​Ginakungkung
ka nanay
ang ana bata
kag ginasipit
pa gid ang isara
ginaturuk nanda
ang tobig ka baha
nga nagpokan
ka andang balay
nagsamo ang andang
loha sa oran
kag nangin toboran
ang andang mata
nga nagahogas
ka dimalas
sa andang lawas
sa paghupa ka baha
wara run sanda
ipatindug ka balay
kon diin sanda
dar-un ka kabohi
wara sanda kamaan
kon diin maoli.

​Makatiringil ang ngurub
Ka sarahi sa pagtapas –
Otod na ka mga kahoy
Sigondo lang ang pagtomba
Na ka mga kahoy nga nagtobo
Gorang pa sa tawo
Nga nagsogo patapas

Ginbul-an na iristaran
Ang mga pispis
Ang lopa naganipis
Hay wara run ti gamot
Nga maghawid sa tobig oran
Kag nagapadogang init kang kalibotan

Kon magbagyo kag baha
Ngurub ka hangin kag tobig
Magahawan sa mga sala

Ngurub ka langit ang nagbulus
Kag sa atun magasinggit
Agud makabogtaw kita
Sa mga nagakaratabo
Sa atun palibot.

​Bokid kataas
Ang akun handum kaona
Matayog pa sa lupad ka dapay
Gindumtan kag ginhandum ko
Nga sakaun daya
Do kar-on nanaog ang bokid
Gindara daya ka tobig
Ang lopa nga nagtabon
Sa bilog namun nga sityo

Para gali malab-ot
Matupungan ang handum
Ka nagaogwad nga logar
Kinahanglan magsakripisyo
Ang tanan nga kadam-an

Gin-angkun ka daya
Ang ana ginapanag-iyahan
Kami ang ana ginapanag-iyahan
Nagapahowayhoway
Sa lopa kon sa diin
Kami naghalin.

​Hambal nanda
gin-imnan ka balangaw
ang amun bobon gani
indi run namun
maadtonan
maparapitan
kag maimnan
kay budlay run
nga masindaan
kag magbalatian
mangita pa manogbolong
nga hangkilan
hambal ni Lolo
kontaminado run daya
ka mga hilo kag abono
nga ginagamit sa taramnan
sigoro amo ran ang rason
ka ana nga pagkamariit
tulad ang bobon
gintakpan kag ginsiitan
agud indi run pagbalikan.

​Ang amun taramnan kabohi
Rugya nagatobo ang binhi
Nga ginpanggas ni Tatay
Ka anang paghimakas
Nga makatibawas kami
Sa kapigadohon
Sa kaporautun

Sa taramnan tana nagbahul
Rugya ginsonog ang anang panit
Nagpurus ang anang kusug
Sa batiis kag butkun
Nagpadamul ka anang kibul
Sa palad
Sa dapadapa
Nagabato nga indi dalidali
Mapilasan kon mangoma
Sa taramnan.

Taramnan
Ang nagpamaan kanakun
Kon ano kabudlay
Ang inagyan ni Tatay
Nga mang-arado
Manglabay
Mangsab-og
Manggarab
Agud may buladun
Kag sa lamisa namun
May kan-un.

Kag ang polong ko Kinaray-a
Kag nagaragumu gid daya
 
Manami sa talinga pamatian
Ginadara na ikaw sa kaomhan
 
Sa hani ka hangin nga priska
Manami ang dupuydupuy sa talinga
 
Sa hagunus ka tobig sa soba
Kag sa soba ka daragkul nga mga isda
 
Sa katam-is ka mga protas sa lasang
Sa kanamit indi mo gid malipatan
 
Mabatian mo sa kanta ka mga dahon
Sa bobo ka oran sa atup kon kagab-ihun
 
Indi ikaw magsala nga ako ang kadlawan
Hay basi ikaw matoyawan
 
Ginapabogal ko nga Karay-a gid takun
Kag nagaragumu ang akun handum.
​

​Mahapus lang
magpakonokono
nga mahamuuk
ang akun torog
sa honi ka oran
sa amun bobong
nga daw kanta
mo sa akun talinga
mahapus lang
magpakonokono
nga palangga ko
ang kaagahun
hay mabatian ko
sa tagsa ko
bogtaw ang adlaw
sa imo kadlaw
ang panoroktorook
ka solog nga nagahapon
sa mangga nga nagapokaw
kanakun
Ogaring
ang matood
masapnut magtulun
ka kapi
kon wara
ikaw.
​