​Pagpamolaw ang yabi agud ang kada litra matanum,
Sa gamo nga paminsarun para madab-ot ang handum.
Basaha ang kada panid samtang ang libro wara pa maguba,
Kon didikado ikaw, sa paminsarun indi dya mapara.

Ang pagbaylo ka tyimpo indi ta mapunggan
Amo nga bukut makatiringala nga ang libro ginalipatlipatan.
Hay ang kada panid ginsaylo run ka tawo
Ang mga tinaga, sa silpon kag kompyotur run nag-agto.

Indi ta mabasol kon sa tawhay mapili ang tawo
Hay madasig gid man magpindot kaysa magsagap sa libro.
Piro mas nami nga ang libro indi ta paglipatan,
Hay ang pinanid sa kompyotur sa libro naghalin man.

Kaaram ang ginakaptan ta agud sa tanan makabolig
Bisan diin mag-agto dapat ang ginhalinan matipig.
Indi ko masondan kon diin run ang ginbasa ko nga pinanid,
Ang akun lang ginasigoro nga sa paminsarun indi dya mapalid.

​Itum kag marabong nga bohok manami ipabogal,
Indi mabaylohan kag budlay mabakal.
Nagapatimaan ka pagkasoltiro kag pagkadaraga,
Hay kon nagapapas run, basi may bana okon asawa.

Doro ang nagalikaw sa pagbaylo ka tyimpo
Hay bisan ang bohok nagapatimaan ka mga pagbag-o.
Pasalamat ikaw kon ang bohok magdoag bolawan
Kaysa dya magsongon kag dalidali maghawan.

Ang tawo nagariklamo kon magbaylo ang kolor it bohok
Piro nagapatimaan dya nga ang lawas nagaamat-amat gabok.
Tawo nga tinoga indi dapat paglipatan
Nga sa gihapon manggad ang bolawan.

Bolawan nga bohok kaaram ang simbolo
Nagapatimaan lang nga mayad ang pagkatawo.
Poti kag bolawan nga bohok dapat ipabogal
Hay ang dungug ka tawo, manggad nga indi mabakal.

​Kaimaw sa paglagaw kag magpangahoy sa bokid.
Sa pagbakiro it karbaw magbutung it lobid.
Si Lolo nga may malabug kag mabakud nga kahig
Kon ako ana hakwatun, bog-os ang pagsarig.

Dasig magisi ang nomiro it kalindaryo
Kaimaw ang pagpangloya ka kahig ni Lolo.
Daragkul nga hita indi makasarang bisan darwa,
Kinahanglan may magpanimbang kag dogangan ka sara.

Sogidanun nga pirmi ginahambal ni Lolo
Indi mabag-o ang pagbag-o ka tyimpo.
Parihas sa kahig nga apat sa aga,
Tatlo sa hapon kag kon sa adlaw darwa.

Indi dapat nga isarig sa kahig nga kahoy
Ang atun kamal-aman nga makalolooy.
Kon ang pag-olikid ka pamilya ang mangin kahig nanda,
Bisan sa kamatayun, anda dya ikasadya.

​Maglagsanay sa mga amigo sa sipal nga morosmoros
Salbarun ang kaimaw sa ginatawag namusnamus.
Indi magpakita kon gaompisa run ang panagoay
Kon indi gosto mabalhasan pwidi man magbalaybalay.

Kon sipal nga may lobid pwidi ikaw sa tilibirtilibir
Kon lobid nga goma, tombo ikaw sa Chinese garter.
Pasolpot ang gamitun kon sa barkada may gyira,
Kag balangun ang kaimaw kang karay nga bola.

Magsipal nga may tobig nga ginakorit sa karsada.
Sonodbalabay ang dungan nga ginasambit sa pagkanta.
Budlay magpalibug kon ikaw si Doktor Kwak
Masopla kaw sa piko kon sa korit maglapak.

Sakit sa tubug magsinggit sa tranggayo,
Alay mag-isip kon nagadangaw sa syato.
Sakit magbiring ang kahig sa tintin-baka,
Mas pa gid sa hampakanay ka tsinilas nga goma.

