​Man-an nyo pa bala ayhan ang sipal nga songka?
Ang paglagsanay sa gabii kag ang tilipono nga lata?
Ang pagparigos sa oran kag pagpanakup ka pangka?
Ang panagoay, slipper game, jackstone, kag panapana?

Man-an nyo pa bala ayhan magbisa sa kamal-aman?
Magbolig sa panimalay kag magtahod sa ginikanan?
Ang mag-oli ka timprano kag wara gatambay sa dalan?
Ang pagpangamoyo kada gabii antis mag-agto sa baratangan?

Man-an nyo pa bala ayhan magbokad ka libro?
Magbasa ka notbok nyo kag magtoon ka todo?
Magtodlo sa mga libayun kag magtorog timprano?
Maghambal ti may pagtahod kag pasalamat sa Ginoo?

Kon tanan dya ginaobra mo pa,
Ikaw pinasahi sa iban nga mga tinoga
Tinoga ka bag-ong hinirasyon kag ka tiknolohiya
Nga haros ginlamon ka pagbag-o ka sistima

Sa bag-ong hinirasyon, ang rispito amat-amat gakadora
Ginakalipatan dun ang tradisyon pati ang koltora
Bangud sa modirnisasyon ang pagtoon kis-a gakadipirinsya
Ang mga manami nga ogali naapiktohan ka tiknolohiya.

​Kon ikaw may diary ano ang isolat mo?
Isolat mo bala ang imo mga kasakit kag kapaslawan?
Mga bagay nga nagatogro pin-ut sa imong dughan?
Okon ang kahapon nga may nami nga kasaysayan?

Ang akun diary simpli lang nga sorolatan,
Ang magagmay nga panid bota kang kasadyahan
Bisan pa masubu ang iban ko nga naagyan,
Ang paglaum sa kabohi akun gihapon ginapasalamatan

Sa diary ko nasolat ang laragway ka palibot,
Kon sa diin ang mga bolak nagakanta kag nagasaot
Ang langit asol kag manipis ang mga panganod
Ang hangin gahuyup ka mabognaw, kalmado ang balud

Sa diary ko nasolat ang mga pinasahi nga bagay,
Ang pag-ayad ni Nanay, ang pagradweyt ni Inday
Ang pagbata kay Nonoy kag kaadlawan ni Tatay
Ang pagsimba kada Dominggo kag piknik sa kilid baybay

Bisan ano kabudlay ka pagtiraw kang kabohi,
Kon akun bokadon ang diary, ang kalinung nagahari
Ang mga matam-is nga inagyan kang akun kabohi,
Nagatogro pwirsa kanakun, nagabolong sa kahidlaw kag kasakit.

​Ang kabohi ka tawo daw malawid nga aragyan,
Sarisari nga pagtiraw ang imo nga maaguman
May mga nagabato asta sa katubtuban
Piro may mga mahina nga nagakawigit sa dalan.

Sa byahi kang kabohi may dyan nga manggaranun,
May dyan nga imol kag mga masakitun
May mga nagabinotig kag may matood sa kaogalingun
May dyan nga hambog kag may mapainubusun

Ang byahi kang kabohi wara it pili nga istado,
Nakadipindi lang sa pagsarig kag kaisug ka tawo
Hay ang pagtiraw wara man pili bisan sin-o
Bisan doki, hari, datu, okon milyonaryo.

Sa dalan kang kabohi may mga bagay nga howad,
May mga man-ug nga maloib nagatogro it samad
May mga pasahiro kag may nagatimon nga gatinamad
May mga nagakasandad sa dalan piro may mga gaogwad

Sa ponta ka aragtonan gagmay lang ang gakabilin,
Hay sa tungatunga ka byahi ang paglaum gakabohin
May mga napirdi kang kahadluk, dohadoha kag pagkapoling
May mga napalid sa basyada ka mapagrus nga hangin

Ikaw amigo, mag-andam kaw sa byahi mo,
Indi tanan nga bagay magatogro ka pabor kanimo
Kon may kabudlay sa byahi, agwantahun mo
Hay sa ponta ka aragtonan nagahulat ang paraiso.

