Ay, abaw, nga Inday!
Wara gid ti pahuway
Sa iskwilahan ukon sa balay
Padayon sa pagpangadbudlay.

Ginakapoy ang maniki nga lawas
Samtang ginausoy ang bwasdamlag
Uran, init, sa maragkut nga balhas
Tanan ginaagwanta, sa kaimulon makatibawas.

Nagasarig nga madab-ot ang damgo
Mabuligan pamilya kag isigkatawo
Sa pagtuytoy ka Mahal nga Ginuo
Tanan maangkun kon mabaskug ang pagtuo.

Inday, ikaw sangka inspirasyon
Handa sa pagtuman ka mga handum
Sa kasanag ukon sa kadulum,
Madab-ot tanan kon magsarig sa kaugalingun.

Andut indi ko gid mapunggan
Ang ginasinggit ka dya nga dughan?
Wara gid ako ti naman-an
Ayhan dya akun malikawan?

Sa adlaw kag gabii ikaw ang kaubay
Nangin sulo ka gintukod nga panimalay
Sa kasubu, kasadya kag pagpangabudlay
Nag-agwanta, pangabuhi mangin masulhay.

Daw sa kabudlay batunon
Pag-imaway natun sangka paragwaun
Natabo dya tungud sa rason
Atun mga handum mapadayon.

Kang una wara lang sa bungug ko
Kinahanglan nga matukod ang dya nga plano
Kita mag-asawahay sa mata ka mga tawo
Katumanan sa atun tagsatagsa ka gusto.

Sa hinali lang akun nabatyagan
Ang pagpitik ka bato nga dughan
Paghigugma akun nga nakit-an
Ginasagap, kanimo nasapwan.

Kinahanglan ko ikaw asawa ko
Indi tungud sa atun mga damgo
Ukon sa ginbalhag nga plano,
Palangga ko ikaw sa mata ka Ginuo.