<![CDATA[DUNGUG KINARAY-A INC. - Katul, Kalam, Pait, Tam-is, kag Aslum]]>Sat, 04 Nov 2023 13:06:35 -0400Weebly<![CDATA[Bintahoso]]>Mon, 10 Apr 2017 23:50:20 GMThttp://dungugkinaray-a.com/katul-kalam-pait-tam-is-kag-aslum/bintahoso
Picture
Halin sa http://www.deviantart.com/browse/all/designs/gameart/?offset=10&view_mode=2&order=9&q=favby%3Aarmsdealer09%2F8026990


Bintahoso
​ni Dax G. Dequito

​May karbaw
Sa torogban
Nag-anaw ang koto nga sinakpan
Naglombayag ang langaw sa kahanginan
May agak nga tolabong nga naghapon
Koon mo daw si sin-o
Pisan man ang toka sa koto
Gabanaag gid ana pilo
Daw talisayun ni Caloy
Kon magpostora daw Jolo
Wai timo nakahapon lang
Wai timo nanginpolos lang
Wai timo indi man angayan
Kon imo lang pasogtan gosto na man
Mangin karbaw sa pira ka adlaw
Daw boaya lang sa Katunggan
Gahulat lang maglisa ang darapliun
Kag anda sigpawon, diritso tulun
Diya sa kalibotan doro run sanda
Mag-andam gid sa tolabong
Mangapin gid sa boaya.
]]><![CDATA[Lomay]]>Mon, 27 Mar 2017 23:42:28 GMThttp://dungugkinaray-a.com/katul-kalam-pait-tam-is-kag-aslum/lomay
Picture
Halin sa https://www.pinterest.com/pin/5770305751399377/


Lomay
​ni Dax G. Dequito

​Wara gid kamaan
Wara man kapangandam
Ana lang ginlogay
Hala pa labogay
Nagsamorakut gid sa laway
Tuduk gid sa dughan
Ang lomay

Wara run mapunggan
Ang pag-indakal ka init
Ang bag-id ka panit sa panit
Wara gid mapunggan ang pag-igut kang katri
Ang bagrut ka onto
Ang ugayung ka olay
May lomay

Wara run ti animo
Indi run maghirinunu
Baw bohi gid nga nagtobo
Naundan run ang sapay
Indi run mabawi, ay, ti, nakolantro
Ay, linti nga pangabohi!
Diin mabakal ka ipatiti?
Nalomay.
]]><![CDATA[Ang Panagitlon ka Isposo ka Pating]]>Wed, 15 Mar 2017 23:05:02 GMThttp://dungugkinaray-a.com/katul-kalam-pait-tam-is-kag-aslum/ang-panagitlon-ka-isposo-ka-pating
Picture
Himo ni Janis Lee Colon halin sa https://www.etsy.com/search?q=white+doves+painting


Ang Panagitlon ka Isposo ka Pating
ni Dax G. Dequito

​Sangka balinis lang
Ang nagbogto ka wara kataposan nga gogma
ka poti nga pating
Nga rogto gahapon sa paklang ka bori
Sangka lopok lang ka di-bomba
Kag naalimonaw ang potli nga baratyagun
Baw, daw malumus gid sa kalipay
Ang mga sapatsapatun
Anda lang gingutrab
Daw ginakumus sa kasakit ang baratyagun
Kang nailo nga isposo
Nga naglupad imaw ang handomanan
ka mahirup nga pag-imaway
may aso ruman sa darapogan
may sambowa sa karaha nga bag-o lang mahogasan
nagadabdab ang kalayo, nagtob-ok man ang aso
Dungan kara ang sirit ka karaha
Samtang ginraha ka mantika ang kusug
Ang lomay kang kamangyan gin-islan
Kang kahomot ka adobo
Sa lamisa may ginahulat nga sumsuman
Ang saprat nga manogpangayam
Sa sanga ka bongalon
May isposo ka pating nga gahulat dulang kang kamatayun.
]]><![CDATA[Naglayas run ang Akun Mosa]]>Sun, 05 Mar 2017 23:37:12 GMThttp://dungugkinaray-a.com/katul-kalam-pait-tam-is-kag-aslum/naglayas-run-ang-akun-mosa
Picture
Himo ni Blurino halin sa https://www.pinterest.com/pin/255297872601365491/


Naglayas run ang Akun Mosa
ni Dax G. Dequito

​Daw pira run ka toig nga wara mabaid
Ang akun nga mga litra kag tinaga
Daw aligutgut nga indi pwidi madara sa torog
Nagakalam ang akun alima, takatak sa makinilya
Gagata ang akun nga otok, pwidi run ilonod sa tambo kag bagongon
Ogaring asta lang sa istorya koriskoris
Nga indi mapintokan, wara ti sinogodan

Ay, kaagahun pa sa akun kahamtung
Kag akun ginpamahaw binalaybay kag dilambong
Piro naga ta, imo ako gintalikdan, akun nga mosa
Wara run ti kabohi ang mga tinaga
Indi run magsararanto ang mga linyada
Wara run tupa ang mga istorya
Wara run sa tono ang akun pang-amba

Diin ko ikaw pangitaun?
Sa agsador nga sa gihapon oripun?
Sa kalasangan nga anda pirit tapanun?
Sa kargador nga mapatay nga tibihun?
Sa sistima ka mga ayam-omang?
Sa sinipi kag paray nga nagahogpong?
Sa kanal nga rulubngan ka lapsag nga paminsarun?

