​Kaina ko pa ginalantaw
ang tagataga nga nagahapon
sa dahon ka banglibangli.
Wara patay ang ana tangra
sa nagayuhum nga langit.
Borobhay, may nagparapit kana—
sara ka gamay nga alibangbang.
Nagdoko anay ang tagataga
antis na sabnitun ka anang mga kamoy
ang pagkaun sa kato nga adlaw.
Naglibug ruman ang olo ko.
Paano kon nagpariho ako ka insikto nga to?
Indi man ayhan ako pagpalagyohan?
Garing, indi gid ra matabo.
Naobra ko ruman ang tanan.
Anhun ko hay ilahas ang kapalaran?

Nagtakras ang bagangan sa olo ko
kang akun nakita ang balagun
nga nagakupu sa dingding ka balay.
A, wara ko bala butunga
kag kutlun ka akun mga koko
sa pagpati nga malaya daya.
Pagkaaga, nagsaylo ang balud sa dahi ko
kang liwan nga nanaringsing
ang parti ka gin-otod nga balagun.
Andut amo ra haw?
Mayad pa ang ahaw nga balagun--
makitaan mo ka bag-o kada aga.
Andut mas pobri pa takun kana?
Nagabakas man ko kag
Napanggupud run ang tanan kanakun.
Andut wara tana ti saringsing
ang bilog ko nga kabohi?
​

​Bag-o lang nagtika ang adlaw
pay mapaang run sa kosina,
sa bilog nga palibot.
Gin-it-it kang kasanag
ang mahumuk nga trapal
nga nagakunup sa mahoyang
nga birha ka balay.
Nagapahapdi ka akun pilas
sa baratyagun ang nagapanoslok
nga kasanag ka adlaw.
Nabatyagan ko ang panghakruy
ka hangin nga nagalapos
sa giha ka tadtad nga dingding.
Kitaun ang pwirti nga pagpangasubu
ka nagaisaranhun nga kan-un
sa ibabaw ka sariksikun nga papag.
Onongan ko run lang tana—
Bas-un ko ka akun mga loha
ang ana nga kamara;
asinan ko ka akun mga damgo
ang ana nga kalas-ay.
Mahanggup takun.

​Halin kang gamay ko,
paborito ko gid ra ang obi,
bisan pirmi ko dya makita sa lamisa.
Kaagi nga nangali takun ka dya
kato sa tunga kang katalonan.
Bisan mahagnup ang logar,
nangisug gid takun nga magsulud.
Wara ko ginsapak ang koon ni nanay
nga may mowa toya nga nagaistar.
Ti, ano abi hay ginapangita dya
Ka nagariklamo ko nga bosong?
Raku run kato ang akun nakali.
Daragkul, bisan tungaun ko pa.
Daw indi gid tana masarangan.
Nanumdum ko samtang ginahampak
ka dara nga pisaw ang kinalihan.
Naigo ang anang matamata
kag dayon nagtoro ang taguk nga daw loha.
Wara ti kon ano, may nabatian ako nga honi ka sapat
dungan kang pagkolas ka poongpoong.
Sa kahadluk, nagdalagan takun ti dasig
nga wara barabalikid.
Dason adlaw, nagbalik mangud takun toya.
Paborito ko gid abi ang obi.

Bag-o lang nagtika ang adlaw
pay mapaang run sa kosina,
sa bilog nga palibot.
Gin-it-it kang kasanag
ang mahumuk nga trapal
nga nagakunup sa mahoyang
nga birha ka balay.
Nagapahapdi ka akun pilas
sa baratyagun ang nagapanoslok
nga kasanag ka adlaw.
Nabatyagan ko ang panghakruy
ka hangin nga nagalapos
sa giha ka tadtad nga dingding.
Kitaun ang pwirti nga pagpangasubu
ka nagaisaranhun nga kan-un
sa ibabaw ka sariksikun nga papag.
Onongan ko run lang tana—
Bas-un ko ka akun mga loha
ang ana nga kamara;
asinan ko ka akun mga damgo
ang ana nga kalas-ay.
Mahanggup takun.
​

Toya sa sikwayan ka taramnan,
marapit sa baba ka bohangan
nga naarigan ka mga kawayan,
may mga sabod nga nagatiriripon,
nagahulat nga gaboton, iladlad
kag itanum sa lapotyak nga lopa
gamit ang pisi nga latid
nga ginpangsogponsogpon
ka otod-otod nga ginhawa.
Sa hamras ka hangin,
Sa ilig ka tobig,
sa hagunus ka mga pangka,
nagahapay ang anda
mga malagtum nga dahon
nga daw nagapakitlooy.
Pay labaw pa gid ang anda kahadluk
sa wara nagahalin nga haron kang kawayan.
​

Ka dyang tig-ororan ka mga tinaga
masab-og ako ka mga binalaybay.
Binalaybay nga makatao ti paglaum
sa nagapirisngoon ko nga baratyagun.
Pay sa wara pa, lantipun ko anay
ang mga hilamon nga sa pinsar nagatalon —
kahadluk, pagpangdohadoha kag kaugut,
agud indi mag-arikutuy dyang binalaybay.
Akun nga aradohon ti may katandus,
malapad nga taramnan ka panumduman.
Bisan pa ang arado gasinggit—“Mabudlay!”
Kag ang balhas gapaspas nga daw ginalagas.
Karasun ko ang baraghal nga paminsarun
asta nga magpino kapariho ka bonbon.
Dyan kag masigorado nga marabo;
indi makatlan ang dila ka mga tinaga.
Kag handa run nga isab-og ang mga binalaybay.
​