​Akun ginbanas ang maoranun nga kagab-ihun,
Ang hangin mabaskug, malain ang panahon
Gakidrab ang langit, kurulbaan ang gal-um
Masaku ang tarithi, madamul ang ambon

Kang ako nakasamput sa tobang trangkahan,
Haroson makakita ka sakto nga dalan
Piro ang limug ni Nanay akun nabatian
Daw mosika ka paglaum sa akun pamatin-an

Nakita ko si Nanay nga nagapasirong sa binit,
Basa anang bayo kag sa karamig daw gakoriit
Ana ako gintawag para magparapit,
Ang anang limug gasagrak nga daw nagamasakit

“Nay, naano ikaw? Andut gakudug kaw?”
Gindohol na lang ang sobri kag tana nagkadlaw
“Wara, Toto, ginaobo lang ako kadyang adlaw”
Dayon tana naglisinsya nga tana run mapanaw

Samtang tana nagapanaw parayu kanakun,
Gatoro akun loha kag gaidlak nga daw bitoon
Ang kwarta nga sulud ka sobri daw anang tagiposoon
Nga pinangabudlayan it sobra para itogro kanakun

Kag ako nagbalik sa akun ginadayonan,
Basa ang akun bayo kag masubu ang akun dughan
Hay bangud sa oras ka akun pagkinahanglan
Si Nanay gasoray pa sa oran para ako maagtonan.

Imo pa bala nadumduman ang tanan?
Sa kilid ka akasya kon sa diin kita gadalagan?
Ang kahoy nga saksi ka atun mga naagyan
Kasakit, kasadya, kadarag-an, kag kapirdihan

Sa sanga katong kahoy, ikaw may ginsolat
Pitsa ka pagkilalahay ta imo ginbohat
Kaimaw ka mga kasipal ta, didto pirmi nagahulat
Sa pagsalup ka adlaw, sa paghunas ka dagat

Sa dalum ka akasya kita pirmi gaistorya,
Gasogiday ka mga problima
Gakanta sa hangin imaw ka iban nga mga bata
Gahulat ka oran para makatampisaw kita

Sa mga dahon ka akasya atun nga ginsompa,
Bisan magmal-am balikan gid natun dyang lopa
Para handorawon ang mga matam-is nga tinaga
Ibalik sa pinsar ang kasadya kang kita pa mga bata

Sa mga gamot ka akasya kita pirmi gapongko,
Galigidligid kag kon kaisa nagapangamoyo
Nga sa maabot nga adlaw nga kita magparayu
Ang pono nga dya magapabilin bohi kag malolo.

Ogaring sa akun pagbalik tanan nagbag-o,
Ang akasya gintapas, ginsonog, kag nangin abo
Kaparihas man ka akun pagpalangga para kanimo,
Gintipigan, ginpabaskug ogaring wara ginpamaan.

Ako nagpongko kag nagtangra sa langit,
Kag ang mga bitoon akun gin-isip
Ginabinagbinag naagyan nga kasakit
Ang pagbangon kag paglaum daw indi mapirit
 
Akun dun nga gintanum sa kahapon ang tanan,
Ogaring ang mosika pirmi ko gid mabatian
Nagapahanumdum ka atun tanan nga naagyan,
Nagkosi sa tagiposoon kag nagpabatyag sa dughan
 
Palangga, ayhan ako ginapanumdum mo man?
Bisan ikaw nagbiya kag nag-istar sa kahitaasan?
Ang ginbilin mo nga katam-is sa sonata ko lang mabatian
Kanta nga manami ka atun nagligad nga bolawan
 
Palangga, ako ayhan imo man ginahulat?
Kag sa mga bitoon ikaw bala nagapasiplat?
Ang atun ambahanun, indi gid mag-ontat
Sa pagtokar kang kasubu, kalinung ang nagasabat
 
Diyang mosika nga matam-is kag nagasabay sa kadulum,
Padayon nga nagapakita ka atun naotod nga handum
Nagabalik ka istorya ka imong pagpanglakatun
Pagbiya sa ka dyang kalibotan paagto sa mga bitoon.
​

​​Sa masiuk nga hardin nga napalibotan ka balagun,
May sangka paghigogma nga gintipigan kag gintanum
Ginbunyagan it pagsarig, gintaw-an ti paglaum
Ginsagod sa katam-is ka potli nga baratyagun

Ang pagpanaringsing ka rosas ginpotos kang katam-is,
Daw koloriti nga bolawan nga gadisinyo sa langit
Nagtogro it paratandaan ka gogma nga potli
Gayuhum sa kasanag kag sa hangin nagapamati

Ogaring ang pagsarig ginguba ka timtasyon,
Kaparihas ka bagyo nga nagdara kang kadulum
Ang matam-is nga yuhum nangin panghakruy sa talon
Ang masanag nga paraaboton nangin guba nga handum

Sa pagsorip ka habagat, ang rosas nangin mabaskug
Ogaring ang paghigogma ginbutung ka solog
Ang mga ginsompaan kag litaniya ginpanas ka balud
Ang tanan nga katam-is nabuslan kang kasubu

Naglabay ang mga oras kag malawid nga dinag-on
Ang hardin nangin wayang kag gintago ka talon
Piro ang rosas nga pola gapanaringsing sa gihapon
Nagapatimaan ka masubu kag mapin-ut nga kahapon.
​