Manami dumdumun ang masadya nga siripalun,
Piro ang paglipat kananda nagaamat-amat run.
Kabay nga sa sipal ka bag-o nga hinirasyon,
Ang sipal sa karsada mapaambit man sa gihapon.

​Kamalig nga kawayan, manami torogan
Mahangin kag prisko sa akun pamatyagan.
Mga balay nga garagmay nga ginatawag kobo,
Naghanas ka akun pagkatawo kag ginhalinan ka pagtobo.

Pagpalangga nga naangkun halin sa ginikanan
Ginpakita sa pagsagod sa pogad nga kawayan.
Kon ang pogad maguba man sa pag-abot ka bagyo,
Ang pamilya hogpong kag indi maano.

Nagligad ang tinoig kag ang pogad ginhimo bato.
Nagbakud ang harigi piro gabok ang pagkatawo.
Nag-agi ang bagyo kag ang pogad nagpabilin
Piro sa sulud it panimalay, ang tawo nagharalin.

Manami turukun nga ang kawayan naghimo bato
Kon ang higot ka pamilya indi mabogto.
Kay kon ang manami nga pogad sa pamilya indi makahawid,
Mas piliun ko ang gabok nga pogad nga sa panimalay nagalobid.

​Lobid nga nagahigot ka baryo kag banwa
Wara it ginhalinan kag wara it ponta
Ralantawon nga nagagiya sa tawo kag sarakyan
Indi ikaw magtalang kon imo dya sondan.
 
Wakalan kag magahud ang ginkabahulan ko nga karsada,
Logar ka pagkinadlaw kag mga bata nga masadya.
Sa nagatagingting nga init, manami sipalan
Masadya man sa gabii kon masanag ang bolan.
 
Kon lantawon ko kadya ang ginasipalan ko nga karsada,
Ang kagahud kag pagkinadlaw nag-amat-amat run dora.
Dya ginbaylohan ka nagagonong nga sarakyan
Ang mga bata nawili run sa ginapindot nga siripalan.
 
Ginabutang nga tobig agud sa karsada ikorit,
Indi run matodlo okon sa bata mapirit.
Sa pagbaylo ka sipal kaimaw ka migo ko nga masadya,
Nagbag-o kag nag-apa ang kaona nga karsada.

Maglompat kag maglangoy sa madalum nga soba,
Kaimaw nga maglagsanay sa parihas ko nga bata.
Magkinadlaw kag magsinggit kaimaw ka tobig.
Magsalum sa kahilway ka soba nga nagailig.
 
Manggad sa soba, gintoga para sa tanan.
Ginaimnan, ginarigosan, ginapamonitan kag ginalagawan.
Kon ang tobig sa soba maramig kag malimpyo,
Nagapakita nga mayad ti panimuut ang nagarigos nga tawo.
 
Ang ginkabahulan ko nga soba kang akun ginbalikan,
Indi ko run marigosan okon mapamonitan.
Bahul ang nagbag-o sa manami na nga itsora
Bisan diin sa palibot, ginkorisan it basora.
 
Ang pinalangga ko nga soba nagmara kag naohaw
Ginbayaan ka malimpyo kag tobig nga masinaw.
Tawo nga maaram ang soba nagapangayo it bolig,
San-o ayhan tana makatiraw ka malimpyo nga tobig?
​

​Sa pag-iskwila akun kaimaw,
Gintogro ni nanay agud ibakal pamahaw.
Manggad nga bonga ka paghimakas.
Tawo sa onahan kag karbaw sa likod.
 
Sinsilyo nga nagsagod ka akun pagkabata,
Nagtogro mata agud ang kaimolon makita.
Manggad nga bonga ka dogo kag balhas;
Ginatingoha nga maangkun para masagod ang lawas.
 
Sinsilyo nga mas bug-at nga walo ang posod,
Kon idapun ang darwa ka karbaw, niyog run ang sa likod.
Kon itung-un ang karbaw, darwa run ka agila
Kon hurayun sa apat, alibangbang ang makita.
 
Nagligad ang mga tinoig kag ang karbaw natonaw.
Bag-o run nga sinsilyo ang mga nagtorohaw.
Piso nga karbaw nagpabilin sa paminsarun
Sa andang pagkadora nagmahal ang baraklun.
​