ko sa kahonan,
Ginpaopok ko tanan sa kogonan –
Kon sa bagay wara ikaw nagakumus ka lao,
Kon sa bagay wara nagalap-okan mga alima mo,
Kon sa bagay wara nagakapilas ka garab ang todlo mo
Kon sa bagay wara nagakasalogsogan ang palad mo sa amakan
Kon sa bagay wara ikaw nagakakatlan sa pagpamulad,
Kon sa bagay wara ginasohot ang irong mo ka giruk halin sa kono.
Kon sa bagay manggadan ikaw!
Kon sa bagay wara ikaw ginagutman.
 
Nahapo run ako ka ugtas.
Nanogonan ako sa bugas,
Sa gin-oyangan mo.
Nanogon ako kanimo.
​

​Palangga ko, ang gogma ko kanimo
Daw hilamon hay wara nagakadapat
Sa hosto na nga logar.

Pirmi lang nagapangloyloy
Ang akun kalawasan
Tungud sa grabi nga kompitisyon
Sa sostansya nga daad nagakadapat
Sa bog-os ko nga kalawasan
Ogaring binoraw gid lang
Ka akun tagiposoon tungud kanimo.

Pirit ko man ginapatay
Sa raku nga mga pamaagi –
Sa pagpanggapas
Gamit ang matarum nga ispading;
Sa pagpangbomba
Ka hilo nga pistisidyo
Gamit ang bag-ong bakal nga bomba; okon
Sa pagpangsonog
Gamit ang gadabadaba nga kalayo.

Mabatyagan ko sa makadali
Nga wara run ang akun ginabatyag
Ogaring pagkaaga,
Nagatohaw dya man gihapon
Nagabalikbalik gid.
Lain gid man ka tama
Kon naigo ikaw
Ti maayad-ayad ni Kopido.

​Sa ginaholagan ko nga kalibotan,
May dyan gid nga mga tawo
Nga pirit ginatabonan
Ang akun ogatun nga mga mata
Nga nagamorokrat sa kamatooran
Gamit ang kono balaan da nga mga alima.

Pirit ginatabonan para indi kalosot
Ang kasanag kang kamatooran
Sa nagapamangkot ko nga mga mata
Kon naga, diin, ano natabo
Sa kwarta nga gintipon
Halin sa pinangabudlayan kang kadam-an?

Indi lang sigoro ako
Ang bolgar nga makakita
Nga nagapanghogas tanda ka pinggan
Gamit ang habon nga may bitamina E
Para tagoon ang korit halin sa pagkakadu
Ka makatul nanda nga mga kaalimahan.

Kon amo lang dya pirmi,
Mas gostohon ko pa magkaun ka alogbati
Nga nabohi sa ipot kag torogban
Tolahun, osangun, kag itunlun
Hay man-an ko nga indi gid maggirinoal
Ang mga kagaw sa bosong ko!

Sara pa, indi ambisyoso
Kondi ginatonaw kag ginapuga lang
Ang mga pagkaun nga masostansya
Nga sarang mabohat ka akun bosong
Nga ginapadara sa dogo paagi sa mga ogat
Kag ginabomba man ka akun tagiposoon -

Paadto sa kitid ko nga otok
Para togroan man ka gabanaag nga kasanag
Okon mapaminsar ang nagakadapat nga aksyon
Sa ginaagwanta nga dyang pagpang-into
Halin sa mga tawo nga nagkakibulun run
Ang mga kaalimahan sa pagpanakaw.

Nagalili ako sa bintana
Katong nakita ko
Ang magaragmay nga mga alibangbang,
Kahil nga may samo nga itum ang doag.
Masinadyahun nga nagasuruyup
Ka dugus halin sa sara ka pongpong
Ka manayanaya nga sampagita.

Gintawag lang ako nga maigma
Pay sa akun pagbalik,
Sa paglili ko liwan sa bintana,
Wara ko run liwan nakita
Ang mga pakpak nga nagasirinaot,
Ang mga makarilingaw nga laragway,
Katingalahan lang gid ang sara nga nagpintok.

Tamadan ako makakita kang kamingaw.
Gani, nanaog ako sa balay
Para maman-an ko ang rason,
Kon naga nagroloya ang mga pakpak,
Kon naga nabaylohan kang kasubu ang kasadya,
Kon naga nagamantinir run tanda sa manoglaya
Kag manogholog nga bolak ka tamporanga.

Nagatikang ako paadto sa lopa nga gintamnan
Ka toman kahamot nga sampagita,
Kag toya ko nakita ang matapan nga rason –
Ang bisita nga nang-angkun,
Ang nagapaisug-isug ka dungan,
Ang tar-ug nga nagapaharihari,
Ang bahul kag poti nga alibangbang.

Oran kag init ang nagdungan
Koon ka iban, makaboroang.
Ako nagsoray, basi mag-ayad
Okon basi bolong pa
Sa akun ginakuum nga sakit.
Wara ako ti labut kon magsakit
Ang akun bosong sa osbong
Ang importanti, indi makita
Ka iban ang loha
Nga ginatago ko sa talagbasan.
Rugya run akun mabatyagan,
Akun makita nga nagatoro run sa lopa.
Napaminsaran ko nga gosto ko ibangut
Okon ikadina ang liug ko
Kaangay ka ayam
Para magbaris, mag-isug, mangagat!
Ang ran bala nga sogtan ko ikaw
Magsulud sa akun logar,
Sogtan ko ikaw nga bul-un ang naoyonan mo
Ogaring sa imo pagwa,
Wara ti pagdohadoha nga pang-itun
Ko ang baitiis mo.
Gosto ko ikaw marabisan
Magsala nga daw manok nga langalanga
Kay lima ka banwa ang imo adtonan
Para matapna lang ang dalit
Nga gintanum ko sa imo kalawasan.
Ako run bala sara ka boang?
Ipikto run bala dya ka oran-init?
Sigorado ako nga wara gasilibrar ang langit
Kay indi ko gosto maging sapat!
Kaangay mo nga nami inusnus sa asin nga parat!
Pasalamat kaw kay gosto ko lang magsolat
Ka gogma ko nga pirit mo gintakaw.
Indi run ako mag-agi liwat sa tinais nga banas,
Gosto ko manakras biskan makapirilas ang ispalto,
Gosto ko run ihaboy ang gintimultimul ko nga lao
Nga ginpalhit mo man sa pagkatawo ko.
​​