Rugya ako nagahulat kanimo, ginapalig-on run ang sintido
Nahidlaw run takun sa imo romansa sa tagsa ka litra ka makinilya.
]]><![CDATA[Ang Horobaton ka Langaw sa Dapadapa ka Balabaw]]>Wed, 22 Feb 2017 22:54:58 GMThttp://dungugkinaray-a.com/katul-kalam-pait-tam-is-kag-aslum/ang-horobaton-ka-langaw-sa-dapadapa-ka-balabaw
Picture
Himo ni Ruth Bailey halin sa https://ruthbaileyart.wordpress.com/tag/mountains/


Ang Horobaton ka Langaw sa Dapadapa ka Balabaw
ni Dax G. Dequito


Ang karantahun kang kapispisan wara run sa tono
Hay man ang mahogani kag gimilina pwirti gid kadoro
Ginlubung run namun ang soba nga daw langgaw nga dalisay
Kon Hunyo lang makadumdum magginhawa
Ang kasakun ka singgarong asta run lang sa istorya
Ang ahaw nga bao indi run magraku,indi gid magdoro
Bisan pira pa ka amo ang imo matonto
Ay, ti, wara run ti bokid, wara run pono ka tipolo
Napokan man ang molawon, ginhimo run bangkito
Ang akun kamingaw daw laon nga gaidad ti sitinta
Pwirti pa magkaskas indi run garing makapangopa
Sa monga nga bokid nga anda man lang ginmina
Ang sapa, torogban, soba kag bobon nga mara
Daw tutunlan ko nga ginabangag kon tag-irinit
Daw bosong ko nga wara gid ti momho kag pasi kon tigkiriwi
Daw mayad man, ay, tanan nga dalan siminto
Baw! Mayad gid, ay, kada mitro may porsyinto
Raku pa ang kotsi sa sinsilyo ko nga inogpliti
Maoli run lang ako, masonod sa mga hangaway sa Antique
Ay, pwirti gid katahum ang Iloilo City
Tanan gasaka, tanan ginsaka
Wara gid makalowas tinago ko nga pinakas
Ay, pirmi lang gapanaog brip kag panti
Ang tanan nga bahul doro run gapati
Bohatun pa nanda poti ang ati.

]]><![CDATA[Daroy kag Solan-oy]]>Sat, 11 Feb 2017 22:35:55 GMThttp://dungugkinaray-a.com/katul-kalam-pait-tam-is-kag-aslum/daroy-kag-solan-oy
Picture
Himo ni Helen Allingham halin sa https://www.pinterest.com/pin/162411130287692921/


Daroy kag Solan-oy
ni Dax G. Dequito

​Daw kang kan-o lang
Kang kami ni Bogrong kag Bartok
Gakolintas tirador, galatas bisan ang init gabunuk
Kag ang oran gasirak nga daw sarait ka pinoti
Rogto sa Katugpan, mangayaw manamang
Sa dagami marigos sa giruk
Kag sa sapa Buray mapisan manikup
Ka daroy kag solan-oy
Sampat nga darapliun sa bahaw nga amun balon
Kon kaloy-an tamun, ang dapli ombok

Garing wara run ang sapa sa Buray
Diaper kag potos ka cheese snack run ang ginasobay
Kon indi bobog, lata kag inanod nga patay nga ayam
Amo run lang kara ang sarang masikup
Ay, ang ombok, ila pa sa tarin ni Manding Pasing
Daw ginagutrab ang akun kasingkasing
Si Bogrong lima run ang ginapakaun
Si Bartok sa Munti gid naghapon
Ako run lang nagaisahanun
Manikup kag malagpang sa akun damgohanun
Ka daroy kag solan-oy.
​
]]><![CDATA[Kon Indi Gogma, Ti, Ano Ran?]]>Fri, 20 Jan 2017 23:55:54 GMThttp://dungugkinaray-a.com/katul-kalam-pait-tam-is-kag-aslum/kon-indi-gogma-ti-ano-ran
Picture
Himo ni Irene Brooks halin sa https://in.pinterest.com/pin/292171094547417679/


Kon Indi Gogma, Ti, Ano Ran?
ni Dax G. Dequito
​
Koon gid ni Lola kanakun
Mayad pa ang ang katul hay sarang kaloton
Pay ang kalam run gani maglatay sa ogat
Daw alaw nga kanamit gid pitipitihun
Sa tulad nga panahon
Kadoro run ti pagsolay kanatun
Di mo run maman-an kon kalam okon katul
Basta lang nagahabal
Basta lang nagalaton
Ay, Toto, ay, Inday
Indi pa tinyo kamaan magtig-ang
Pisan run magbalaybalay
Pagtoro ka tarithi, di gani kaponpon hinalay
Hinogaya takun nga rayu run ang nabagtas sa panaway
Ka dyang kinabohi indi run matiplang
Antis magsipal it kalayo
Kotkota ang painoino
Ang koon ni Lola kanakun katong oso pa ang banga
Ti, kon indi gogma, ano ran?
​
]]>